عالىمبەك كەنجەبايەۆ: ەلورداعا 13 ەلدىڭ ەڭ مىقتى بوكسشىلارى كەلە جاتىر
بۇل تۋرالى قازاقپارات تىلشىسىنە بوكستان ۇلتتىق قۇرامانىڭ باس باپكەرى عالىمبەك كەنجەبايەۆ ايتىپ بەردى.
«الدا وتكەلى وتىرعان پرەزيدەنت كۋبوگى بوكسشىلارىمىز ءۇشىن ماڭىزدى جارىستاردىڭ ءبىرى. ويتكەنى، الەم چەمپيوناتى قارساڭىندا ۇلتتىق قۇراما قاتارىنا ىلىگەتىن بوكسشىلار تاپ وسى تۋرنيردە تاڭدالادى. بۇل جارىسقا الەمنىڭ 13 مەملەكەتىنەن ەڭ تاڭداۋلى بوكسشىلار كەلە جاتىر. الدى كەلىپ ۇلگەردى. ءبىز ولارمەن بىرلەسىپ، سوڭعى وقۋ-جاتتىعۋ جيىنىمىزدى پىسىقتاپ جاتىرمىز»، - دەدى باس باپكەر.
سونداي-اق، باس باپكەر ۇلتتىق قۇراما بوكسشىلارىنىڭ بۇل دوداعا تاس-ءتۇيىن دايىن ەكەنىن جەتكىزدى.
«بيىلعى پرەزيدەنت كۋبوگى بۇرىنعىدان وزگەشە بولماق. بۇل جولى بۇرىنعىداي ون سالماق ەمەس، سەگىز سالماق دارەجەسىندە ۇزدىكتەر انىقتالادى. جارىسقا ازيا چەمپيوناتىنداعى قۇرام مەن سپارتاكيادا جەڭىمپازدارى قاتىسادى. بۇگىنگى تاڭدا بوكسشىلار جارىسقا تاس-ءتۇيىن دايىن»، دەپ اتاپ ءوتتى عالىمبەك كەنجەبايەۆ.
ەستەرىڭىزگە سالا كەتەيىك، وسىعان دەيىن پرەزيدەنت كۋبوگىنە ەرلەر قۇراماسى مەن ايەلدەر قۇراماسىنان كىمدەر قاتىساتىنى تۋرالى جازعان بولاتىنبىز.
اۆتور: كۇنسۇلتان وتارباي