مينۋتىنا 132 مىڭ ءسوز وقيتىن 15 جاستاعى قازاق قىزى جايلى نە بىلەمىز؟

  استانا. قازاقپارات - ادينا ماناتبەكوۆا - ەرەكشە دارىن يەسى. 15 جاستاعى قازاق قىزى مينۋتىنا 132 مىڭ ءسوز وقي الادى. ول از دەسەڭىز، وسى ۋاقىت ىشىندە وقىعان كىتابىنىڭ مازمۇنىن ايتىپ بەرە الادى.

ادينا ماناتبەكوۆا «ەۋرازيا» ارناسىنىڭ «كەشكى كەزدەسۋ» باعدارلاماسىنا قاتىستى. ادينا 2016 -جىلى 94 مىڭ ءسوزدى 90 پايىز تۇسىنۋمەن وقىپ، رەكورد جاساعان.

«مەن ەۋرازيالىق جىلدام وقۋ ورتالىعىندا ءبىلىم الدىم، ينتەنسيۆ كۋرسىن ءوتتىم. جىلدام وقۋدان اپتاسىنا 5 كۇن دايىندالدىم. بۇل مەنىڭ ءبىرىنشى جەتىستىگىم بولدى.

بۇدان كەيىن ەستە ساقتاۋ قابىلەتىمدى جاقسارتىپ، وقۋ جىلدامدىعىمدى ودان ءارى جاقسارتامىن دەپ شەشتىم. 2017 -جىلى 2- كۋرستى وقىپ شىقتىم. تامىز ايىندا ءوز رەكوردىمدى جاڭارتتىم. وقۋ جىلدامدىعىم - 132 مىڭ ءسوزدى 100 پايىز ءتۇسىنۋ كورسەتكىشىنە جەتتى»، - دەيدى قىز.

قازىرگى ۋاقىتتا ادينا ءبىلىمىن جەتىلدىرۋمەن اينالىسۋدا. سونداي- اق، جىلدام وقۋ كۋرسىن تاستاعان ەمەس.

ادينانىڭ جاتتىقتىرۋشىسى يننا ۆلاديمير قىزىنىڭ ايتۋىنشا، جىلدام وقۋ ءادىسىن كەز كەلگەن ادام مەڭگەرە الادى. ول ءۇشىن ىنتا مەن كوپ ەڭبەكتەنۋ كەرەك، - دەيدى ول.

«ادينا كەلگەن كەزدە مينۋتىنا 240 ءسوز وقي الاتىن. ونىڭ اتا- اناسى، اتاسى مەن اپاسى مۇعالىمدەر. اناسىنىڭ ءوزى ولاردى دايىندايدى. وتباسىندا ءۇش بالا بار. ول تاربيەگە دە، ادامنىڭ دا ىقىلاستىلىعىنا دا، اتا- اناسىنىڭ بالاعا كوڭىل اۋدارۋىنا دا بايلانىستى»، - دەيدى يننا ۆلاديمير قىزى.

15 جاستاعى تالانتتى قىز بولاشاقتا دارىگەر بولعىسى كەلەدى.

ەفير بارىسىندا ادينا 15 سەكۋند ىشىندە وزىنە ۇسىنىلعان كىتاپتىڭ 25 بەتىن وقىدى. ءارى كىتاپتا نە ايتىلعانىن مازمۇنداپ بەردى.

«بۇل كىتاپتان باقىتتىڭ كىلتى تۋرالى وقىدىم. ءسىزدىڭ ارماندارىڭىزدىڭ بارلىعى ورىندالۋى مۇمكىن. سول باقىتقا جاسالعان ءبىرىنشى قادام - وسى كىتاپتى ساتىپ الۋىڭىز. اۆتور ءوز ويىن جازعان. ونىڭ كىتابىن وقىعان ادامداردىڭ ءومىرى جاقسارعانى جايلى كوپ مىسالدار بارىن ايتىپ، كەڭەس بەرەدى»، - دەيدى ادينا.

Stan.kz