الماتى وبلىسىندا 13 ءۇيدى توناعان قىلمىستىق توپ ۇستالدى
«بەس اي ىشىندە تالدىقورعاندا جەكە مەنشىك ۇيلەردەگى ۇرلىق دەرەكتەرى تىركەلىپ وتىردى. نەگىزىنەن ۇرىلار پلاستيك تەرەزەلەر ارقىلى، كەي جاعدايدا ەسىكتەرگە كىلت تاڭداۋ ارقىلى ۇيگە كىرگەن. تەك باعالى زاتتاردى - التىن، اقشا، تەلەديدار، نوۋتبۋك، تەلەفون جانە باسقا دا مۇلىكتەردى قولدى قىلعان»، - دەيدى تالدىقورعان ق پ ب باتىس پوليتسيا ءبولىمى باستىعىنىڭ ورىنباسارى، پوليتسيا مايورى ازامات ماستەكبايەۆ.
پوليتسەيلەردىڭ نازارىن قوناقۇيلەردىڭ بىرىندە بولمە جالداپ تۇرىپ جاتقان جاس جىگىتتەر اۋدارعان. بەلگىلەنگەن باقىلاۋ كوپ ۇزاماي وڭ ناتيجەسىن بەردى.
«كەزەكتى ۇرلىق دەرەگىنەن كەيىن اۋىلدىق جەردەن كەلگەن 23، 26 جانە 27 جاستاعى كۇدىكتىلەر ۇستالدى. ءتىنتۋ كەزىندە ولاردان ۇرلانعان زاتتاردىڭ ءبىر بولىگى جانە ەكى تاسىمالدى راديوستانتسيا الىندى. ۇستالعاندار 13 ۇرلىقتى تولىق مويىندادى، ءبىراق ولاردىڭ باسقا وزگە دە وسىعان ۇقساس اشىلماعان قىلمىستارعا قاتىسى بار-جوعى تەكسەرىلۋدە، ءتىزىم ءالى دە كەڭەيە ءتۇسۋى مۇمكىن»، - دەپ تولىقتىردى مايور ماستەكبايەۆ.
سونىمەن قاتار، ەكى ازاماتتىڭ وتكەن جىلى وسىعان ۇقساس قىلمىستارى ءۇشىن باس بوستاندىعىنان ايىرىلعاندىعى انىقتالدى. توپتى سوتتىلىعى وتەلمەگەن ەڭ جاس قاتىسۋشى باسقارعان. ونىڭ باستاماسى بويىنشا، ۇستالعاندار پورتاتيۆتى راديوبايلانىستى پايدالانىپ، راتسيا ارقىلى قىلمىستىق توپ مۇشەسى جۇرگىزۋشى ءۇي يەلەرىنىڭ جاقىنداعانىن نەمەسە باسقا دا قاۋىپتى ەسكەرتىپ حابارلاپ وتىرعان.
الماتى وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، كۇدىكتىلەر قاماققا الىندى. سوتقا دەيىنگى تەرگەۋ ق ر ق ك 188-بابىنىڭ 3-بولىگىنە سايكەس جۇرگىزىلەدى. سوت شەشىمىنە دەيىن اۆتوكولىك ايعاق زات رەتىندە تاركىلەنىپ، ارنايى تۇراققا قويىلدى.