قازاقتىڭ ۇلى تۇلعالارىنىڭ ەسىمى پاۆلودارداعى 13 كوشەگە بەرىلمەك
«كولوس» ورتالىعىندا پاۆلودار قالاسىنىڭ كەيبىر كوشەلەرىن قايتا اتاۋ ماسەلەسى بويىنشا كوشپەلى تىڭداۋ ءوتتى.
تىڭداۋعا قوعامدىق كەڭەس مۇشەلەرى، قۇرمەتتى ازاماتتار، ارداگەرلەر، قالا تۇرعىندارى، قالالىق ءماسليحات دەپۋتاتتارى، اتقارۋشى ورگان جانە ب ا ق وكىلدەرى شاقىرىلعان. تىڭداۋ بارىسىندا پاۆلودار قالاسى اكىمىنىڭ ورىنباسارى سۆەتلانا گلادىشەۆا كوشە اتاۋلارىن وزگەرتۋ بويىنشا تۇسكەن ۇسىنىستاردى اتاپ ءوتتى.
ونىڭ ايتۋىنشا، س. تورايعىروۆ اتىنداعى پ م ۋ عالىمدارى مەن پروفەسسورلارىنان ديميتروۆ كوشەسىن - جۇسىپبەك ايماۋىتوۆ، 1 ماي - ءماشھۇر ءجۇسىپ، كارل ماركس - ءاليحان بوكەيحان، كيروۆ - ەرماحان بەكماحانوۆ، كورولەنكو - بۇقار جىراۋ، ج. ايماۋىتوۆ - اقجول، م. ج. كوپەيەۆ - اقبەتتاۋ، بەستۋجيەۆ - شاكارىم قۇدايبەردى ۇلى اتاۋلارىنا اۋىستىرۋ تۋرالى ۇسىنىس تۇسكەن. سونداي-اق قازاقستان جازۋشىلار وداعى پاۆلودار وبلىستىق فيليالىنىڭ ديرەكتورى ارمان قانيدان ۆولودارسكي كوشەسىن - جەلتوقسان، بولشايا وبەزدنايا - جىبەك جولى دەپ اتاۋ، قالالىق زيالى قاۋىم وكىلدەرىنەن، «Jebe» قوعامدىق بىرلەستىگىنىڭ ءتوراعاسىنان جانە پاۆلودار قالاسىنىڭ قۇرمەتتى ازاماتى شولپان بايعالىدان كرۋپسكايا كوشەسىن - ەدىگە بي، ساعادات نۇرماعامبەتوۆ اتىنداعى قوردىڭ ديرەكتورىنان چكالوۆ كوشەسىن - ساعادات نۇرماعامبەتوۆ اتىنا بەرۋ، وبلىستىق ارداگەرلەر كەڭەسىنەن پاحوموۆ كوشەسىن - قابدەش نۇركين اتىمەن اتاۋ تۋرالى ۇسىنىس تۇسكەن.
«ءبىز مەملەكەت باسشىسى قاسىم-جومارت توقايەۆتىڭ تاپسىرماسىمەن پاۆلودار قالاسىنداعى ونوماستيكالىق جۇمىستاردى جالعاستىرۋدامىز. بيىل جەكە جانە زاڭدى تۇلعالاردان وبلىس اكىمىنىڭ، پاۆلودار قالاسى اكىمىنىڭ اتىنا تۇسكەن وتىنىشتەردى قاراستىرۋ ءۇشىن بارلىق قۇجاتتار قالالىق ءماسليحاتقا جىبەرىلدى. اتالعان يدەولوگيالىق تۇرعىدان ەسكىرگەن كوشە اتاۋلارىن اۋىستىرۋ مەملەكەتىمىزدىڭ قالىپتاسۋىنا ۇلەسىن قوسقان تاريحي تۇلعالارىمىزدىڭ ەسىمىن جاڭعىرتۋعا مۇمكىندىك بەرەدى. وعان قوسا، قۇرامىندا وزگە ۇلت وكىلدەرى بار تۇرعىندارعا بۇنداي تۇلعالارمەن تانىسۋعا مۇمكىندىك بەرىپ، حالىق اراسىندا جاراسىم تابۋعا ۇلەسىن تيگىزەدى. سوندىقتان بۇل شەشىمىمىزدى قولداۋدى سۇرايمىن»، - دەدى سۆەتلانا گلادىشەۆا.
ەڭبەك ارداگەرى، زاڭگەر جانە قۇقىق قورعاۋشى بولعان بورانباي ىسقاقوۆ 13 كوشەنىڭ اتاۋىن وزگەرتۋ تۋرالى باستامانى قولدايتىنىن ايتتى.
«الەم تاريحى - ۇلى تۇلعالاردىڭ بيوگرافياسى. كوشە، ساياباقتاردىڭ اتاۋى - ءبىز تۇراتىن ءوڭىر جايلى مالىمەت بەرەتىن قۇرال. بۇگىن 1 -مامىر كوشەسى تۋرالى باسقاشا ويلار ايتىلۋدا. ءبىز بۇنداي مەرەكەلەردى تويلاپ وسكەنىمىز بەلگىلى. ءبىراق يدەولوگيا، مەملەكەتتىڭ قوعامدىق قۇرىلىمى وزگەردى. الەۋمەتتىڭ لوگيكاسى بۇنداي داتالاردى قابىلدامايدى. سوندىقتان زاڭعا قارسى كەلگەن ەشتەڭەسى جوق دەپ ويلايمىن. كەلەر جىلى فاشيزمدى جەڭگەننىڭ 75 جىلدىعىن بارلىعى تويلايدى. تاريحقا، جەڭىستە گەنەرالدىڭ دا، قاتارداعى جاۋىنگەردىڭ دە ورنى بىردەي. سوندىقتان پاۆلودار قالاسىنىڭ كوشەلەرىنىڭ بىرىندە گەنەرال ساعادات پەن قاتارداعى جاۋىنگەر قابدەشتىڭ اتى تۇرۋى - قۇپتارلىق ءىس. مەن بۇل كوشەلەردىڭ اتاۋى وزگەرتىلۋىن قولدايمىن»، - دەدى بورانباي ىسقاقوۆ.
قالالىق №17-مەكتەپتىڭ ماتەماتيكا ءپانىنىڭ مۇعالىمى الەكساندر دوتسيۋك كورولەنكو كوشەسىندە تۋىپ-وسكەن. «مەن ءۇشىن وسىنداي شاراعا قاتىسۋ - مارتەبە»، - دەدى الەكساندر دوتسيۋك. «وسى قالادا، كورولەنكو كوشەسىندە تۋىپ، سول كوشەدە ءوستىم. بالالىق شاعىم ءوتتى. قازاقستان - جاس مەملەكەت. ءوسىپ جاتقان ۇرپاق تاريحىن، باتىرلارىن ءبىلۋى كەرەك. كورولەنكو كوشەسىنە بۇقار جىراۋ اتىن بەرۋ وزەكتى دەپ سانايمىن. ول تەك جىراۋ بولماي، ابىلاي حانعا اقىل ايتقان. حان ونىڭ اقىلىن تىڭداعان. وسىنداي بەدەلى زور تۇلعانىڭ ەسىمى قالامىزدا بولۋى ءتيىس».
تىڭداۋ ناتيجەلەرىن ەسكەرە كەلە، قالالىق ءماسليحاتتىڭ تۇراقتى كوميسسيالارىنىڭ 8 دەپۋتاتى ءبىراۋىزدان شەشىمدى قولداپ داۋىس بەردى.
ايتا كەتەيىك، ەندى قازاقستان زاڭناماسىمەن ورناتىلعان مەرزىمدە ءتيىستى قۇجاتتار رەسپۋبليكالىق ونوماستيكالىق كوميسيانىڭ قاراۋىنا جىبەرىلەدى.