قازاقستاندىق اۆتوزاۋىتتار بيىل 12 مىڭ كولىك شىعاردى

نۇر-سۇلتان. قازاقپارات - 2019-جىلدىڭ قاڭتار-ساۋىرىندە قازاقستاندا 12870 اۆتوكولىك شىعارىلدى. ولاردىڭ اراسىندا جەڭىل جانە جۇك كولىكتەرى، اۆتوبۋس تەحنيكاسى مەن ارنايى ماشينالار دا بار.

 بۇل تۋرالى قازاقپارات «قاز اۆتو ونەركاسىپ» اۆتوكولىك سالاسىنداعى كاسىپورىندار وداعىنا سىلتەمە جاساپ حابارلايدى.

ەسەپتى كەزەڭدە قازاقستاندا شىعارىلعان كولىكتەردىڭ جالپى قۇنى 83,9 ميلليارد تەڭگەگە باعالانىپ وتىر. جالپى، جەڭىل اۆتوموبيل ءوندىرۋ 37,9 پايىزعا ءوسىپ،  12113-كە جەتتى.

جىل باسىنان بەرى وتاندىق اۆتوزاۋىتتار  10879 كولىكتى وتكىزىپ، بۇل كورسەتكىش بىلتىرعا قاراعاندا 42,2 پايىزعا جوعارى بولدى. ونىڭ ىشىندە  3368 اۆتوموبيل ءساۋىر ايىندا ساتىلىپ، بۇل ءوز كەزەگىندە سالاداعى ۇزدىك كورسەتكىش رەتىندە تىركەلدى.

ءتورت ايدىڭ قورىتىندىسى بويىنشا جەرگىلىكتى وندىرىستەگى اۆتوموبيلدەردى ساتىپ الۋعا تۇرعىندار 69,6 ميلليارد تەڭگە جۇمساپ، وسى سوما ءبىر جىل بۇرىنعى دەڭگەيدەن 68,5 پايىزعا جوعارى بولدى.

اتالعان مەرزىمدە قازاقستاندا قۇراستىرىلعان جەڭىل كولىكتەردىڭ اراسىندا سۇرانىسقا يە برەندتەردىڭ بەستىگىنە Lada (4664 ، Hyundai (3405)، KIA (1 240) ، Skoda 290) جانە Chevrolet (233 ەندى. وتاندىق كاسىپورىندار ۇسىناتىن ماركالاردىڭ تىزىمىندە JAC (160) ، UAZ (116) ، Ravon (68 جانە Peugeot (15 بار ەكەنىن اتاپ وتكەن ءجون.

  اۆتور: رۋسلان عابباسوۆ