يرانداعى 130 ادام قازا تاپقان قاقتىعىسقا ستۋدەنتتەر دە قوسىلىپ جاتىر

استانا. قازاقپارات - ءالي حامەنەي شەرۋگە شىققاندارعا قارسى كۇش قولدانىپ جاتقان قاۋىپسىزدىك قىزمەتكەرلەرىن تولىق قولدايتىنىن ايتتى.

يراننىڭ رۋحاني جەتەكشىسى اياتوللا ءالي حامەنەي ەلدەگى شەرۋ مەن تارتىپسىزدىكتەرگە قاتىستى العاش رەت مالىمدەمە جاسادى. ونىڭ پىكىرىنشە، يسلام رەسپۋبليكاسىنىڭ ونداعان قالاسىندا وتكەن، 130 ادام قايتىس بولعان نارازىلىق اكسيالارىن ا ق ش پەن يزرايل ۇيىمداستىردى-مىس.

سونداي-اق ءالي حامەنەي شەرۋگە شىققاندارعا قارسى كۇش قولدانىپ جاتقان قاۋىپسىزدىك قىزمەتكەرلەرىن تولىق قولدايتىنىن ايتتى. سوڭعى مالىمەتكە قاراعاندا، قارسىلىق شاراسىنا تەگەراننىڭ شاريف اتىنداعى تەحنولوگيالىق ۋنيۆەرسيتەتىنىڭ ستۋدەنتتەرى دە قوسىلعان. ولاردى پوليتسەيلەر كوزدى جاساۋراتاتىن گازبەن تاراتىپ، 30 شاقتى ادامدى تۇتقىندادى.

ەسكە سالا كەتسەك، بۇل شەرۋ 22 جاستاعى ماحسا امينيدىڭ قازاسىنان كەيىن باستالعان. ول وتكەن ايدا تەگەراندا حيدجابتى دۇرىس تاقپادى دەگەن ايىپپەن تۇتقىندالىپ، پوليتسەيلەردىڭ كولىگىندە سوققىعا جىعىلىپ، كوماعا ءتۇسىپ، قايتىس بولدى دەگەن بولجام بار.

الايدا ءتارتىپ ساقشىلارىنىڭ ايتۋىنشا، اميني «كەنەتتەن جۇرەگى توقتاپ» ءجانتاسىلىم ەتكەن.

halyq-uni.kz