قازاقستاندا سوڭعى اپتادا 12 كىسى ءولتىرۋ قىلمىسى اشىلدى

None
None
نۇر- سۇلتان. قازاقپارات - ەلىمىزدە وتكەن اپتا ىشىندە 12 ادام ءولتىرۋ قىلمىسى اشىلدى. بۇل تۋرالى ق ر ىشكى ىستەر مينيسترلىگىنىڭ وكىلى شۇعىلا بەرىك قىزى ءمالىم ەتتى، دەپ حابارلايدى قازاقپارات ءتىلشىسى.

«وتكەن اپتادا ەل اۋماعىندا 3226 قىلمىس جاسالدى، ونىڭ 2225- ءى تاۋلىك ىشىندە اشىلدى. پوليتسيا قىزمەتكەرلەرى «ءىزىن سۋىتپاي» 12 كىسى ءولتىرۋدى، 8 ولىمگە اكەپ سوققان دەنساۋلىققا قاساقانا اۋىر زيان كەلتىرۋدى، 2 قاراقشىلىق، 44 توناۋ جانە 466 بوتەن مۇلىكتى ۇرلاۋ قىلمىسىن اشتى»، - دەدى ش. بەرىك قىزى ءى ءى م- دە ونلاين وتكەن باسپا ءسوز ءماسليحاتىندا.

ودان بولەك، باسپا ءسوز ءماسليحاتىندا ەلدەگى تۇرمىستىق زورلىق- زومبىلىق ماسەلەسى كوتەرىلدى. مينيسترلىك وكىلىنىڭ ايتۋىنشا، اتالعان پروبلەماعا قاتىستى زاڭناما 2009 -جىلى قابىلدانىپ، سودان بەرى وعان 12 مارتە تولىقتىرۋ مەن وزگەرتۋلەر ەنگىزىلدى. ءوز كەزەگىندە ق ر ءى ءى م اكىمشىلىك پوليتسيا كوميتەتى ءتوراعاسىنىڭ ورىنباسارى الەكسەي ميليۋك ەلىمىزدە تۇرمىستىق زورلىق- زومبىلىققا قاتىستى جاۋاپكەرشىلىكتىڭ كۇشەيتىلەتىنىن ايتتى.

«قولدانىستاعى زاڭناماعا سايكەس، قۇقىق قورعاۋ ورگاندارى اكىمشىلىك ءىستى زارداپ شەگۋشىنىڭ ءوتىنىشىنسىز دە جۇرگىزە الادى. دەگەنمەن، وتباسىلىق زورلىق- زومبىلىق كورگەن ايەل، ياعني زارداپ شەگۋشى، كوپ جاعدايدا كۇيەۋىنە پسيحولوگيالىق، قارجىلىق جاعىنان تاۋەلدى بولعاندىقتان ماسەلەنى ۋشىقتىرعىسى كەلمەي، تاتۋلاسۋعا كەلىسىمىن بەرەدى. وتكەن جىلى بىزگە ەل بويىنشا تۇرمىستىق زورلىق- زومبىلىق قۇربانىمىن دەپ جازىلعان 190 مىڭ ءوتىنىش كەلىپ ءتۇستى. سونىڭ تورتتەن ءبىرى عانا سوتقا دەيىنگى تەرگەۋگە جىبەرىلدى. جالپى، زورلىق- زومبىلىققا قاتىستى اكىمشىلىك ءىس جۇرگىزۋدىڭ 60 پايىزى ەكى جاقتىڭ تاتۋلاسۋىنا بايلانىستى توقتايدى. وسى ورايدا ءبىز تۇرمىستىق زورلىق- زومبىلىق ورىن العان جاعدايدا ەكى جاقتىڭ تاتۋلاسۋ پروتسەسىن قايتا قاراۋدى قولعا الىپ جاتىرمىز. ياعني، الداعى ۋاقىتتا كۇيەۋى تاراپىنان ايەلىنە قول كوتەرۋ قايتالانعان جاعدايدا تاتۋلاسۋعا رۇقسات بەرمەۋ جوسپاردا بار»، - دەيدى ول.

اۆتور: ءالي يبرايەۆ

سوڭعى جاڭالىقتار