11:31, 21 - اقپان 2019 | GMT +6
قازاقستاندا كەلەسى جىلى تاعى 13 اۆتوتراسسا اقىلى بولادى
استانا. قازاقپارات - 2020-جىلى 13 اۆتوجولدا اقى الۋ جۇيەسى ەنگىزىلەدى. بۇل تۋرالى بۇگىن ق ر يندۋستريا جانە ينفراقۇرىلىمدىق دامۋ ءبىرىنشى ۆيتسە-ءمينيسترى رومان سكليار ايتتى، دەپ حابارلايدى قازاقپارات ءتىلشىسى.
ول ق ر يندۋستريا جانە ينفراقۇرىلىمدىق دامۋ مينيسترلىگىنىڭ كەڭەيتىلگەن القا ماجىلىسىندە «الماتى-قورعاس»، «الماتى-قاپشاعاي» جانە «استانا-تەمىرتاۋ» ۋچاسكەلەرىندە اقى الۋ جۇيەسى اعىمداعى جىلدىڭ قاڭتار ايىندا ىسكە قوسىلعانىن اتاپ ءوتتى.
«اعىمداعى جىلى مەملەكەتتىك-جەكەشەلىك ارىپتەستىك تەتىكتەرى ارقىلى ۇزىندىعى 5 مىڭنان استام شاقىرىمدى قۇرايتىن 13 ۋچاسكەدە اقى الۋ جۇيەسىن ورناتۋ كونكۋرسىن جاريالاۋ جوسپارلانعان. جەڭىمپازدى وسى جىلدىڭ جەلتوقسانىندا انىقتاۋدى كوزدەپ وتىرمىز جانە 2020-جىلى 5 مىڭ شاقىرىم جول اقىلى بولادى»، - دەدى ۆيتسە-مينيستر.
جالپى، ونىڭ دەرەگىنە سايكەس، 2021-جىلى ەلىمىزدە اقىلى جولداردىڭ ۇزىندىعى شامامەن 6,5 مىڭ شاقىرىمعا جەتەدى.