قازاقستان كوروناۆيرۋسپەن كۇرەسكە 13,5 ميلليارد دوللار ءبولدى دەگەن اقپارات جالعان - قارجى ءمينيسترى
«ينتەرنەتتە كەيبىر بلوگەرلەر قازاقستانىڭ كوروناۆيرۋسپەن كۇرەسكە 13,5 ميلليارد دوللار جۇمساعاندىعىن جازىپ، ءبىرشاما از قاراجات بولىنگەن كورشى ەلدەردىڭ كەيبىرىمەن سالىستىرۋدا. بۇل مۇلدەم قاتە اقپارات ەكەندىگىن ايتقىم كەلەدى. كوروناۆيرۋسپەن كۇرەسكە نەمەسە ىندەتكە قارسى شارالارعا رەسپۋبليكالىق بيۋدجەتتەن شامامەن 150 ميلليارد تەڭگە نەمەسە دوللارعا شاققاندا 350 ميلليون دوللار ءبولىندى» ، - دەدى ءبىرىنشى ۆيتسە- پرەمەر ۇكىمەت ۇيىندە وتكەن بريفينگتە.
ونىڭ تۇسىندىرۋىنشە، اتالعان سوما داعدارىسقا قارسى شارالاردى جۇزەگە اسىرۋعا باعىتتالعان 5,9 تريلليون تەڭگەنىڭ ىشىنە كىرەدى.
«بۇل - جۇمىسپەن قامتۋ، الەۋمەتتىك تولەمدەر، بيزنەستى قولداۋ، كاسىپكەرلەردى جەڭىلدىكپەن كرەديتتەۋ، تۇرعىن ءۇي قۇرىلىسى جانە باسقالارى. بۇل قاراجات جىل بويىنا جوسپارلانعان. ماسەلەن، بيزنەستى جەڭىلدىكپەن كرەديتتەۋگە 1 تريلليون تەڭگە جۇمسالادى. بۇل قايتارىلاتىن قاراجات، بيزنەسكە تومەنگى مولشەرلەمەمەن كرەديت تۇرىندە بەرىلەدى»، - دەدى ول.
ءاليحان سمايىلوۆتىڭ ايتۋىنشا، «جۇمىسپەن قامتۋ جول كارتاسىن» جۇزەگە اسىرۋعا 1 تريلليون تەڭگە باعىتتالادى. ونىڭ 300 ميلليارد تەڭگەسى بيۋدجەت، ال قالعانى بيۋدجەتتەن تىس قاراجات سانالادى. بۇل قاراجاتقا الەۋمەتتىك نىسانداردى، تۇرعىن ءۇي- كوممۋنالدىق شارۋاشىلىق نىساندارىن، ينجەنەرلىك ينفراقۇرىلىمدار سالۋعا جانە جوندەۋگە، ەلدى مەكەندەردى اباتتاندىرۋعا جۇمسالادى. 255 مىڭ جۇمىس ورنى قۇرىلادى.
«ياعني، ۇكىمەت باعىتتاپ وتىرعان قاراجاتتىڭ بارلىعى وسى جىل بويى جاراتىلادى. ونىڭ الەۋمەتتىك- ەكونوميكالىق ماڭىزى زور جانە حالىقتى جۇمىسپەن قامتۋعا، ولاردىڭ كىرىسىن ساقتاۋعا جانە ەلدىڭ ىسكەرلىك بەلسەندىلىگىن قولداۋعا مۇمكىندىك بەرەدى»،- دەدى ءاليحان سمايىلوۆ.