قازاقستاندا اڭشىلاردىڭ سانى 130 مىڭعا جۋىقتادى
«قازىرگى كەزدە قازاقستاندا جالپى اڭشىلاردىڭ سانى 130 مىڭعا جۋىق. ولاردىڭ كوبىسى اڭشىلىق ۇيىمداردا تىركەلىپ، كۋالىكتەرىن الادى. سودان كەيىن اڭشىلىق شارۋاشىلىقتارعا بارىپ، ءتيىستى كەزەڭدە اڭنىڭ تۇرىنە قاراي ليتسەنزيانى ساتىپ الىپ، اڭعا شىعادى. بۇل رەتتە ولاردى شارۋاشىلىقتارداعى قورىقشىلار باقىلاپ جۇرەدى»، - دەدى ول قازاقپارات اگەنتتىگىنە بەرگەن جاۋابىندا.
ونىڭ سوزىنە قاراعاندا، بۇگىندە 29 ميلليون گەكتار اۋماقتا 701 اڭشىلىق شارۋاشىلىق جۇمىس ىستەپ تۇر.
«سونىڭ ىشىندە 18 شارۋاشىلىق ينتەراڭشىلىقپەن (اڭشىلىق تۋريزم) اينالىسادى، ياعني شەتەل ازاماتتارى كەلەدى. جالپى، اتالعان شارۋاشىلىقتارداعى كىرىس ورتا دەڭگەيدە، الايدا جىل سايىن ءوسىم بايقالىپ كەلەدى»، - دەدى س. دىلداحمەت.
وسى ورايدا ول شەتەل ازاماتتارى ەلىمىزدەگى تاۋلى وڭىرلەردە اڭعا شىققاندى قالايتىنىن اتاپ ءوتتى.
«2017 -جىلى زاڭعا ءتيىستى وزگەرتۋلەر قاراستىرىلىپ، «فەرمەرلىك اڭشىلىق شارۋاشىلىعى» تۇسىنىگى ەنگىزىلدى. بۇل تۇرعىدا شارۋاشىلىقتارعا فەرمەرلىك تۇردە اڭدى ءوسىرىپ، اڭشىلىق ۇيىمداستىرۋعا مۇمكىندىك بەرىلەدى. وسى رەتتە اڭداردى وزدەرى ءوسىرىپ، مۇمكىندىگىنشە تابيعاتتا جۇرگەن جانۋارلار سانىن ازايتپاۋعا قادام جاسالدى»، - دەدى باسپا ءسوز حاتشىسى.
اۆتور: رۋسلان عابباسوۆ