ۇشاققا ءجيى مىنەتىن قازاقستاندىقتار سانى 13 پايىزعا ارتتى
ىشكى نارىقتا جيىلىگى جاعىنان ەڭ الدا تۇرعان باعدار - الماتى-استانا-الماتى بولىپ وتىر، دەپ حابارلايدى قازاقپارات ءتىلشىسى Ranking.kz زەرتتەۋلەرىنە سىلتەمە جاساپ.
2018-جىلدىڭ قاڭتار-تامىز ايلارىندا اۋە كولىگى جولاۋشىلارىنىڭ سانى - 5,5 ميلليون ادام بولعان. بۇل وتكەن جىلدىڭ سايكەس كەزەڭىمەن سالىستىرعاندا 12,7 پايىزعا ارتىق.
قازاقستانداعى كولىك كاسىپورىندارىنىڭ كىرىسى 2018-جىلدىڭ قاڭتار-تامىز ايلارىندا 1,8 تريلليون تەڭگەگە جەتكەن. ونىڭ ىشىندە اۋە كولىگى كاسىپورىندارىنىڭ تابىسىنا - اتالمىش كورسەتكىشتىڭ 12,2 پايىزى، ياعني 224,8 ميلليارد تەڭگەسى (ءبىر جىلدىڭ ىشىندەگى ءوسىم - 18,1 پايىز) تيەسىلى.
اۋە كولىگىمەن جۇك تاسىمالداۋ جانە باگاج قىزمەتىنەن تۇسكەن تابىس اسا كوپ ەمەس - بارلىق سومانىڭ 0,001 پايىزى عانا وسى قىزمەتكە تيەسىلى.
ال ازاماتتىق اۆياتسيا كوميتەتىنەن حابارلانىپ وتىرعانداي، ىشكى نارىقتاعى حالىق ەڭ كوپ ۇشاتىن اۋە باعىتى - «الماتى - استانا - الماتى. بۇل مارشرۋت بويىنشا ەكى باعىتقا 4 اۋە كومپانياسى («ەير استانا»، «SCAT»، «بەك ەير»، «Qazaq Air») اپتاسىنا 274 رەيس ورىندايدى. ورتا ەسەپپەن استانادان الماتىعا جانە كەرى ۇشۋعا بولاتىن كۇندەلىكتى 19 رەيس بار.
ەكىنشى حالىق كوپ ۇشاتىن باعىت - «الماتى - شىمكەنت - الماتى». بۇل مارشرۋت بويىنشا ەكى باعىتقا 4 اۋە كومپانياسى («ەير استانا»، «SCAT»، «بەك ەير»، «Qazaq Air») اپتاسىنا 62 رەيس ورىندايدى.
ءۇشىنشى ورىندا - استانا - شىمكەنت - استانا مارشرۋتى. بۇل باعىتتا 3 اۋە كومپانياسى («ەير استانا»، «SCAT»، «بەك ەير») اپتاسىنا 60 رەيس ورىندايدى.
قازاقستان رەسپۋبليكاسىندا حالىقارالىق نارىقتا جولاۋشى تاسىمالدايتىن 25 شەتەلدىك جانە 2 قازاقستاندىق اۋە كومپانياسى بار. حالىقارالىق باعىتتا ەڭ كوپ قولدانىلاتىن - «الماتى - ماسكەۋ - الماتى» مارشرۋتى. بۇل باعىتقا ەكى اۋە كومپانياسى («ەير استانا»، «اەروفلوت») اپتاسىنا 60 رەيس ورىندايدى.
حالىق تاراپىنان سۇرانىسقا يە ەكىنشى باعىت - «استانا - ماسكەۋ - استانا». بۇل باعىتقا ەكى اۋە كومپانياسى («ەير استانا»، «اەروفلوت») اپتاسىنا 48 رەيس ورىندايدى.
ءۇشىنشى ورىندا - «الماتى - ىستامبۇل - الماتى» مارشرۋتى. بۇل ەكى باعىتقا ەكى اۋە كومپانياسى («ەير استانا»، «Turkish Airlines») اپتاسىنا 34 رەيس ورىندايدى.