قازاقستاننىڭ اۋە كومپانيالارى ۇشاق بيلەتتەرىنىڭ قۇنىن 12 پايىز تومەندەتتى
باسپاءسوز مالىمەتتەرىنە قاراعاندا، مەملەكەت باسشىسىنىڭ اۋە تاسىمالدارى باعاسىن تومەندەتۋگە قاتىستى تاپسىرماسىن ورىنداۋ ماقساتىندا وتاندىق اۋە كومپانيالارى ىشكى باعىتتار بويىنشا اۆيابيلەتتىڭ ورتاشا قۇنىن ورتا ەسەپپەن 12 پايىزعا تومەندەتتى.
قازاقستانداعى العاشقى بيۋدجەتتىك اۋە كومپانيانى ىسكە قوسۋى اۋە تاسىمالدار نارىعىنا ەلەۋلى اسەر ەتتى جانە جالپى العاندا ىشكى نارىقتاعى باسەكەلەستىكتى ارتتىرۋعا مۇمكىندىك بەردى. بۇل ۇشاق بيلەتتەرى تاريفتەرىنىڭ تومەندەۋىنە ىقپال ەتتى.
Fly Arystan اۋە كومپانياسىنىڭ نارىققا كەلۋىمەن قازاقستان اۋەجايلارىندا جولاۋشىلار اعىنىنىڭ ءوسۋى بايقالدى، نۇر سۇلتان – 48 پايىز، الماتى – 45 پايىز، سەمەي – 1013 پايىز، تاراز – 734 پايىز، پاۆلودار – 117 پايىز، قاراعاندى – 90 پايىز، شىمكەنت - 57 پايىز، ورال – 54 پايىز.
قازاقستان رەسپۋبليكاسىنىڭ يندۋستريا جانە ينفراقۇرىلىمدىق دامۋ مينيسترلىگى مۇددەلى مەملەكەتتىك ورگاندارمەن جانە كۆازيمەملەكەتتىك سۋبەكتىلەرىمەن بىرلەسىپ ۇشاق بيلەتتەرىنىڭ قۇنىن تومەندەتۋ بويىنشا ءبىرقاتار شارانى قولدانۋ بويىنشا جۇمىس جۇرگىزۋدە.
سونىمەن بىرگە، مەملەكەت باسشىسىنىڭ اۋەوتىنعا باعانى تومەندەتۋگە قاتىستى تاپسىرماسىن ورىنداۋ ماقساتىندا يندۋستريا جانە ينفراقۇرىلىمدىق دامۋ ۆيتسە- ءمينيسترى ب. كاماليەۆ قازاقستاندا ۇشۋلاردى جۇزەگە اسىراتىن شەتەلدىك اۋە كومپانيالارى مەن نەگىزگى اۋەجايلارمەن كەڭەس وتكىزدى.
مەملەكەت مەنشىگىندەگى اۋەجايلارعا اۆياوتىننىڭ قۇنىن ورتاشا نارىقتىق دەڭگەيگە دەيىن تومەندەتۋ جانە شەتەلدىك اۋە كومپانيالارمەن شارتتاردىڭ وسى شەشىمىنە سايكەس كەلتىرۋ تاپسىرىلدى.
اۆياوتىننىڭ قۇنى اۋە تاسىمالدارى قۇنىنىڭ ەڭ ۇلكەن ۇلەس سالماعىن الادى-30 پايىزعا دەيىن.
كەزدەسۋگە نۇر- سۇلتان، قاراعاندى، الماتى، شىمكەنت، اقتاۋ قالالارىنىڭ اۋەجايلارى جانە شەتەلدىك اۋە كومپانيالارىنىڭ وكىلدەرى قاتىستى.
جالپى العاندا، اۆياوتىن مەن اۋە بيلەتتەرىنىڭ قۇنىن تومەندەتۋ ماسەلەسى مينيسترلىكتىڭ تۇراقتى باقىلاۋىندا بولادى جانە وسى ماسەلە بويىنشا جۇمىس تۇراقتى نەگىزدە بولادى.