قازاقستان اۋىر اتلەتيكادان الەم چەمپيوناتىن 13-ورىندا اياقتادى

استانا. قازاقپارات - تۇرىكمەنستان استاناسى اشحاباد قالاسىندا اۋىر اتلەتيكادان الەم چەمپيوناتى مارەسىنە جەتتى، دەپ حابارلايدى قازاقپارات ءتىلشىسى.

ق ر اۋىر اتلەتيكا فەدەراتسياسىنىڭ باسپا ءسوز قىزمەتىنەن ءمالىم ەتكەندەي، قازاقستاننىڭ ايەلدەر قۇراماسى جارىستى ءۇشىنشى ورىندا، ەرلەر جەتىنشى ورىندا اياقتادى. ال ۇلتتىق قۇرامالاردىڭ جالپى ەسەبىندە قازاقستان 13-ورىندى مىسە تۇتتى.

الەم چەمپيوناتىندا ءبىرىنشى ورىندى قىتاي يەلەندى. 7 التىن، 8 كۇمىس، 4 قولا مەدالمەن قىتاي قۇراماسى ءوز قارسىلاستارىنان ەداۋىر وزىپ كەتتى. ەكىنشى ورىنعا 3 «التىن»، 3 «قولامەن» تايلاند قۇراماسى تۇراقتاسا، ءۇشىنشى ورىندى 2 التىن، 1 قولا مەدالمەن يران تۇيىندەدى.

قازاقستان قورجىنىنا بارلىعى ەكى مەدال ءتۇستى - ءبىر كۇمىس، ءبىر قولا. كۇمىس جۇلدەنى 55 كەلىگە دەيىنگى سالماقتاعى زىلتەمىرشى ارلي چونتەي الىپ كەلدى.

ايتا كەتەيىك، 2018-جىلعى الەم چەمپيوناتىندا ەل نامىسىن بارلىعى 20 سپورتشى (ەرلەر - 10، ايەلدەر - 10) قورعاۋى ءتيىس بولاتىن. ءبىراق كەيىن، قازاقستان ۇلتتىق قۇراماسىنىڭ باس باپكەرى يۋري مەلنيكوۆ الەمنىڭ ءتورت دۇركىن چەمپيونى يليا يلين جاراقاتىنا بايلانىستى بۇل جارىسقا قاتىسا المايتىنىن ءمالىم ەتتى.

اشحابادتاعى بايراقتى دودا 1-10- قاراشا كۇندەرى ارالىعىندا ءوتتى. وعان الەمنىڭ 100 مەملەكەتىنەن 800 گە جۋىق اۋىر اتلەت قاتىستى.