جاڭاوزەننەن قوستانايعا كوشەتىن 130 وتباسىن تابا الماي وتىرمىز – نوعايەۆ

None
None
نۇر- سۇلتان. قازاقپارات - جاڭاوزەننىڭ حالقى سولتۇستىك وڭىرلەرگە كوشۋگە قۇلىقسىز. ماڭعىستاۋ وبلىسىنىڭ اكىمى نۇرلان نوعايەۆ ورتالىق كوممۋنيكاتسيالار قىزمەتىندە وسىنداي مالىمەت ايتتى، دەپ حابارلايدى قازاقپارات ءتىلشىسى.

«جاڭاوزەن قالاسىنىڭ مىڭداعان حالىقتى اسىراۋ، لايىقتى جالاقىمەن قامتاماسىز ەتۋگە شاماسى جەتپەيتىنى تۋرالى ۋاجدەر بار. قالا تۇرعىندارى سولتۇستىك وڭىرلەرگە كوشۋگە قالاي قارايدى؟ ارنايى باعدارلاما جاساپ، ءتيىمدى جولدار ۇسىنۋ مەحانيزمدەرىن قاراستىرىپ جاتىرسىزدار ما؟»، - دەپ سۇرادى جۋرناليست بريفينگىدە.

«نەگىزى جاڭاوزەن قالاسى كەزىندە وسى اتتاس كەن ورنىنىڭ جانىنداعى ۆاحتالىق كەنت رەتىندە ۇيىمداستىرىلعان ەلدى مەكەن بولاتىن. ول جەردە جوسپار بويىنشا جاڭاوزەن كەنىشى مەن ماڭىنداعى كەن ورىندارىن يگەرۋ ءۇشىن ارى كەتسە، 60-70 مىڭ ادام تۇرۋى كەرەك. قازىرگى تاڭدا جاڭاوزەن قالاسىندا، قاسىنداعى ەلدى مەكەندەردە 160 مىڭنان استام ادام تۇرادى»، - دەدى نۇرلان نوعايەۆ.

ايتۋىنشا، قازىر مۇندا ينفراقۇرىلىمدى، جىلۋ، ەلەكتر جارىعىن جەتكىزۋ ماسەلەلەرى، ارينە، بىرتىندەپ شەشىلىپ كەلە جاتىر. دەگەنمەن، قالاداعى حالىقتىڭ ءبىر بولىگىن ەڭبەك كۇشى تاپشى وڭىرلەرگە كوشىرۋ ماسەلەسى ءالى دە وزەكتى.

«ءسىز ايتقانداي، ەڭبەك قولى ازداۋ جەرلەرگە كوشىرۋ جۇمىستارى ءجۇرىپ جاتىر. ءوز تاراپىمنان وسى مۇمكىندىكتى پايدالانىپ، اتالعان ماسەلەگە الاڭدايتىن ازامات رەتىندە وزىڭىزدەن، عالىمداردان، ساراپشىلاردان ۇتىمدى ۇسىنىستار ءتۇسىپ جاتسا، قاراۋعا ءازىر ەكەنىمدى ايتقىم كەلەدى. سولتۇستىككە كوشكىسى كەلەتىن ازاماتتاردىڭ كادىمگىدەي ءنوپىرى بار دەپ ايتا المايمىن. سەبەبى جاڭاوزەندە تابيعات جىلى. ول جەردەگى تۇرمىستىق جاعداي، كەيبىرەۋلەرىنىڭ جالاقىسى از بولعانىمەن اعايىن- تۋىسپەن توپتاسىپ تۇرۋدى ادەتكە اينالدىرعان ادامدار كوپ. جاڭاوزەندەگى 160 مىڭ ادامنىڭ 80 پايىزى ەلىمىزگە كەلگەن قانداستاردان قۇرالعان. مەنىڭ ويىمشا، پسيحولوگيالىق سەنىم بولۋ ءۇشىن جانە بۇرىن كوشىپ كەلگەن مەملەكەتتەرىندە توپتاسىپ ءومىر سۇرۋگە بەيىمدەلىپ قالعاندىقتان ءبىر- بىرىنە قولداۋ بولامىز دەگەن تۇسىنىكپەن الىسقا اجىراپ كەتكىسى كەلمەيتىن سياقتى»، - دەدى وبلىس اكىمى.

سونداي- اق، ول قازىر جاڭاوزەندىكتەردى وزگە وڭىرلەرگە كوشىرۋ جۇمىستارىنا قوعام بەلسەندىلەرى مەن قوعامدىق ۇيىمدار اينالىسىپ جاتقانىن اتادى.

«بۇل ءبىر كۇندىك شارۋا ەمەس. مىسالى، جاڭاوزەندە ءبىر كاسىپكەر قوستاناي وبلىسىنداعى 30 ەلدى مەكەنگە 130 وتباسى كوشىرىپ اپارعىسى كەلەتىنىن ايتىپ، ۇسىنىس قويدى. سول جاقتا جەرى بار ەكەن.

«الدىلارىنا مال سالىپ بەرەيىن. 7 جىلعا دەيىن ەشقانداي قايتارىم تالاپ ەتپەيمىن. ءۇي بەرەيىن، سول جەردە تۇرىپ جۇمىس ىستەسىن» دەگەن شارتىن قويدى. سول 100 ادامدى تابا الماي وتىرمىز. سولتۇستىككە كوشىرۋ جونىندەگى مەملەكەتتىك باعدارلاما كەزىندە ماڭعىستاۋدى دا قامتىدى. ول جەرگە بارعان ازاماتتاردىڭ ءبىرازى قالىپ، ءبىرازى كەرى قايتتى. اۋا رايىنىڭ قولايسىزدىعى، قىستىڭ سۋىقتىعى، گازدىڭ جوق بولۋى جاقپاعان»، - دەيدى ايماق باسشىسى.

ەسكە سالساق، كەشە ق ر ءماجىلىس دەپۋتاتى ەدىل جاڭبىرشين ۇكىمەت باسشىسى ءاليحان سمايىلوۆتىڭ اتىنا ماڭعىستاۋ وبلىسىنداعى ەڭبەك داۋلارى تۋرالى ساۋال جولداعان ەدى.

سوڭعى جاڭالىقتار