ءبىلىم كاسىپوداعى ارىس حالقىنا 13 ميلليون تەڭگە اۋداردى
كاسىپوداق ءتورايىمى مايرا امانتايەۆا ارىس قالاسىنا ارنايى بارىپ، بارلىق وڭىردەگى ايماقتىق ءبىلىم جانە عىلىم سالاسىنىڭ كاسىپوداقتارى اۋدارعان 13 ميلليون تەڭگەنى ارنايى ەسەپ-شوتقا اۋداردى.
قايىرىمدىلىق ءىس-شارا ارىس قالاسى اكىمدىگىنىڭ ءماجىلىس زالىندا ءوتتى. جيىنعا جەرگىلىكتى اتقارۋ ورگاندارىنىڭ وكىلدەرى، ءبىلىم بەرۋ وشاقتارىنىڭ باسشىلارى مەن باستاۋىش كاسىپوداق ۇيىمدارىنىڭ ءتوراعالارى قاتىستى.
جۇمىس ساپارى بارىسىندا سالالىق كاسىپوداق ۇيىمىنىڭ ءتورايىمى مايرا امانتايەۆا جارىلىس سالدارىنان زارداپ شەككەن ءبىرقاتار ءبىلىم بەرۋ ۇيىمدارىنا بارىپ، ولاردىڭ جاعدايىمەن تانىستى.
جوعارىدا اتالعان قارجىلاي كومەكپەن قاتار، اتالمىش كاسىپوداقتىڭ ايماقتارداعى ۇيىمدارى ارىستىق بالالاردى جازعى لاگەرلەرگە ورنالاستىرىپ، كيىم-كەشەكپەن قامتاماسىز ەتۋ جۇمىستارىن جالعاستىرىپ جاتىر.
ايتا كەتۋ كەرەك، 95 جىلدىق تاريحى بار قازاقستاندىق ءبىلىم جانە عىلىم قىزمەتكەرلەرى كاسىپوداعى - ەلدەگى ەڭ ءىرى قوعامدىق ۇيىم. اتالعان كاسىپوداق قۇرامىندا 700 مىڭنان استام مۇشە بار.