تۇركىستاندىق 13 وقۋشى «ەلباسى مەدالىمەن» ماراپاتتالدى
اتالعان جوباعا 11 مىڭنان استام قاتىسۋشى مەن 600 تالىمگەر، 17 وڭىرلىك ۇيلەستىرۋشى مەن ساراپشى قاتىسقان بولاتىن، دەپ حابارلايدى قازاقپارات ءتىلشىسى.
جوبا اياسىندا قاتىسۋشىلار سپورتتاعى دايىندىعىن جەتىلدىراپ، ۇلتتىق مۇرانى زەرتتەگەن. الەمدىك جانە قازاق ادەبيەتىنىڭ شىعارمالارىمەن تانىسىپ، ەڭبەك پراكتيكاسىنان وتكەن. سونداي-اق، ەلدىڭ ءار تۇكپىرىنە بارىپ، قازاقستان تاريحىنا ءۇڭىلدى جانە ۆولونتەرلىك قىزمەتتە دە بەلسەندىلىك تانىتقان.
جارتى جىل كولەمىندە وزدەرىنىڭ تاباندىلىعىن تانىتىپ، شىعارماشىلىعىن شىڭداعان. جان-جاقتى ىزدەنگەن جەڭىمپاز شاكىرتتەر ناتيجەسىن كورسەتىپ، وق بويى وزا شاپتى.
ولاردىڭ قاتارىندا نەكراسوۆ اتىنداعى 9№، اتاتۇرىك اتىنداعى 17№، م. جۇمابايەۆ اتىنداعى 15№ مەكتەپ-گيمنازيالارىنىڭ، ج. تاشەنوۆ اتىنداعى 23№ IT مەكتەپ-ليتسەيىنىڭ، ج. جابايەۆ اتىنداعى 11№، ب. مومىش ۇلى اتىنداعى 22№، ن. تورەقۇلوۆ اتىنداعى 8№ جانە ءا. ناۋاي اتىنداعى 13№ جالپى ورتا مەكتەپتەرىنىڭ وقۋشىلارى بار. قالا اكىمى راشيد ايۋپوۆ نۇرسۇلتان نازاربايەۆ قورىنىڭ قولداۋىمەن «ەلباسى اكادەمياسى» كورپوراتيۆتىك قورى ىسكە اسىرعان «ەل ءۇمىتى» جوباسىنىڭ جەڭىمپازدارىن مەدال، توسبەلگى جانە العىس حاتپەن ماراپاتتادى.
ايتا كەتەيىك، ايتۋلى جوبا وتكەن جىلدىڭ شىلدە ايىندا دامۋ باعدارلاماسىن كوزدەگەن 7 باعىت بويىنشا باستاۋ العان ەدى. ولار سپورت، دارىن مەن داعدى، كىتاپ وقۋ، ۇلتتىق مۇرا، ەرىكتىلىك، ساياحات پەن جورىقتار، ەڭبەك تاجىريبەسى. قاتىسۋشىلار ءۇش دەڭگەيدى تاڭداپ، ءار باعىت بويىنشا بەلگىلى ءبىر قىزمەتتى ورىنداۋدى كوزدەدى.