ۇيگە قايتۋعا قورىققان: الماتىدا جوعالىپ كەتكەن 12 جاسار قىز كوشەدە تۇنەپ شىقتى
كەشكى ساعات سەگىز شاماسىندا پوليتسياعا كامەلەتكە تولماعان قىزدىڭ جوعالىپ كەتكەنى تۋرالى حابارلاما كەلىپ تۇسكەن. بالانىڭ اتا-اناسىنىڭ ايتۋىنشا، ساعات تورتتەردە ول دۇكەنگە بارىپ، سودان ۇيگە قايتىپ ورالماعان.
«قىزدى ىزدەستىرۋگە كريمينالدىق، يۋۆەنالدى جانە پاترۋلدىك پوليتسيا قىزمەتكەرلەرىنەن، ۋچاسكەلىك ينسپەكتورلاردان جەدەل ىزدەستىرۋ توبى قۇرىلدى. جوعالعان قىز وقىپ جاتقان مەكتەپتىڭ مۇعالىمدەرى دە قولدان كەلگەن كومەگىن كورسەتتى. ونى ىزدەۋگە بارلىعى 50 گە جۋىق ادام تارتىلدى. وقۋ ورنىندا قىزدىڭ ءتارتىبى جاقسى ەكەنىن، جاعىمسىز ادەتتەرى بولماعانىن بىلە وتىرىپ، ءبىز ونىڭ جوعالۋىنىڭ بارلىق نۇسقالارىن قاراستىردىق. قىزدىڭ الەۋمەتتىك ورتاسى، اۋدان تۇرعىندارى مۇقيات سۇراستىرىلدى، بەينەباقىلاۋ كامەرالارىنىڭ جازبالارى قارالدى. جەكە مەنشىك سەكتوردا ۇيدەن الىس ەمەس جەردە قاراۋسىز قالعان، اياقتالماعان عيماراتتار، بيىك شوپتەر بار ەكەنىن جانە ءتۇن بولعانىن ەسكەرىپ، ويىمىزعا جامان ويلار كەلە باستادى. ءارقايسىسىمىز بالانىڭ ءومىرى مەن دەنساۋلىعىنا قاۋىپ ءتونىپ تۇرعانىن تۇسىندىك، ونىڭ قاۋىپسىز جانە ساۋ كۇيىندە تابىلۋى - ءار قىزمەتكەر ءۇشىن ۇلكەن مىندەت. اۋا رايىنىڭ قولايسىزدىعىنا جانە تۇنگى ۋاقىتقا قاراماستان، ىزدەستىرۋ توبى ءار يەسىز عيمارات پەن قاڭىراپ بوس قالعان جەرلەردى ىزدەستىردى»، - دەيدى اۋەزوۆ اۋداندىق پوليتسيا باسقارماسىنىڭ باستىعى الىشەر تۇرسىنبەتوۆ.
ىزدەستىرۋ شارالارىنىڭ ناتيجەسىندە تاڭعا دەيىن قىز امان-ەسەن تابىلدى. كەيىنىرەك كامەلەتكە تولماعان بالا دۇكەنگە بارا جاتقاندا دوستارىن كەزدەستىرىپ قالىپ، ويناپ كەتكەنىن مويىندادى. سوسىن ۇيگە ورالۋعا قورىققان.