ۇ ب ت- دا ەڭ جوعارى 139 بال جيناعان ەكى وقۋشىنىڭ قۋلىققا بارعانى بەلگىلى بولدى
10 ماۋسىم 20:57

ۇ ب ت- دا ەڭ جوعارى 139 بال جيناعان ەكى وقۋشىنىڭ قۋلىققا بارعانى بەلگىلى بولدى

نۇر-سۇلتان. قازاقپارات - بيىلعى ۇ ب ت باستالعالى بەرى 139 بال جيناعان ەكى تالاپكەر تىركەلدى.

دەگەنمەن قايتا تەكسەرۋ كەزىندە اتالعان وقۋشىلاردىڭ ەرەجە بۇزعانى بەلگىلى بولدى، دەپ حابارلايدى قازاقپارات.

بۇل جايىندا ۇلتتىق تەستىلەۋ ورتالىعىنىڭ ديرەكتورى رۋسلان ەمەلبايەۆ حاباردار ەتتى.

«سىزدەر ۇ ب ت- دا ءوز بىلىمىڭىزبەن جوعارى ۇپاي جيناساڭىزدار، ءبىز قاتتى قۋانامىز. ءبىراق اكادەميالىق ادالدىق قاعيدالارىن ساقتاماي، وڭاي تاپسىرۋ جولدارىنا جۇگىنەتىن تالاپكەرلەر بار. سوندىقتان سىزدەرگە قۋانىشتى جاڭالىقتى ايتار الدىندا قوسىمشا تەكسەرىس جۇرگىزۋدى ءجون كوردىك. وكىنىشكە قاراي، تالاپكەرلەردىڭ بەينەجازباسىن قايتا تەكسەرۋ بارىسىندا ەرەجە بۇزۋ فاكتىلەرى انىقتالدى. ءتيىستى شارالار قولدانىپ، تەستىلەنۋشىلەردىڭ ۇپايىن جويدىق» دەيدى رۋسلان ەمەلبايەۆ Instagram پاراقشاسىندا.

ونىڭ ايتۋىنشا، اكادەميالىق ادالدىق بارىنەن جوعارى تۇرۋى ءتيىس.

«ءوزىڭىزدى دە، وزگەلەردى دە الداۋدىڭ قاجەتى جوق. ەڭ دۇرىسى ارماندارىڭىزعا ادال جولمەن جەتىڭىزدەر. ۇ ب ت- دا تەرەڭ ءبىلىمىنىڭ ارقاسىندا 140 بال جينايتىن تەست تاپسىرۋشى تابىلادى دەپ سەنەمىز. ول ءدال ءسىز بولۋىڭىز مۇمكىن، ءبىز ءسىزدى كۇتەمىز. مەنىڭ جەكە ءنومىرىم اشىق جاريالانعان، سىزدەر الەۋمەتتىك جەلىلەردە جازىپ جاتقان ءار حابارلامانى وقيمىن. وسىعان دەيىن جازعانىمداي، ءدال قازىر ءبىز 100 دەن اسا ەرەكشە جوعارى بال (20+ بالدان 90+ بالعا دەيىن) جيناعان تالاپكەرلەردىڭ بەينەجازباسىن قوسىمشا تەكسەرىستەن وتكىزىپ جاتىرمىز. ەرەجە بۇزۋشىلىقتىڭ ارقاسىندا قول جەتكەن بۇكىل ناتيجە جويىلادى» دەپ اتاپ ءوتتى ورتالىق ديرەكتورى.

جاڭالىقتار