دەنەسىنە 13 كەلى التىن تاققان ەر ادام جۇرتتى قايران قالدىردى

 نۇر-سۇلتان. قازاقپارات - ۆەتنامدا 36 جاستاعى كاسىپكەر تران نگوك پحۋك التىن بۇيىمدارىنسىز ۇيىنەن شىقپايتىن كورىنەدى.

ونىڭ التىن بۇيىمدارىنىڭ جالپى سالماعى 13 كەلىنى قۇرايدى. ەر ادامدى 5 كۇزەتشى قورعاپ جۇرەدى ەكەن.  بۇل تۋرالى Big Picture سايتى حابارلايدى.

 كاسىپكەردىڭ 13 كەلىلىك بۇيىمدارىنا 4 جۇزىك كىرەدى. ولاردىڭ ءارقايسىسىنىڭ سالماعى جارتى كەلى بولادى ەكەن. سونىمەن قاتار ەر ادامنىڭ موينىندا 5 كەلىلىك القا، بەلىندە ۇلكەن التىن بەلدىك بار.

 ول ءوزىن ۇرىلاردان قورعاۋ ءۇشىن، ۇيىنەن 5 كۇزەتشىسىمەن عانا شىعادى. باسىلىم مالىمەتىنشە، كاسىپكەردىڭ التىن بۇيىمدارىنىڭ قۇنى -  شامامەن 150 مىڭ دوللار (57 ميلليون 500 مىڭ تەڭگەدەن اسا) .

ول التىن بۇيىمدارى وزىنە ساتتىلىك اكەلەتىنىنە سەنىمدى.

 قازىرگى ۋاقىتتا پحۋك حوشيميندەگى ەڭ تانىمال كاراوكە- كلۋبتاردىڭ ءبىرىنىڭ يەسى.

 كاسىپكەردىڭ سوزىنشە، ول كەدەي وتباسىندا وسكەن. ءوزىنىڭ ءبىرىنشى ميلليونىن 20 جاسىندا تاپقان ەكەن.

 

 ەر ادام ءوزىنىڭ العاشقى التىن اشەكەيىن فەن- شۋي بويىنشا كەڭەسشىنىڭ كەڭەسىنەن كەيىن ساتىپ الىپتى. ول باعالى مەتاللدىڭ يەسىنە ساتتىلىك اكەلەتىنىن ايتىپتى. وسىدان كەيىن پحۋك كوپ التىن تاعۋعا ۇمتىلعان.

 دەسە دە كاسىپكەر اۋىر بۇيىمداردان موينى مەن ارقاسى اۋىراتىنىن مويىندادى. ءتىپتى، ءبىر كەزدە دارىگەرگە جۇگىنۋىنە تۋرا كەلگەن.

 

 الايدا پحۋك ەشتەڭەگە قاراماستان ءوزىنىڭ التىن بۇيىمدارىنان باس تارتۋعا قۇلىقتى ەمەس. سونىمەن قاتار ول ءوزىنىڭ التىن بۇيىمدارىنىڭ قاتارىنا بەيسبولكانى قوسىپتى.

  الداعى ۋاقىتتا كاسىپكەر التىن جىپتەن تىگىلگەن جەيدە ساتىپ الماقشى.