ۇ ب ت- دا 132 بال جيناعان اتىراۋلىق تۇلەك وڭتۇستىك كورەيا ۋنيۆەرسيتەتىنە وقۋعا ءتۇستى

اتىراۋ. قازاقپارات - اتىراۋلىق تۇلەك وڭتۇستىك كورەيا ۋنيۆەرسيتەتىنە وقۋعا ءتۇستى، دەپ حابارلايدى قازاقپارات ءتىلشىسى.

وڭىرلىك كوممۋنيكاتسيالار قىزمەتىنىڭ اقپاراتىنا سۇيەنسەك، اتىراۋ قالاسىنداعى ءبىلىم-يننوۆاتسيا ليتسەي-ينتەرناتىنىڭ تۇلەگى ريزابەك الپامىس بيىل ۇ ب ت- دان ەڭ جوعارى 132 بال جيناعان.

ول وڭتۇستىك كورەياداعى Ulsan National Institute of Science and Technology UNIST ۋنيۆەرسيتەتىنە وقۋعا ءتۇستى.

وعان وڭتۇستىك كورەيانىڭ ەكى الدىڭعى قاتارلى عىلىمي-زەرتتەۋ جانە تەحنولوگيا ۋنيۆەرسيتەتى مەن گونكونگتاعى عىلىم جانە تەحنولوگيالار ۋنيۆەرسيتەتىنەن وقۋعا شاقىرتۋ كەلگەن.

بىلتىر ريزابەك الپامىس ەۋروپالىق فيزيكا وليمپياداسىنان كۇمىس، بيىل ازيا وليمپياداسىنان قولا مەدال العان.

ال، 2021-2022-جىلدارى حالىقارالىق فيزيكا وليمپياداسىنان ەكى مارتە كۇمىس مەدال، بيىل و. جاۋتىكوۆ اتىنداعى حالىقارالىق وليمپيادادان دا التىن مەدال يەمدەنگەن.

«ماقساتىم - جاڭا تەحنولوگيالاردى ويلاپ تابۋعا ءوز ۇلەسىمدى قوسۋ. قازاقستانداعى عىلىم مەن تەحنيكا سالاسىن دامىتۋعا اتسالىسسام دەگەن ويىم بار. بوس ۋاقىتىمدا باعدارلامالار قۇراستىرعاندى، فۋتبول ويناعاندى جاقسى كورەمىن. ءبىراق ۋاقىتىمنىڭ كوبىن عىلىممەن اينالىسۋعا ارنايمىن»، - دەيدى ول.

Ulsan National Institute of Science and Technology وقۋ ورداسى ءبىلىم دەڭگەيى بويىنشا الەمدەگى ەڭ مىقتى 200 ۋنيۆەرسيتەتتىڭ قاتارىنا كىرەدى.

ەندى بۇل ۋنيۆەرسيتەتتە ريزابەك الپامىسپەن بىرگە حالىقارالىق دودالاردا وزا شاۋىپ جۇرگەن نۇرداۋلەت حاجەنوۆ، ءادىل سۋلتانوۆ، ادىلەت زاۋىتحان ەسىمدى اتىراۋلىق تۇلەكتەر دە ءبىلىم الادى.

دۇنيەجۇزى بويىنشا نەبارى 15 تۇلەككە بەرىلەتىن گرانتتىڭ تورتەۋىن اتىراۋلىقتار يەلەنىپ وتىر.