قازاقستاندىقتار زەينەتاقى قورىنا 13,4 تريلليون تەڭگە جيناعان
بۇل تۋرالى قازاقپارات قوردىڭ رەسمي سايتىنا سىلتەمە جاساپ حابارلايدى.
«2022-جىلدىڭ 1- شىلدەسىندەگى جاعداي بويىنشا، ءبىرىڭعاي جيناقتاۋشى زەينەتاقى قورى سالىمشىلارىنىڭ شوتتارىندا 13,4 تريلليون تەڭگە زەينەتاقى جيناقتارى قالىپتاسىپ، بىلتىرعىمەن سالىستىرعاندا ءوسىم 616 ميلليارد تەڭگەنى قۇرادى. زەينەتاقى جيناقتارىنىڭ نەگىزگى بولىگى مىندەتتى زەينەتاقى جارنالارى ەسەبىنەن تۇسكەن - 13 تريلليون تەڭگە بولدى. مىندەتتى كاسىپتىك زەينەتاقى جارنالارى بويىنشا زەينەتاقى جيناقتارى 2021-جىلدىڭ 1- شىلدەسىنەن بەرى %19 كوبەيىپ، 394,3 ميلليارد تەڭگەگە، ەرىكتى زەينەتاقى جارنالارىنىڭ كولەمى شامامەن 2,7 ميلليارد تەڭگەگە جەتتى. بۇل رەتتە ەرىكتى زەينەتاقى جيناقتارى بويىنشا كورسەتكىش وتكەن جىلمەن سالىستىرعاندا %48 ارتتى»، - دەپ جازىلعان رەسمي مالىمەتتە.
قوردىڭ دەرەگىنەن سەنسەك، سالىمشىلاردىڭ 2021-جىلدىڭ 1- شىلدەسىنەن بەرگى تازا ينۆەستيتسيالىق كىرىسى 338 ميلليارد تەڭگەدەن اسقان.
«جىل باسىنان بەرى ب ج ز ق ءوز سالىمشىلارىنا 984,2 ميلليارد تەڭگە تولەدى. ونىڭ باسىم بولىگى تۇرعىن ءۇي جاعدايىن جاقسارتۋ جانە ەمدەلۋ ماقساتتارىنا ارنالعان ءبىرجولعى زەينەتاقى تولەمدەرى - 849,4 ميلليارد تەڭگە»، - دەلىنگەن قوردىڭ مالىمەتىندە.