سەمەيدە 12 شەتەلدىك ازامات ەلدەن قۋىلدى
سەمەيگە كەلەتىن شەتەلدىكتەردىڭ سانى ارتۋدا. وسىعان بايلانىستى قالالىق كوشى-قون پوليتسياسى باسقارماسى مەن ءى ءى ب- نىڭ قىزمەتكەرلەرى زاڭسىز ەڭبەك كوشى-قونىن شەكتەۋ ماقساتىندا «نەلەگال-2018» جەدەل الدىن الۋ شاراسىن وتكىزۋدە.
العاشقى كۇننىڭ وزىندە ءتارتىپ ساقشىلارى ەل اۋماعىندا بولۋ ەرەجەسىن بۇزعان 33 شەتەل ازاماتىن اكىمشىلىك جاۋاپقا تارتتى. 30 ادامنىڭ ەلىمىزدە ۋاقىتشا بولۋ مەرزىمى قىسقارتىلدى. سوتتىڭ شەشىمىمەن 12 شەتەلدىك ەلدەن شىعارىلدى. ەكەۋىنىڭ ۇستىنەن قىلمىستىق ءىس قوزعالدى.
«شەتەل ازاماتتارى كوبىنە ۋاقىتشا تىركەۋگە وتىرمايدى. بۇدان سوڭ سوت شەشىمىن ورىندامايدى، زاڭسىز جۇمىسقا تۇرادى. ارەكەتتەرى كوشى-قون زاڭناماسىنا قايشى كەلەدى. سوندىقتان شارا اياسىندا بارلىق قۇرىلىس نىساندارى، ءدامحانالار مەن بازارلارعا تەكسەرۋ جۇرگىزىلەدى»، - دەدى سەمەي قالالىق ءى ءى ب مەملەكەتتىك ءتىل جانە اقپارات ءبولىمىنىڭ جەتەكشىسى ەلۋبەك وسپانوۆ.
سەمەيدە زاڭسىز جۇمىس ىستەيتىندەردىڭ كوبى وزبەكستان ەلىنىڭ ازاماتتارى. تەكسەرۋ كەزىندە 3 وزبەكستاندىق ازاماتتىڭ العان قۇجات بويىنشا جۇمىس ىستەمەيتىنى انىقتالدى. ياعني، ولار جەكە تۇلعاعا ءۇي شارۋاسىنا كومەكتەسەمىز دەپ رۇقساتناما الادى. الايدا تەكسەرۋ بارىسىندا وزگە شارۋا قوجىلىعىندا ءسۇت سەحىنىڭ توبەسىن كوتەرىپ، ءارتۇرلى جۇمىس ىستەپ جۇرگەنى بەلگىلى بولدى. كوشى-قون زاڭناماسىن بۇزعانى ءۇشىن ولار اكىمشىلىك جاۋاپكەرشىلىككە تارتىلىپ، ەلدەن قۋىلدى. ال جۇمىس بەرۋشىگە 100 ا ە ك(200 مىڭ تەڭگە كولەمىندە - رەد.) مولشەرىندە ايىپپۇل سالىندى.