جامبىل وبلىسىندا 1300 دەن اسا ادامعا شاعىن نەسيە بەرىلمەك

None
None
تاراز. قازاقپارات - جامبىل وبلىسىندا بيىل بارلىعى 1300 دەن استام ادامعا جالپى 6147,6 ميلليون تەڭگەنىڭ شاعىن نەسيەسى بەرىلەدى دەپ جوسپارلانعان.

بۇل رەسپۋبليكا بويىنشا باسقا وڭىرلەرمەن سالىستىرعاندا الدىڭعى كورسەتكىشتەردىڭ ءبىرى، دەپ حابارلايدى قازاقپارات ءتىلشىسى.

سونداي-اق، اعىمداعى جىلدىڭ قاراشا ايىنان وبلىس تۇرعىندارىنا شاعىن نەسيە بەرۋگە قوسىمشا رەسپۋبليكالىق بيۋدجەتتەن تاعى 2 ميلليارد تەڭگە ءبولىنىپ وتىر. ال، بۇل قارجىلاردىڭ يگەرىلۋى قاي دەڭگەيدە؟ تۇرعىنداردىڭ شاعىن نەسيەگە قول جەتكىزۋ بارىسى جۇيەلى ما؟ ول تۋرالى وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ توعىز ايلىق ەسەبىندە جان- جاقتى ايتىلدى. ەسەپتىك جيىندا وبلىس اكىمى اسقار مىرزاحمەتوۆكە اتالعان باسقارما باسشىسى تيمۋرجان نۇرىمبەتوۆ العاشقى ءۇش توقسانداعى اتقارىلعان جۇمىستاردى باياندادى.

باسقارما باسشىسى بيىلعى توعىز ايدا اۋىل بويىنشا 885 ادام 3797,3 ميلليون تەڭگەنىڭ، قالا بويىنشا 24 ادام 1070,3 ميلليون تەڭگەنىڭ شاعىن نەسيەسىنە قول جەتكىزگەنىن ايتىپ، جىل سوڭىنا دەيىن كوزدەلگەن مەجە تولىعىمەن ورىندالاتىنىنا سەندىردى.

«ايتا كەتەيىك، بۇگىنگى تاڭدا جالپى حالىقتى جۇمىسپەن قامتۋ شارالارى بۇگىنگى تاڭدا «ەڭبەك» باعدارلاماسى اياسىندا جۇزەگە اسىرىلۋدا. اعىمداعى جىلى بۇل باعدارلاما بويىنشا رەسپۋبليكالىق بيۋدجەتتەن 7,4 ميلليارد تەڭگە، جەرگىلىكتى بيۋدجەتتەن 4,2 ميلليارد تەڭگە قاراستىرىلعان. ناتيجەسىندە توعىز ايدا جۇمىسپەن قامتۋدىڭ بەلسەندى شارالارىنا 30504 ادام تارتىلىپ، جىلدىق جوسپار ازىرگە 86 پايىزعا ورىندالىپ وتىر. سونىمەن قاتار، ەسەپتى كەزەڭدە جۇمىسپەن قامتۋ ورتالىقتارىنىڭ جولداماسىمەن 20640 ادام جۇمىسپەن قامتىلسا، ونىڭ ىشىندە 14210 ادام تۇراقتى نەگىزدە ورنالاسقان»، - دەدى تيمۋرجان نۇرىمبەتوۆ.

اسقار مىرزاحمەتوۆ شاعىن نەسيەلەردى شىن مانىندەگى قاجەتتى جوبالارعا جۇمساۋدىڭ ماڭىزدىلىعىن ەسكەرتىپ، ول بويىنشا جاۋاپتى تۇلعالارعا ءاربىر اۋداننىڭ الەۋەتى مەن سۇرانىسىن بارلاپ، كارتا ازىرلەپ، ارنايى بازانى قالىپتاستىرۋدى تاپسىردى. سونداي-اق، بۇل باعىتتا اۋىلداعى قاراپايىم حالىقتى بارىنشا حاباردار ەتۋ جۇمىستارى ءالى دە ءالسىز ەكەنىن اشىپ ايتىپ، تۇرعىنداردىڭ تۇرمىسىن ارتتىرۋ جولىندا بار شارالاردى قولعا الۋدى جۇكتەدى. ءوڭىر باسشىسى قىسقا مەرزىمدى كاسىپتىك وقىتۋ كۋرستارىن وڭتايلاندىرۋدى، اسىرەسە، سۇرانىسقا ساي ماماندىقتارعا باسىمدىق بەرۋ كەرەكتىگىنە كوڭىل ءبولىپ، ءتيىستى تۇلعالارعا بۇل تۇرعىداعى باقىلاۋ شارالارىن قاتاڭداتۋدى مىندەتتەدى.

باسقوسۋدا باسقا دا جوسپارلى كورسەتكىشتەر مەن مەجەلى مىندەتتەردىڭ ورىندالۋ بارىسى قارالىپ، جۇمىسى سىلبىر اۋدان مەن قالا باسشىلارى سىنعا الىندى. اتاۋلى الەۋمەتتىك كومەكتىڭ تاعايىندالۋى، بارلىق اۋدانداردا مۇگەدەك بالالاردى وڭالتۋ ورتالىقتارىن قۇرۋ بويىنشا بەرىلگەن تاپسىرمالاردىڭ ورىندالۋى سۇرالدى. سونىمەن قاتار، جاڭا بيزنەس- يدەيالاردى ىسكە اسىرۋعا گرانتتار بەرۋ، جاستار پراكتيكاسى، اقىلى قوعامدىق جۇمىسقا تارتۋ، مۇگەدەكتەردى الەۋمەتتىك قورعاۋ بويىنشا جاسالىنىپ جاتقان جۇمىستار جايى سارالاندى.

ايماق باسشىسى، اتاۋلى الەۋمەتتىك كومەكتىڭ تاعايىندالۋىندا كەتكەن كەمشىلىكتەردى جويۋعا ايرىقشا نازار اۋدارىپ، ەكىنشى رەت ونداي كەلەڭسىزدىككە جول بەرمەۋ ءۇشىن باقىلاۋ مەن بارلاۋدى كۇشەيتۋدى تاپسىردى. سونداي- اق ءتيىستى كومەك شىنايى مۇقتاجدارعا ۇلەستىرىلۋ كەرەكتىگىن باسا ايتتى.

اۆتور: عيبرات سەمباي

سوڭعى جاڭالىقتار