11:15, 11 - جەلتوقسان 2020 | GMT +6
فرانسيا امەريكالىق ينتەرنەت-كومپانيالارىنا 135 ميلليون ەۋرو ايىپپۇل سالدى
ليون. قازاقپارات - ينفورماتيكا جانە ازاماتتىق بوستاندىقتار جونىندەگى فرانسۋز كوميسسياسى Google جانە Amazon امەريكالىق ينتەرنەت-كومپانيالارىنا ايىپپۇل سالدى.
بۇعان پايدالانۋشىلاردىڭ جەكە اقپاراتى بار cookie فايلدارىن ولاردىڭ كەلىسىمىنسىز پايدالانۋى سەبەپ بولدى، دەپ حابارلايدى قازاقپارات Euronews-كە سىلتەمە جاساپ.
«گۋگلعا» €100 ميلليون، ال «امازونعا» €35 ميلليون ايىپپۇل سالىندى. فرانسۋز زاڭىنا سايكەس، ينتەرنەت- سايتتار پايدالانۋشىلارعا سايتتا cookie ارقىلى اقپارات جينالاتىنىن جانە ونىڭ قانداي ماقساتتا جۇزەگە اسىرىلاتىنىن حابارلاۋى ءتيىس. ادەتتە ينتەرنەتتە جارناما جاسايتىن ينتەرنەت- كومپانيالار اقپاراتتى وسىنداي فايلدار ارقىلى الىپ جاتادى.
Cookie فايلدارى پايدالانۋشىنىڭ قانداي سايتتارعا كىرەتىنى تۋرالى اقپاراتتى قامتيدى. ولار پايدالانۋشىنىڭ نەگە قىزىعاتىنى نەگە سۇرانىس تۋدىرىپ وتىرعانىن انىقتاۋعا مۇمكىندىك بەرەدى.
اۆتور: گۇلزات اقجولوۆا