قوستانايدا 12 مىڭ اۆتوكولىك شىعارىلدى

قوستاناي. قازاقپارات - قوستاناي وبلىسىنىڭ جالپى ىشكى ءونىمى %10,3 عا ءوستى. بۇل تۋرالى بۇگىن اپپارات ماجىلىسىندە وبلىس اكىمىنىڭ ورىنباسارى ەرلان سپانوۆ ءمالىم ەتتى، دەپ حابارلايدى قازاقپارات.

وبلىس اكىمدىگىندە ارحيمەد مۇحامبەتوۆتىڭ توراعالىعىمەن كەڭەيتىلگەن وتىرىس ءوتتى. جيىندا ءوڭىردىڭ بىلتىرعى دامۋ كورسەتكىشتەرى قورىتىندىلانىپ، 2019-جىلدىڭ العاشقى جارتىسىنا جوسپارلانعان جاڭا مىندەتتەر پىسىقتالدى. وبلىس اكىمىنىڭ ورىنباسارى ەرلان سپانوۆتىڭ سوزىنشە، ءوڭىردىڭ الەۋمەتتىك-ەكونوميكالىق دامۋىندا ءوسىم بار.

«2018-جىلى وبلىستىڭ جالپى ىشكى ءونىمى %10,3 عا ءوستى. بۇعان قوسا ونەركاسىپ ونىمدەرىنىڭ كولەمى دە ەداۋىر ۇلعايعان. اسىرەسە تاۋ-كەن ءوندىرىسى مەن وڭدەۋشى كاسىپورىنداردا ءوسىم جوعارى. وڭدەۋ سالاسىنداعى ءوسىم - %105,8. اۋىلشارۋاشىلىق تاۋارلارىن وڭدەۋ سالاسى وڭىردەگى ىشكى نارىقتىڭ تۇتاسقا جۋىعىن قامتىپ وتىر. ازىق-تۇلىك ونىمدەرىنىڭ ەكسپورتى ەداۋىر ارتتى. اتاپ ايتقاندا، سىرتقى ساۋداداعى ەت ونىمدەرىنىڭ ۇلەسى 4 ەسە، ءسۇت ونىمدەرى %12، ۇن %58، كونديتەر ونىمدەرى %19 كە وسكەن. بىرنەشە جىل بويى تۇرالاپ قالعان وسىمدىك مايىنىڭ ەكسپورتتىق ۇلەسى 6,2 ەسەگە كوبەيدى»، - دەدى اكىم ورىنباسارى.

ەرلان سپانوۆ ماشينا جاساۋ سالاسى دا جىل ساناپ قارقىن الىپ كەلەتىنىن ايتتى. بىلتىر «سارىارقا اۆتوپروم» سەرىكتەستىگىندە 11766 جەڭىل اۆتوكولىك، 159 جۇك كولىگى قۇراستىرىلدى. بۇل قوستاناي وڭىرىندە بۇرىن سوڭدى بولماعان كورسەتكىش.

2018-جىلى وبلىس كاسىپورىندارى جالپى قۇنى 183,1 ا ق ش دوللارىنا تەڭ جەرگىلىكتى ءونىمدى ەكسپورتقا جونەلتكەن.

وبلىستا شاعىن جانە ورتا بيزنەستى دامىتۋعا ءتيىمدى جاعداي جاسالعان. ماسەلەن، 2018-جىلى جەكە كاسىپكەرلەر سانى %3,5 عا ارتقان. بۇگىندە وبلىستا ءار سالا بويىنشا 51 مىڭ جەكە كاسىپكەر ەڭبەك ەتەدى. شاعىن جانە ورتا بيزنەس نىساندارىنىڭ كوبەيۋى ساۋدا سالاسىنىڭ جاندانۋىنا وڭ ىقپال ەتىپ وتىر. ويتكەنى %40 تەن استام كاسىپكەر ىشكى ساۋدا سالاسىندا قىزمەت كورسەتەدى.

ەكونوميكا ءوسىمى الەۋمەتتىك سالانىڭ تۇراقتىلىعىنا تىكەلەي ىقپال ەتىپ وتىر. 2018-جىلى وڭىردە 13 مىڭ جاڭا جۇمىس ورنى اشىلعان. 2,6 مىڭ جۇمىسسىز كاسىبي وقۋعا جىبەرىلدى. كاسىبي ءبىلىم بەرەتىن مەكەمەلەردە وقۋ ءتامامداعان 1,3 مىڭ ادام ەڭبەكپەن قامتىلدى. مۇنىڭ سىرتىندا، «باستاۋ بيزنەس» جوباسى بويىنشا 2 مىڭنان استام ادام كاسىپتىك وقۋعا تارتىلعان. وقۋدى اياقتاعان 1543 ادامنىڭ 361 ءى جەڭىلدەتىلگەن نەسيە العان.

جىل باسىنان بەرى قۇرىلىس سالاسىندا دا قىرۋار شارۋا اقارىلدى. بىلتىر «نۇرلى جەر» باعدارلاماسى بويىنشا 299,3 مىڭ شارشى مەتر تۇرعىن ءۇي سالىندى. ناتيجەسىندە وبلىس بويىنشا 3172 پاتەر پايدالانۋعا بەرىلدى.