اجالدان الىپ قالدى: اقتوبەلىك ەمشى 12 ادامدى دومبىرانىڭ ۇنىمەن ەمدەگەن

استانا. قازاقپارات - اقتوبەدە وبلىسى بايعانين اۋدانىندا تۇراتىن جىرشى-تەرمەشى ورداباي ساندىباي ۇلى دومبىرا ارقىلى ادامدى قاتەرلى ىسىكتەن ايىقتىرۋعا بولاتىنىن ايتتى.

ول قازىر ناۋقاستاردى ۇران تەراپياسىمەن، مۋزىكاتەراپيا، فيتوتەراپيا، فوتوتەراپيامەن ەمدەپ ءجۇر دەپ حابارلايدى «زامانا» باسىلىمى.

قاريانىڭ سوزىنە سۇيەنسەك، بالا كەزىنەن دومبىرامەن اۋەستەنگەن ول 33 جاسىندا تەرمەلەردى ساعاتتاپ، توقتاۋسىز ايتاتىن شەبەرلىككە جەتىپتى. سول شاقتان-اق تۇسىندە «قايىرىمدىلىق جاسا» دەگەن اياندى بىرنەشە رەت كورىپ، 6-7 جىل بويى ءوزىن ءدىن جولىندا قايتا تاريەلەيدى.

«ەسكى مەشىتكە نامازعا كەلىپ جۇرگەنىمدە «سانالىق ناماز» دەگەن ايان الىپ ءجۇردىم. ءبىراق ونىڭ نە ەكەنىن تابا المادىم. كوپ ۇزاماي «ارىپتەر» دەگەن ايان ءتۇستى. حاليفا التايدىڭ قازاقشاعا اۋدارعان قۇران الىپپەسىن قاراسام، «حۋرۋف-ۋل مۇقاتتا-ا» دەگەن ارىپتەر تۇر ەكەن. كەيىن «وسى ارىپتەردى پايدالان» دەگەن اقپاراتتار كەلە باستادى»، - دەپ اعىنان جارىلدى ول.

جاسى 70 كە تاياعان اقساقال شيپالىق-سانالىق نامازدىڭ نۇسقاسى دايىن بولعان سوڭ، ونى مولدالارعا كورسەتەدى. باسقالاردىڭ وزىنە سەنىمسىزدىك تانىتقانىنا قاراماستان، ول قازىرگى قالىپتا جۇرگەنىن سول ارىپتەردىڭ ارقاسى دەپ بىلەدى.

قازىر ءوزى قولدانىپ جۇرگەن مۋزىكاتەراپيامەن دەپرەسسياعا تۇسكەن، قينالىپ جۇرگەن ادامدارعا كومەكتەسۋگە بولاتىنىن ايتادى. سول ءۇشىن ول ەسكيزى وزىنە ايان ارقىلى كورىنگەن دومبىرانى ارنايى جاساتىپ، ءتۇرلى مۋزىكا اسپابىنىڭ ءۇنىن بەرەتىندەي ەتىپ العان.

«سانكت-پەتەربۋرگتە 3 اي ونكولوگيالىق حوسپيسىندە جۇمىس ىستەگەنىمدە، وسى دومبىرامەن ءان ايتتىم. سوندا اجالىن كۇتىپ وتىرعان 12 ناۋقاس ۇيىنە قايتقان بولاتىن. بۇل - حوسپيستىڭ تاريحىندا بولماعان وقيعا»، - دەيدى ورداباي ساندىباي ۇلى.