ەكى كۇندە 12 كەزدەسۋ: پرەزيدەنتتىڭ گەرمانياعا ساپارى قالاي ءوتتى

ميۋنحەن. قازاقپارات - وسى اپتادا مەملەكەت باسشىسى قاسىم-جومارت توقايەۆتىڭ گەرمانياعا ەكى كۇندىك جۇمىس ساپارى ءوتتى.

پرەزيدەنت 14-15-اقپانداعى قاۋىپسىزدىك جونىندەگى 56-ميۋنحەن كونفەرەنسياسىنا قاتىسۋ ءۇشىن وسى ەلگە ارنايى كەلدى. ساراپشىلار بۇل ساپار «وتە جەمىستى بولدى» دەپ باعالادى. اتاپ ايتقاندا، ق. توقايەۆ كونفەرەنسيادان تىس الەمدىك كوشباسشىلارمەن، حالىقارالىق ۇيىمداردىڭ جانە گەرمانيانىڭ ءىرى كومپانيالارىنىڭ جەتەكشىلەرىمەن، سونداي-اق حالىقارالىق قاتىناستار سالاسىنداعى بەدەلدى ساراپشىلارمەن كەزدەسۋلەر وتكىزىپ ۇلگەردى.

ەكى كۇندەگى 12 كەزدەسۋ

قاسىم-جومارت توقايەۆتىڭ جۇمىس ساپارى گەرمانيانىڭ ءىرى كومپانيالارى باسشىلارىمەن -«BayWa AG» كومپانياسىنىڭ باسقارما ءتوراعاسى كلاۋس لۋتسپەن، «Rhenus SE-Co.KG» كومپانياسىنىڭ باسقارما مۇشەسى ميحاەل ۆيفەرسپەن جانە «Reverse Logistics Systems GmbH» كومپانياسىنىڭ باسقارما ءتوراعاسى پاتريك ۆيدەماننمەن ەكىجاقتى كەزدەسۋلەر وتكىزۋدەن باستالدى.

ءىرى اۋىلشارۋاشىلىق كومپانياسىنىڭ باسشىسى ك. لۋتسپەن بولعان كەزدەسۋدە ەنەرگيا كوزدەرىن قايتا قالپىنا كەلتىرۋ جانە اگروونەركاسىپ كەشەنىن سيفرلاندىرۋ سالالارى بويىنشا بىرلەسكەن ينۆەستيتسيالىق جوبالاردى جۇزەگە اسىرۋدىڭ باسىمدىقتارى ەگجەي-تەگجەيلى تالقىلاندى.

پرەزيدەنت قازاقستاننىڭ گەرمانيا بيزنەسىمەن اراداعى تىعىز ءارى جەمىستى ىنتىماقتاستىقتى دامىتۋعا باسا ءمان بەرەتىنىن اتاپ ءوتتى. وسى ورايدا كاسىپكەردىڭ نازارىن ەلىمىزدەگى ەنەرگيا كوزدەرىن قايتا قالپىنا كەلتىرۋ جانە تىڭايتقىشتار ءوندىرۋ باعىتىنىڭ الەۋەتىن ارتتىرۋدىڭ ماڭىزدىلىعىنا اۋداردى.

ميحاەل ۆيفەرسپەن كەزدەسۋ كەزىندە كولىك-لوگيستيكا سالاسى بويىنشا بىرلەسكەن ينفراقۇرىلىمدىق جوبالاردى ىسكە اسىرۋ پەرسپەكتيۆالارى پىسىقتالدى.

مەملەكەت باسشىسىنىڭ پاتريك ۆيدەماننمەن وتكىزگەن كەزدەسۋىندە قازاقستاندا بوس ىدىستاردى قايتا اينالىمعا جىبەرۋدىڭ كەپىلدىك-قايتارىمدىق جۇيەسى جونىندەگى جوبانىڭ جۇزەگە اسىرىلۋ قادامدارى ءسوز بولدى.

«Reverse Logistics Systems GmbH» كومپانياسىنىڭ باسشىسى ماتەريالدار مەن قالدىق زاتتاردى قايتا وڭدەۋ سالاسىندا ءتيىستى ەكوجۇيە قۇرۋ ءۇشىن قازاقستانمەن ىنتىماقتاستىق ورناتۋعا دايىن ەكەنىن ايتتى.

قاسىم-جومارت توقايەۆ قاۋىپسىزدىك جونىندەگى 56-ميۋنحەن كونفەرەنسياسى اياسىندا كانادانىڭ پرەمەر-ءمينيسترى دجاستين تريۋدومەن كەزدەسىپ، كەلىسسوز جۇرگىزدى.

تاراپتار قازاقستان مەن كانادا اراسىنداعى ساۋدا-ەكونوميكالىق، ينۆەستيتسيالىق جانە مادەني-گۋمانيتارلىق ىنتىماقتاستىقتىڭ قازىرگى احۋالى مەن پەرسپەكتيۆالارىن تالقىلاپ، حالىقارالىق ۇيىمدار اياسىنداعى ىقپالداستىقتى قاراستىردى. سونداي-اق، حالىقارالىق كۇن تارتىبىندەگى وزەكتى ماسەلەلەر بويىنشا پىكىر الماستى. كانادا ۇكىمەتىنىڭ باسشىسى ساياسي جانە ەكونوميكالىق رەفورمالاردى جۇزەگە اسىرۋ جونىندەگى قازاقستان پرەزيدەنتىنىڭ كۇش-جىگەرىن جوعارى باعالاپ، ازاماتتىق قوعام مەن دەموكراتيانى دامىتۋ سالاسىنا قولداۋ كورسەتۋگە دايىن ەكەنىن جەتكىزدى.

14-اقپان تۇستەن كەيىن مەملەكەت باسشىسى ەكونوميكالىق ىنتىماقتاستىق جانە دامۋ ۇيىمىنىڭ باس حاتشىسى حوسە انحەل گۋرريامەن كەزدەسۋ وتكىزدى.

قاسىم-جومارت توقايەۆ قازاقستاننىڭ ەكونوميكالىق ىنتىماقتاستىق جانە دامۋ ۇيىمىنىڭ ستاندارتتارىن ەنگىزۋگە، ساياسي جانە ەكونوميكالىق رەفورمالاردى جۇزەگە اسىرۋ بارىسىندا اتالعان بەدەلدى ۇيىممەن بەلسەندى ىقپالداستىقتى جالعاستىرۋعا باسا ءمان بەرەتىنىن ايتتى.

ءوز كەزەگىندە ا. گۋرريا قازاقستانمەن ارادا ىنتىماقتاستىق بايلانىستار نىعايىپ كەلە جاتقانىن اتاپ ءوتتى. «مەن بۇگىنگى كەزدەسۋگە وتە قۋانىشتىمىن. ءبىز كوپتەگەن مينيسترلەرمەن بىرلەسىپ جۇمىس ىستەدىك. وسى ورايدا قارىم-قاتىناستىڭ جىل ساناپ دامىپ كەلە جاتقانىن اتاپ وتكىم كەلەدى. بۇگىنگى كەزدەسۋگە شىن جۇرەكتەن قۋانىشتىمىن. بيىل ىنتىماقتاستىعىمىز ودان ءارى ورلەي تۇسەدى دەگەن سەنىمدەمىن»، -دەدى انحەل گۋرريا.

بۇدان بولەك قازاقستان پرەزيدەنتى ميۋنحەنگە جاساعان جۇمىس ساپارى بارىسىندا ازەربايجان پرەزيدەنتى يلحام اليەۆپەن دە كەزدەستى.

ازەربايجان پرەزيدەنتى بيىل ەكى ەلدىڭ قارىم-قاتىناسى جەمىستى بولاتىنىنا سەنىمدى ەكەنىن اتاپ ءوتتى. «كوپتەگەن بىرلەسكەن جوبالار ىسكە اسىرىلۋدا. 2020 -جىل دا ەكى ەلدىڭ بايلانىسى ءۇشىن تابىستى بولادى دەگەن سەنىمدەمىن. تاۋار اينالىمىن ارتتىرۋدى كوزدەپ وتىرمىز، سونداي-اق ترانسپورت، تۋريزم سالاسىنداعى سەرىكتەستىكتىڭ الەۋەتى زور. ەكى ەل اراسىندا تىعىز بايلانىس ورناعان»، -دەدى يلحام اليەۆ.

كەزدەسۋ سوڭىندا قاسىم-جومارت توقايەۆ يلحام اليەۆتى قازاقستانعا رەسمي ساپارمەن كەلۋگە شاقىردى.

سونىمەن قاتار، 15-اقپان كۇنى تۇسكە دەيىن قاسىم-جومارت توقايەۆ التى كەزدەسۋدى قاتارىنان وتكىزدى. وسى ورايدا كۋۆەيتتىڭ پرەمەر-ءمينيسترى شەيح ساباح حاليد ءال-حاماد اس-ساباحپەن، اۋعانستان پرەزيدەنتى اشراف عانيمەن ، «Siemens AG» كومپانياسىنىڭ اتقارۋشى ديرەكتورى دجو كەزەرمەن، «Eurasia Group» زەرتتەۋ جانە كونسالتينگ كومپانياسىنىڭ نەگىزىن قالاۋشى يان برەممەرمەن پىكىر الماستى.

مۇنىمەن قوسا، قازاقستان پرەزيدەنتى دۇنيەجۇزىلىك دەنساۋلىق ساقتاۋ ۇيىمىنىڭ باس ديرەكتورى تەدروس ادحان گەبرەيەسۋسپەن جانە حالىقارالىق قىزىل كرەست كوميتەتىنىڭ پرەزيدەنتى پەتەر ماۋرەرمەن كەزدەسۋگە ايرىقشا ءمان بەردى.

كەزدەسۋ بارىسىندا مەملەكەت باسشىسى دەنساۋلىق ساقتاۋ سالاسىنداعى وزەكتى ماسەلەلەر بويىنشا پىكىر الماستى. وسى ورايدا قاسىم-جومارت توقايەۆ كوروناۆيرۋستىڭ تارالۋىنىڭ الدىن الۋ باعىتىندا قازاقستاندا قابىلدانعان شارالار تۋرالى حاباردار ەتتى. ءوز كەزەگىندە تەدروس ادحان گەبرەيەسۋس قازاقستان پرەزيدەنتىنە ىندەتتىڭ تارالۋىنا بايلانىستى الەمدەگى احۋال جايىندا كەڭىنەن مالىمەت بەردى.

پەتەر ماۋرەرمەن جۇزدەسۋدە قازاقستان مەن حالىقارالىق قىزىل كرەست كوميتەتى اراسىنداعى بايلانىستاردى ودان ءارى نىعايتۋ ماسەلەلەرى قارالدى. وسى ورايدا حالىقارالىق كۇن تارتىبىندەگى ورتاق ماسەلەلەر تۋرالى پىكىر الماسىلدى. كەزدەسۋ سوڭىندا مەملەكەت باسشىسى قازاقستان مەن حالىقارالىق قىزىل كرەست كوميتەتىنىڭ اراسىنداعى ىنتىماقتاستىقتى دامىتۋعا قوسقان ۇلەسى ءۇشىن پەتەر ماۋرەرگە Ⅱ دارەجەلى «دوستىق» وردەنىن تاپسىردى.

ميۋنحەن كونفەرەنسياسى

جۇمىس ساپارىنىڭ ءبىرىنشى كۇنىندە قاسىم-جومارت توقايەۆ قاۋىپسىزدىك جونىندەگى 56-ميۋنحەن كونفەرەنسياسىنىڭ رەسمي اشىلۋ راسىمىنە قاتىستى.

اتالعان ءىس-شاراعا 40 قا جۋىق مەملەكەتتىڭ باسشىلارى، 100 دەن استام سىرتقى ىستەر جانە قورعانىس مينيسترلەرى، حالىقارالىق قاتىناستار سالاسىنداعى بەدەلدى ساراپشىلار، ەۋروكوميسسيا وكىلدەرى، سونداي-اق ەۋروپالىق پارلامەنت دەپۋتاتتارى كەلدى.

كونفەرەنسيا كۇنتارتىبىندە «ە و مەن ناتو بولاشاعى»، «كيبەرقاۋىپسىزدىك»، «دەنساۋلىق ساقتاۋ ماسەلەلەرى»، «ساۋدا سوعىستارى مەن سانكسيالار»، «جالعان اقپارات، ناسيحات پەن كۇماندى جاڭالىقتار»، «تاياۋ شىعىستاعى احۋال»، سونداي-اق ەۋروپالىق وداق، ا ق ش، رەسەي، قىتاي جانە باسقا دا ەلدەرمەن اراداعى ءوزارا قاتىناستار تاقىرىپتارى تالقىلاندى.

ايتا كەتەيىك، جىل سايىن فورۋمعا الەمنىڭ 70 ەلىنەن 400-600 ادام قاتىسىپ كەلەدى. ولاردىڭ اراسىندا مەملەكەت جانە ۇكىمەت باسشىلارى، اسكەري ءارى ساياسي كوشباسشىلار، مينيسترلەر كابينەتىنىڭ مۇشەلەرى، پارلامەنت دەپۋتاتتارى، عالىمدار، ساياساتتانۋشىلار، ازاماتتىق قوعام وكىلدەرى قامتىلدى. 1990 -جىلدان بەرى كونفەرەنسياعا رەسەي مەن شىعىس ەۋروپانىڭ ەلدەرى، قىتاي، ءۇندىستان، جاپونيا وكىلدەرى شاقىرتۋ الۋدا. شارانىڭ تاقىرىپتارى ۇنەمى وزگەرىسكە ۇشىرايتىن قاۋىپسىزدىك ساياساتى تالاپتارىنا سايكەس تۇرلەنىپ تۇرادى. ميۋنحەن كونفەرەنسياسىن وتكىزۋدىڭ العاشقى جىلدارىندا ءبىرىنشى كەزەكتە ەۋرو-اتلانتيكالىق ايماقتاعى قاۋىپسىزدىك قاتەرلەرىن بولدىرماۋعا نازار اۋدارىلدى. الايدا، كەيىننەن جاڭا اۋماقتار مەن باسقا دا ماسەلەلەر كۇن تارتىبىنە ەنگەندىكتەن، كونفەرەنسيانىڭ مۇددەلەر سپەكترى كەڭەيە ءتۇستى.

كونفەرەنسيانىڭ ەكىنشى كۇنىندەگى «گەوگرافيالىق ورنالاسۋدىڭ ماڭىزى: ورتالىق ازياداعى قازىرگى جاعداي» تاقىرىبىنداعى وتكەن پانەلدىك پىكىرتالاس كەزىندە قاسىم-جومارت توقايەۆ كورشىلەس ەلدەرمەن ءوزارا ءتيىمدى قارىم-قاتىناس تۋرالى ايتتى.

حالىقارالىق قاتىناستار كەڭەسىنىڭ پرەزيدەنتى ريچارد حااس جەتەكشىلىك ەتكەن پىكىرتالاسقا اۋعانستان يسلام رەسپۋبليكاسىنىڭ پرەزيدەنتى مۇحاممەد اشراف عاني قاتىستى.

«جەر كولەمى بويىنشا توعىزىنشى ورىنداعى قازاقستان رەسپۋبليكاسى تۋرالى ايتاتىن بولساق، قىتاي مەن رەسەيدىڭ ورتاسىندا ورنالاسۋ -مۇمكىندىك. ءبىز ەكى ەلمەن كورشىلەس بولۋ ارقىلى كوپتەگەن مۇمكىندىككە يە بولدىق. سونىمەن بىرگە، ورتالىق ازيانىڭ كوپ بولىگىن يەمدەنۋ دە گەوگرافيالىق ەرەكشەلىك. مەنىڭ ويىمشا، ورتالىق ازيا ءوزىنىڭ گەوساياسي ماڭىزىن جوعالتپايدى»، -دەدى مەملەكەت باسشىسى.

ميۋنحەن كونفەرەنسياسىندا مەملەكەت باسشىسى قاسىم-جومارت توقايەۆ قازاقستان مەن ا ق ش-تىڭ ىنتىماقتاستىعى تۋرالى ايتىپ بەردى.

«جاقىندا عانا ا ق ش-تىڭ مەملەكەتتىك حاتشىسى مايك پومپەو قازاقستانعا كەلدى. بۇل دا قازاقستان مەن ا ق ش اراسىنداعى بايلانىستىڭ نىعايا تۇسكەنىن بىلدىرەدى»، -دەدى پرەزيدەنت.

مەملەكەت باسشىسى ەكونومكالىق سەرىكتەستىك تۇرعىسىندا قازاقستاندا ا ق ش-تىڭ بىرنەشە ۇلكەن كومپانيالارى جۇمىس ىستەپ جاتقانىن ەسكە سالدى. «ا ق ش-تىڭ قازاقستان ءۇشىن ماڭىزى زور. ىنتىماقتاستىعىمىز ودان ءارى ارتا تۇسۋىنە ۇلكەن مۇمكىندىكتەر بار دەپ سانايمىن»، -دەپ اتاپ ءوتتى ق. توقايەۆ.

بۇدان بولەك، مەملەكەت باسشىسى جيىنعا قاتىسۋشىلارعا پرەزيدەنت قىزمەتىندەگى باسىمدىقتارى، ەلىمىزدەگى ساياسي جانە ەكونوميكالىق رەفورمالاردىڭ نەگىزگى باعىتتارى تۋرالى ايتىپ بەردى. وسى رەتتە پرەزيدەنت ەكونوميكانى ءارتاراپتاندىرۋدىڭ، يننوۆاتسيالار مەن سيفرلاندىرۋدى دامىتۋدىڭ اسا ماڭىزدى ەكەنىنە نازار اۋداردى.

«پرەزيدەنت رەتىندە يننوۆاتسيالارعا، سيفرلاندىرۋعا باسا ءمان بەرەتىنىمدى ايتقىم كەلەدى. ەكونوميكانىڭ قارقىندى ءوسىمىن قامتاماسىز ەتۋ -باستى ماقسات. سونىمەن قاتار، ۇزدىك شەتەلدىك ساراپشىلاردىڭ تىڭ يدەيالارىن ەنگىزۋگە ءازىرمىز. بۇل باعىتتا اتقارىلاتىن جۇمىستار از ەمەس. ەكونوميكانى دامىتۋ ءۇشىن تىڭ رەفورمالاردىڭ دا ماڭىزى زور ەكەنىن اتاپ وتكەن ءجون»، -دەدى ق. توقايەۆ.

ءوز كەزەگىندە حالىقارالىق قاتىناستار كەڭەسىنىڭ پرەزيدەنتى ريچارد حااس ميۋنحەن قاۋىپسىزدىك كونفەرەنسياسىندا قاسىم-جومارت توقايەۆ سىندارلى ءارى سالماقتى ۇستانىمىن ايتقانىن ءمالىم ەتتى.

«ميۋنحەن قاۋىپسىزدىك كونفەرەنسياسىندا قاسىم-جومارت توقايەۆ سىندارلى ءارى سالماقتى ۇستانىمىن ايتتى. ول ورتالىق ازيا تاقىرىبىندا، سونداي-اق ەكىجاقتى قارىم-قاتىناستار تۇرعىسىندا بايانداپ بەردى. وسى ورايدا، رەسەيمەن جانە قىتايمەن بايلانىستار جايىندا باياندادى»، -دەدى ول ميۋنحەن قاۋىپسىزدىك كونفەرەنسياسىنىڭ اياسىندا تىلشىلەرگە بەرگەن سۇحباتىندا.

بۇل تۇرعىدا ريچارد حااس قازاقستان پرەزيدەنتى پانەلدىك پىكىرتالاستىڭ نەگىزگى مازمۇنىن ەگجەي-تەگجەيلى اشىپ بەرگەنىن اتاپ ءوتتى.

«قاسىم-جومارت كەمەل ۇلىنىڭ ۇستانىمى بۇگىنگى پانەلدىك پىكىرتالاستىڭ تاقىرىبىنا تولىق سايكەس كەلدى. وسىنىڭ نەگىزى رەتىندە وڭىرلىك ءوزارا قارىم-قاتىناسقا تولىق باعا بەرىلدى. پرەزيدەنت مىرزا ورتالىق ازيا ءوڭىرىنىڭ ەكونوميكالىق ءارى ساياسي دامۋىنداعى قازاقستاننىڭ ءرولى تۋرالى اتاپ ءوتتى. پانەلدىك پىكىرتالاس قاتىسۋشىلارىنا الەمدىك ساحناداعى قازاقستاننىڭ باستامالارى مەن ۇستانىمىن تولىقتاي ءتۇسىندىردى»، -دەدى ريچارد حااس.

ب ۇ ۇ-نىڭ بەدەلى مەن استانا پروتسەسى

اتالعان بەدەلدى كونفەرەنسيادا ب ۇ ۇ اياسىنداعى ىنتىماقتاستىق تاقىرىبى ساراپشىلاردىڭ ەرەكشە نازارىندا بولدى. بۇل تۇرعىدا ميۋنحەن قاۋىپسىزدىك كونفەرەنسياسىنىڭ ءتوراعاسى ۆولفگانگ يشينگەر الەم كوشباسشىلارىن ب ۇ ۇ-نىڭ بەدەلىن نىعايتۋ ىسىنە بەلسەندى اتسالىسۋعا شاقىردى.

«اشىعىن ايتۋ كەرەك، ۇجىمدىق كۇش-جىگەر ەڭ قاۋىپتى داعدارىستار مەن حالىقارالىق قاۋىپسىزدىكتىڭ قاتەرلەرىن رەتتەۋ ءۇشىن جەتكىلىكسىز. ادامداردىڭ ءومىرى قيىلىپ جاتىر، قارۋلانۋ جارىسى جاڭا قارقىن الا باستادى، جاھاندىق جىلىنۋ جالعاسۋدا. سوندىقتان الەمدەگى ەڭ ىقپالدى ادامداردىڭ بۇل تۇرعىدا تەك شاراسىزدىق تانىتۋى دۇرىس ەمەس. اتاپ ايتقاندا، بۇل احۋال قازىرگى قاۋىپتى جاعدايدا وتە ءتيىمسىز بولىپ تۇر»، -دەدى ۆ. يشينگەر ميۋنحەن قاۋىپسىزدىك كونفەرەنسياسىنىڭ 56-شى وتىرىسىندا.

ونىڭ پايىمىنشا، وسىنىڭ سالدارىنان ىنتىماقتاستىق پەن بەيبىتشىلىكتىڭ ورنىنا وشپەندىلىك پەن قاقتىعىستار بەلەڭ الۋدا.

«بۇگىنگى جيىندى پايدالانا وتىرىپ، بىرنەشە ەسكەرتۋدى اتاپ وتكىم كەلەدى. ءبىز بارشامىز ب ۇ ۇ بەدەلىن نىعايتۋعا بەلسەندى ۇلەس قوسۋىمىز كەرەك. ونىڭ ىشىندە ب ۇ ۇ قاۋىپسىزدىك كەڭەسىن دە نازاردا ۇستاۋىمىز كەرەك. ول شەشىمدەردى ورىنداۋ ءۇشىن وكىلەتتىگى بار جالعىز ورگان. قاۋىپسىزدىك كەڭەسى ليۆيا بويىنشا قاراردى قابىلداعان كەزدە وسى اپتانىڭ باسىندا قانداي دا ءبىر ءۇمىت پايدا بولدى. وسى ورايدا ەلدەردىڭ باسىم كوپشىلىگى وسى شەشىمنىڭ تالاپتارىن ۇستانادى دەپ سەنىم بىلدىرەمىز»، -دەدى ۆولفگانگ يشينگەر.

ءوز كەزەگىندە گ ف ر پرەزيدەنتى فرانك-ۆالتەر شتاينمايەر شامادان تىس قارۋلانۋ قاۋپى تۋرالى بايانداماسىن جاسادى.

«ەۋروپانىڭ قاۋىپسىزدىگىنە گەرمانيا كوبىرەك ۇلەس قوسۋى ءتيىس، ياعني ناتو اياسىندا. اسىرەسە، قارجىلىق تۇرعىدا قولداۋدى كۇشەيتكەنى ءجون. اليانس ورتاق ماقسات تۋرالى ۋاعدالاستى. مەنىڭ ويىمشا، وسى باعىتتاعى قادامدار وتە دۇرىس ءارى ماڭىزدى. دەگەنمەن ەۋروپادا ەلدەر، ونىڭ ىشىندە گەرمانيا قورعانىسقا كوبىرەك قارجى جۇمساعانىمەن، ءبىز حالىقارالىق تارتىپتەگى ەروزيانى توقتاتا المايمىز»، -دەدى فرانك-ۆالتەر شتاينمايەر.

ونىڭ پايىمىنشا، ديپلوماتيالىق قاتىناستاردىڭ، قاۋىپسىزدىك ارحيتەكتۋراسىنىڭ، قارۋلانۋدى شەكتەۋ تۋرالى شارتتاردىڭ كۇشىن جوعالتۋ قاۋىپتى.

«ەگەر ءبىز ادام قۇقىقتارىنا، حالىقارالىق قۇقىققا سىيلاستىقپەن قاراۋ جولىن قايتا تاپپاساق، الەمدەگى ءتارتىپتى قالپىنا كەلتىرە الماساق، سونداي-اق بولەك مەملەكەتتىڭ قاۋىپسىزدىگىن ءوزىمىزدىڭ جەكە قاۋىپسىزدىگىمىز رەتىندە قابىلداي الماساق جانە وسى ماڭىزدى ماقساتتارعا نەگىزدەلمەسەك، وندا بىرنەشە جىلدان كەيىن شامادان تىس دەڭگەيدە قارۋلانامىز. سوندىقتان بۇل ماقساتتار بارشامىزعا قاتىستى بولىپ وتىر»، -دەدى گفر پرەزيدەنتى. «اسكەري كومپونەنت ءبىز ءۇشىن قاجەت، الايدا بۇل ماڭىزدى جالعىز تەتىك ەمەس. وسى ورايدا ديپلوماتيالىق ءارى ساياسي تەتىكتەر جايىندا ۇمىتپاۋىمىز كەرەك»، -دەدى فرانك-ۆالتەر شتاينمايەر.

ايتپاقشى، رەسەيدىڭ سىرتقى ىستەر ءمينيسترى سەرگەي لاۆروۆ استانا پروتسەسىنىڭ ب ۇ ۇ-عا قانشالىقتى قولداۋ كورسەتىپ وتىرعانىنا باعا بەردى.

ميۋحەن كونفەرەنسياسىندا سيرياداعى قاقتىعىستاردىڭ تۋىنداۋى مەن وسى داعدارىستى شەشۋدىڭ ءمان-جايى ەگجەي-تەگجەيلى تالقىلاۋدان ءوتتى.

«بۇل كۇردەلى ماسەلەنىڭ ءتۇيىنىن شەشۋدە استانا پروتسەسىنىڭ ورنى ەرەكشە. وسى ورايدا ءوزىنىڭ ەلورداسىندا قولايلى الاڭدى ۇسىنعانى ءۇشىن قازاقستانعا شىنايى العىسىمىزدى ايتامىز. استانا پروتسەسى جۇمىسىن جاقسى باستادى، سونداي-اق قازىرگى ۋاقىتتا دا ەڭ ءتيىمدى الاڭ بولىپ تۇر»، - دەدى س. لاۆروۆ.

سونىمەن قاتار، رەسەيدىڭ سىرتقى ىستەر ءمينيسترى استانا پروتسەسى قاۋىپسىزدىك كەڭەسىنىڭ قارارىن ىلگەرىلەتۋدە ب ۇ ۇ-عا قولداۋ كورسەتىپ كەلە جاتقانىن اتاپ ءوتتى.

اۆتور: رۋسلان عابباسوۆ