بيىل 130 مىڭعا جۋىق ستۋدەنت پەن دوكتورانتتىڭ شاكىرتاقىسى وسەدى
20 مامىر 13:45

بيىل 130 مىڭعا جۋىق ستۋدەنت پەن دوكتورانتتىڭ شاكىرتاقىسى وسەدى

نۇر- سۇلتان. قازاقپارات - بيىل 10 مىڭ ورىندىق 31 جاتاقحانا پايدالانۋعا بەرىلەدى. بۇل تۋرالى سەناتتاعى جاستاردى قولداۋ تاقىرىبىنا ارنالعان پارلامەنتتىك تىڭداۋدا پرەمەر- ءمينيستردىڭ ورىنباسارى ەرالى توعجانوۆ ءمالىم ەتتى، دەپ حابارلايدى قازاقپارات ءتىلشىسى.

«جاستارىمىزدىڭ تەگىن نەگىزدە جوعارى ءبىلىم الۋىنا مۇمكىندىكتەر كەڭەيتىلىپ جاتىر. 2025 -جىلعا قاراي مەملەكەتتىك ءبىلىم گرانتتارىن 50 پايىزعا ۇلعايتۋ جوسپارلانعان. ونىڭ ىشىندە مەكتەپ بىتىرەتىندەردىڭ ورتاشا كورسەتكىشى جالپى رەسپۋبليكالىق دەڭگەيدەن تومەن وڭىرلەردىڭ جاستارىنا وزگە وڭىرلەردەگى ۋنيۆەرسيتەتتەردە ءبىلىم الۋى ءۇشىن بيىل العاش رەت ماقساتتى 10 مىڭ گرانت بولىنەدى»، - دەدى ە. توعجانوۆ.

ونىڭ ايتۋىنشا، بۇل اتالعان ءوڭىر جاستارىنىڭ ءبىلىمىن لايىقتى دەڭگەيدە قامتاماسىز ەتۋگە باعىتتالعان جۇيەلى شەشىم.

«2025 -جىلعا دەيىن ستۋدەنتتەر ستيپەندياسى جىل سايىن %20- عا، ال ماگيسترانتتار مەن دوكتورانتتار ستيپەندياسى %15- عا ارتادى. بۇل جالپى 130 مىڭعا جۋىق ستۋدەنت، دوكتورانتتى قامتيدى»، - دەدى ۇكىمەت باسشىسىنىڭ ورىنباسارى.

«ستۋدەنت جاستار ءۇشىن وزەكتى ماسەلەلەردىڭ ءبىرى جاتاقحانا تاپشىلىعى. ونى جۇيەلى شەشۋ ماقساتىندا سوڭعى 3 جىلدا 30 مىڭ ورىن بەرىلدى. بيىل 10 مىڭ ورىندىق 31 جاتاقحانا پايدالانۋعا بەرىلەدى»، - دەدى ول.

بۇدان بۇرىن حابارلانعانداي، سەنات ءتوراعاسى م. اشىمبايەۆ بارلىق رەفورمانىڭ تۇپكى ماقساتى جاستاردىڭ ءال- اۋقاتىن ارتتىرۋعا ءارى ولاردىڭ دامۋىنا جاعداي جاساۋعا ارنالعانىن اتاپ ءوتتى. سونىمەن قاتار ول ۋنيۆەرسيتەت بىتىرگەن تۇلەكتەرگە ەڭبەك نارىعىندا سۇرانىس جوق ەكەنىن ايتتى.

اۆتور: رۋسلان عابباسوۆ


جاڭالىقتار