اقتاۋدا 12-جازعى ۋنيۆەرسيادا باستالدى
اقتاۋدا العاش رەت ۇيىمداستىرىلىپ جاتقان ۋنيۆەرسياداعا قاتىسۋشىلار 17 سپورت تۇرىنەن ءوزارا باسەكەگە تۇسەدى. سپورتتىق سايىستار الدىندا مانداتتىق كوميسسيا تۇراقتى جۇمىسىن جۇرگىزەدى. ءار ويىننىڭ اشىلۋ سالتاناتى ءوتىپ، سايىس تۇرلەرى اياقتالىسىمەن، اقپاراتتىق اشىقتىق ماقساتىندا ب ا ق وكىلدەرى ءۇشىن ارنايى بريفينگ ۇيىمداستىرىلادى.
ال، 12-جازعى ۋنيۆەرسيادانىڭ سالتاناتتى اشىلۋ ءىس-شاراسى 5- ماۋسىم كۇنى «ماڭعىستاۋ- ارەنا» سپورت كەشەنىندە وتەدى. اۋقىمدى سپورت دوداسىنىڭ اشىلۋ شاراسىنا 20 مىڭنان استام ستۋدەنت جينالماق.
بۇل جولعى ۋنيۆەرسيادانىڭ باستى ەرەكشەلىگى - سان الۋان سپورت تۇرلەرىنەن سايىستار ءبىر ءوڭىر اۋماعىندا عانا وتەدى.
«12-جازعى ۋنيۆەرسيادا ويىندارىندا ءبىرىنشى ورىن العان سپورتشىلار 28- شىلدە مەن 8- تامىز ارالىعىندا قىتايدىڭ چەندۋ قالاسىندا وتەتىن دۇنيەجۇزىلىك ۋنيۆەرسياداعا جولداما الادى. چەندۋ قالاسىنا باراتىندار ۇستەل تەننيسى، دزيۋدو، ءجۇزۋ، تاەكۆوندو جانە جەڭىل اتلەتيكا سىندى سپورت تۇرلەرى بويىنشا ىرىكتەلەدى»، - دەدى ق ر وقۋ-اعارتۋ مينيسترلىگى سپورتتىق ءىس-شارالار، ستاتيستيكا جانە تالداۋ باسقارماسىنىڭ باسشىسى ميرا مۇحاماديەۆا.
تەننيسشىلەر تارتىستى ويىندارىمەن ۋنيۆەرسيادا جارىسىن ءبىرىنشى باستادى. سايىسقا 16 ەرلەر كومانداسىنان 48 سپورتشى، ايەلدەر اراسىندا 15 كوماندادان 45 سپورتشى قاتىسىپ جاتىر. ۇستەل تەننيسىنىڭ قورىتىندىسى 29- ماۋسىمدا بەلگىلى بولادى.
