USD 434.48 EUR 492.61
RUB 5.68 CNY 68.44
جاڭالىقتار

اياق ءسىڭىرى تارتىلۋىنىڭ 12 سەبەبى

9 جەلتوقسان 13:54
:ءبولىسۋ
اياق ءسىڭىرى تارتىلۋىنىڭ 12 سەبەبى

نۇر -سۇلتان. قازاقپارات - اياق ءسىڭىرىنىڭ تارتىلۋى ءجيى كەزدەسەتىن جاعداي، اسىرەسە، ول تۇندە مازالايدى.

اياق بۇلشىقەتتەرى ەرىكسىز جيىرىلادى جانە اۋىرادى. ول نەلىكتەن پايدا بولادى؟ سەبەپتەرىن ءبىلۋ ارقىلى ونىڭ الدىن الۋعا بولادى.

سۋدى از ءىشۋ

سۋدىڭ جەتىسپەۋى بۇلشىقەتتەر قۇرىسۋىن شاقىرادى. قارقىندى فيزيكالىق جاتتىعۋلار مەن قورشاعان ورتانىڭ جوعارى تەمپەراتۋراسى اعزانىڭ سۋسىزدانۋىنا ىقپال ەتەدى. سونداي- اق كۇنى بويى تازا سۋدىڭ ورنىنا كوفە، شاي نەمەسە سۋسىن ءىشىپ ءجۇرۋ دە سۋسىزدانۋعا اكەلەدى. ەگەر اياق ءسىڭىرى ءتۇيىلۋىنىڭ سەبەبى اعزانىڭ سۋسىزدانۋىندا بولسا، كۇنىنە 8 ستاقان سۋ ءىشۋ كەرەك.

بۇلشىقەتتەرگە كۇش ءتۇسىرۋ

اۋىر جاتتىعۋلاردى بۇرىننان بۇلشىقەتتەر قۇرىسۋىمەن بايلانىستىرادى. قاڭقالىق بۇلشىقەتتەرگە ارتىق كۇش ءتۇسىرۋ جانە شارشاڭقىلىق ارتىق كۇش تۇسىرىلگەن بۇلشىقەت تالشىقتارىنىڭ تۇيىلۋىنە اكەلۋى مۇمكىن. سول ءۇشىن دە اياق ءسىڭىرىنىڭ ءتۇيىلۋى كاسىبي سپورتشىلاردىڭ اراسىندا كەڭ تاراعان. سۇيىقتىق كوپ ءىشۋ ونىڭ پايدا بولۋ مۇمكىندىگىن ازايتقانىمەن، شامادان تىس جۇكتەمە كەزىندە اياق ءسىڭىرىنىڭ ءتۇيىلۋىن بودىرماۋدىڭ تانىلعان ءادىسى جوق.

اعزاعا ەلەكتروليتتەردىڭ جەتپەۋى

بۇلشىقەتتەر ءبىرقالىپتى جيىرىلۋى ءۇشىن قاندا ەلەكتروليتتەر (كالي مەن كالتسي) تەپە- تەڭدىگى بولۋى كەرەك. ەگەر بۇل مينەرالداردىڭ دەڭگەيى وزگەرىپ كەتسە، بۇلشىقەتتەر قىسىلۋىنا ىقپال ەتۋى مۇمكىن. جەمىستەر مەن كوكونىستەردى كۇندەلىكتى جەۋ مينەرالدى زاتتاردىڭ دەڭگەيىن تەپە- تەڭدىكتە ۇستاۋعا كومەكتەسەدى. سونداي-اق ەلەكتروليتتەر تەپە- تەڭدىگىن ساقتاۋ ءۇشىن دارىگەرمەن كەڭەسىپ، ارنايى پرەپاراتتار ىشۋگە بولادى.

ناتري جەتىسپەۋى

ناتريدىڭ از بولۋى بۇلشىقەتتەردىڭ اۋىرىپ قۇرىسۋىنا اسەر ەتەدى جانە كۇيزەلىس گورمونىنىڭ ارتۋىنا اكەلەدى. سوندىقتان ءناتريدىڭ نەگىزگى كوزى - تۇزدان مۇلدەم باس تارتۋدىڭ قاجەتى جوق.

قالقانشا بەز جۇمىسىنىڭ پروبلەماسى

ەگەر اياعىڭىزدىڭ ءسىڭىرى ءجيى تۇيىلسە، مىندەتتى تۇردە قالقانشا بەزدى تەكسەرتىپ الۋ كەرەك. ەگەر ول دۇرىس جۇمىس ىستەمەسە، اياق قۇرىسۋى باسقا ءبىر اۋرۋدىڭ (مىسالى، گيپەرتيرەوز) بەلگىسى بولۋى مۇمكىن.

جاس ەرەكشەلىگى وزگەرىسى

اياق ءسىڭىرى ءتۇيىلۋىنىڭ تاعى ءبىر سەبەبى - قارتايۋ بولۋى دا مۇمكىن. ادام قوزعالىس نەيروندارىن جوعالتا باستاعاندا بۇلشىقەتتەر ءجيى قۇرىسا باستايدى. بۇل 50 جاستاعى نەمەسە ودان اسقان ادامدارعا ءتان. زەرتتەۋلەر كۇشتىك جاتتىعۋلار مەن تەپە- تەڭدىككە ارنالعان جاتتىعۋلار بۇلشىقەتتەردىڭ جانە جۇيكە جۇيەسىنىڭ جۇمىسىن ساقتاۋعا كومەكتەسەتىنىن كورسەتكەن.

از قوزعالىستى ءومىر سالتى

وتىرىڭقى جۇمىس جانە قوزعالىستىڭ بولماۋى بۇلشىقەتتەر يىلگىشتىگى مەن ۇزىندىعىنىڭ جانە اياق ءسىڭىرىنىڭ قىسقارۋىنا ىقپال ەتۋى مۇمكىن. بەلسەندىلىكتىڭ بولماۋى لايىقتى تۇردە سوزىلۋىنا مۇمكىندىك بەرمەيدى، سوندىقتان ول اياق ءسىڭىرىنىڭ تۇيىلۋىنە اكەلەدى. كۇنىنە ەڭ بولماعاندا جارتى ساعات سوزىلۋعا جانە وتىرىپ- تۇرۋ جاتتىعۋىنا ۋاقىت ءبولۋ كەرەك.

ىڭعايسىز قالىپتا ۇيىقتاۋ

ىشپەن جاتىپ ۇيىقتاساڭىز، تابان بۇگىلۋ قالپىندا بولادى. ءباشايلار ارى قاراپ جاتقاسىن بالدىر بۇلشىقەتىنىڭ قۇرىسۋى بولادى. تابان بۇل قالىپتا ۇزاق ساقتالسا، كەز كەلگەن قوزعالىس اياق ءسىڭىرىنىڭ تۇيىلۋىنە اكەلەدى.

«ەكى اياقتا» جۇمىس ىستەۋ

كۇنى بويى تۇرىپ جۇمىس ىستەيتىن ادامداردىڭ اياقتارى ءجيى تارتىلادى. ادام ۇزاق ۋاقىت ءبىر ورىندا تۇرسا جانە قوزعالماسا، قان مەن سۋ دەنەنىڭ تومەنگى بولىگىنە جينالىپ قالادى. ول سۇيىقتىقتىڭ تەڭسىزدىگىنە، سونداي-اق بۇلشىقەتتەر مەن سىڭىرلەردىڭ قىسقارۋىنا اكەلۋى مۇمكىن. سوندىقتان كوپ ۋاقىتىڭىزدى ەكى اياقتا وتكىزەتىن بولساڭىز، مىندەتتى تۇردە قوزعالۋعا تىرىسىڭىز. مىسالى: اياقتىڭ ۇشىمەن تۇرىپ، قايتا جەرگە ءتۇسۋ.

دارىلەر ءىشۋ

كەي دارىلىك پرەپاراتتار اياق تارتىلۋىن شاقىرادى. مىسالى، جوعارى قان قىسىمىنا ارنالعان دارىلەردىڭ نەسەپ ايدايتىن قاسيەتى بار، سوندىقتان اعزاداعى سۋ مولشەرى ازايىپ قالادى. دەمىكپە كەزىندە ىشەتىن دارىلەردى ۇزاق ۋاقىت بويى ىشسە، تۇندە اياق ءسىڭىرىنىڭ تۇيىلۋىنە اكەلەدى.

جۇكتىلىك

جۇكتى ايەلدەردىڭ كوپشىلىگىنە بۇل جاعىمسىز سەزىم تانىس. ول سالماقتىڭ ارتۋىمەن جانە قان اينالىمنىڭ بۇزىلۋىمەن بايلانىستى. سونداي- اق جۇكتى ايەلدىڭ اعزاسىنا ماگني مەن ۆ6 دارۋمەنى جەتىسپەسە دە، اياق ءسىڭىرى تارتىلۋى مۇمكىن.

سوزىلمالى اۋرۋلار

ديابەت، گيپەرتونيا، ارتريت، نەۆرولوگيالىق اۋرۋلار جانە دەپرەسسيا سەكىلدى سوزىلمالى اۋرۋلاردىڭ سەبەبىنەن دە اياق ءسىڭىرىنىڭ ءتۇيىلۋى بولادى. ونىڭ سەبەبى كەيدە سول اۋرۋلاردى ەمدەۋ ءۇشىن ىشكەن دارىلەرگە بايلانىستى. ال باسقا جاعدايلاردا (ديابەت پەن نيەۆرولوگيالىق اۋرۋلار كەزىندە) جۇيكە جۇيەلەرى جۇمىسىنىڭ بۇزىلۋى ىقپال ەتەدى.



massaget.kz


:ءبولىسۋ
سونداي-اق... وقىڭىز
پئكئر قالدئرؤ
+7
جئبةرؤ
ونلاين قىزمەتكەرلەر
رەداكتور
كۇنسۇلتان وتارباي
كۇنسۇلتان وتارباي
954-049

مۇراعات