استانادا 13-قاباتتان قۇلاۋعا شاق قالعان 6 جاسار بالا قۇتقارىلدى
كەشە ساعات 13.57-دە 112 پۋلتىنە قۇدايبەردى ۇلى كوشەسى، 25/1 ءۇيدىڭ تەرەزەسىندە كىشكەنتاي بالانىڭ قاۋىپتى جاعدايدا تۇرعانى تۋرالى حابار كەلىپ ءتۇستى. قۇتقارۋ قىزمەتىنە جولاي ءوتىپ بارا جاتقان ادامدار حابارلاسقان.
«شاقىرتۋ ورنىنا تەز ارادا ءورت ءسوندىرۋ قىزمەتى مەن جەدەل- قۇتقارۋ جاساعى كەلدى. كەلگەن بويدا ولار «ستەپنوي-1» تۇرعىن ءۇي كەشەنىنىڭ 13-قاباتىندا جابىق پاتەردىڭ تەرەزەسىندە بالا تۇرعانىن انىقتادى. قۇتقارۋشىلار ەسىكتى اشىپ، ۇلكەندەر قاراۋسىز قالدىرعان 2013 -جىلى تۋعان بالانى قۇتقاردى. بالا پوليتسيا دەپارتامەنتىنىڭ قىزمەتكەرلەرىنە بەرىلدى» دەلىنگەن حابارلامادا.
بۇل ىسكە نۇر-سۇلتان قالالىق ت ج د جەكە قۇرامىنان 6 ادام مەن 2 تەحنيكا جانە قالانىڭ شۇعىل قىزمەتتەرى جۇمىلدىرىلدى.
قالالىق ت ج د اتا-انالاردىڭ بارىنشا اباي بولۋىن وتىنەدى.
«جاس بالالاردى ەشقانداي جاعدايدا قاراۋسىز قالدىرماۋ كەرەك. تەك وسىلاي عانا ءبىز ەڭ كىشكەنتاي، قورعانسىز جانە اسا قىمبات ادامداردىڭ ءومىرىن ساقتاپ قالا الامىز» دەيدى ۆەدومستۆودان.