+7 (701) 759 90 19
27 °С : نۇر-سۇلتان
33 °С : الماتى
USD 412.55 EUR 468.66
RUB 5.79 CNY 58.80
جاڭالىقتار

ەلوردادا 13 بالانى باۋىرىنا باسقان اكەنىڭ جاڭا كىتابى جارىق كوردى

14 اقپان 09:30
:ءبولىسۋ
ەلوردادا 13 بالانى باۋىرىنا باسقان اكەنىڭ جاڭا كىتابى جارىق كوردى

نۇر-سۇلتان. قازاقپارات - 13 بالا تاربيەلەپ وتىرعان اقمولالىق مۇرات قابىلبايەۆتىڭ جاڭا كىتابى جارىق كوردى، دەپ حابارلايدى قازاقپارات.

ەلوردادا «ماعان اسپاندى كورسەتشى» دەپ اتالاتىن قازاق جانە ورىس تىلدەرىندە جازىلعان جاڭا كىتاپتىڭ تۇساۋى كەسىلدى. اۆتورى - مۇرات قابىلبايەۆ. ونىڭ شىعارماسى بۇعان دەيىن دە جارىق كورگەن، بۇل جولى تولىقتىرىلىپ، قايتا جاريالانىپ وتىر. 1000 دانامەن شىققان كىتاپ جەتىمدەر ۇيىنەن بالا اسىراپ العان اتا-انالارعا تەگىن تاراتىلادى.

مۇرات جۇبايى ورىنباسارمەن بىرگە 13 جەتكىنشەكتى باۋىرىنا باسقان. ءوزىنىڭ ايتۋىنشا، ەرلى-زايىپتىلار 9 جىل بالا كورمەگەن. سوسىن يبراحيم اتتى كوپتەن كۇتكەن ۇلى دۇنيەگە كەلەدى. سودان كەيىن اناسىنىڭ اق باتاسىن الىپ، بىردەن 4 بالانى قامقورلىققا الادى.

«ارينە، ءبىز دە باسىندا 2-5 جاس اراسىنداعى، ءالى وڭ-سولىن بىلمەيتىن ءبۇلدىرشىندى العىمىز كەلگەن. ولاردى تاربيەلەۋ وڭاي بولادى دەپ ويلادىق. ءبىراق بالالار ۇيىنە بارعاندا ويىمىز تولىق وزگەردى. ونداي ءتاتتى بوبەككە ءبارى قىزىعادى، ال 8-15 جاستاعى جاس وسپىرىمدەر نازاردان تىس قالادى ەكەن. ەسەيىپ قالعان جاس ءوسپىرىمدى دۇرىس جولعا سالۋ وڭاي ەمەس، ول سەنىڭ دەگەنىڭە كونە سالمايدى، ءار ماسەلەدە ءوز پىكىرى بار. ءبىز تاۋەكەلگە بەل بۋدىق. مىسالى، ءبىرىنشى جولى ۇيگە الىپ كەلگەن بالالاردىڭ ىشىندە 12 جاسار ادەل اتتى قىز بولدى. قازىر ونىڭ جاسى جيىرمادا، كوللەدجدە وقىپ جاتىر. ودان بولەك، اعايىندىلاردىڭ بىرەۋىن عانا اسىراپ الۋعا بولمايدى، سوندىقتان ءبىراز بالانى باۋىرىمەن قوسىپ الدىق. وسىلايشا ۇيىمىزدەگى بۇزىقتاردىڭ سانى وسە بەردى. كوليانى بالالار ۇيىندە كورگەندە «ۇيگە الىپ كەتەم» دەپ ۋادە بەرگەنمىن. سويتسەم ونىڭ بوبەكتەر ۇيىندە قارىنداسى بار ەكەن. وسىعان بولا ۋادەمدى بۇزبايمىن عوي. سول كىشكەنتاي قىز قازىر تاقىلداپ، وزىمىزگە اقىل ايتادى»، - دەيدى مۇرات قابىلبايەۆ.

اۆتور سونداي-اق بالا تاربيەسىندە قانداي قيىندىقتارعا كەز بولعانىن، جەتكىنشەكتەردىڭ وتكەن ءومىرى تۋرالى نە دەيتىنىن، بالالاردىڭ جامان ادەتتەرىن قالاي قويعىزعانىن ايتىپ بەردى.

«بالا دەگەن مانيپۋلياتور عوي. باسىندا كوبى مىنەز كورسەتىپ، اياۋشىلىق تۋعىزۋ ءۇشىن، «ماعان باسقالارعا قاراعاندا ەرەكشە كوڭىل بولسە» دەگەن ويمەن كوپ وتىرىك ايتادى. بالاعات ءسوزدى ۇيرەنشىكتى نارسە كورەدى. ءبىز وتباسىلىق كەڭەستە ادالدىق، ادامگەرشىلىك تۋرالى كوپ ايتامىز. ودان بولەك، ۇيدە ءبىر جاعداي بولسا، كىنالى بالامەن وڭاشا سويلەسەمىن. ونىڭ ەرسى قىلىعىن باسقالارعا بىلدىرمەيمىن دە. ار-ۇياتىن وياتىپ، ءىسىنىڭ اعات بولعانىن تۇسىنسە دەيمىن. ءتىپتى، تەنتەك مىنەزىن يگەرە الماعان ءبىر بالام جىلاپ-جىلاپ، «قانشا تىرىسسام دا، قولىمنان كەلمەي جاتىر» دەپ وزىمنەن كومەك سۇرادى. جالپى، وتباسىلىق كەڭەس كوپ كومەكتەستى. اپتا سايىن جينالىپ، پروبلەمالاردى تالقىلايمىز، اركىم ءوز ويىن ايتادى. ماسەلەنى كوپ بولىپ بىرگە شەشۋگە تىرىسامىز. وسىلاي-وسىلاي تەز-اق تۇزەلىپ كەتتى. بارىنە شىدام مەن سابىر كەرەك. ارينە، ماعان دا باسىندا قينالعاندا بالانى قايتارۋ تۋرالى ويلار كەلەتىن. ءبىراق بالا دەگەن امانات قوي. ۋاقىت وتە كەلە ولاردى ەشتەڭەگە ايىرباستامايتىنىمدى ءتۇسىندىم»، - دەيدى اۆتور.

كەشتە مۇراتتىڭ ۇلى تولەگەن مونولوگ وقىدى. ول ءوزىن تۋعان بەيتانىس ايەلگە رەنجىمەيتىنىن، ەڭ باستىسى باقىتتى بولسا دەپ تىلەيتىنىن ايتادى. ويتكەنى تولەگەن قازىر اتا-انا ماحابباتىنا بولەنىپ، باقىتتى كۇن كەشىپ جاتىر، مۇمكىن بۇعان وزىنەن باس تارتۋعا ءماجبۇر بولعان اناسىنىڭ دۇعاسى سەپ بولعان شىعار؟ سوندىقتان ول ەشكىمگە وكپەلى ەمەس.

مۇرات قابىلبايەۆ الداعى ۋاقىتتا مەتسەناتتار تابىلسا، كىتابىنىڭ تارالىمىن كوبەيتىپ، ەركىن ساتىلىمعا شىعارۋدى ويلاستىرىپ وتىر.



:ءبولىسۋ
پئكئر قالدئرؤ
+7
جئبةرؤ
ونلاين قىزمەتكەرلەر
رەداكتور
باقىتجول كاكەش
باقىتجول كاكەش
954-049
رەداكتور
ريزابەك نۇسىپبەك
ريزابەك نۇسىپبەك
954-049
رەداكتور
بەيسەن سۇلتان
بەيسەن سۇلتان
954-049

مۇراعات