كۇش-قۋاتى قالماعان ادامدارعا ءومىرىن وزگەرتۋگە ارنالعان 12 كەڭەس

 استانا. قازاقپارات - كۇيزەلىس، قوبالجۋ، ەموتسيونالدى توقىراۋ - اتاۋى ءارتۇرلى بولعانىمەن، ءمانى ءبىر.

تىعىرىققا تىرەلىپ، شىعار جول تابا الماي قالعان جاعداي ءبارىمىزدىڭ باسىمىزدان ءوتتى. بۇگىن ءومىرىڭىزدى تۇبەگەيلى وزگەرتىپ جىبەرمەسە دە، ونى جايلى ەتۋگە كومەكتەسەتىن بىرنەشە كەڭەستەردىڭ تىزىمىمەن بولىسەمىز.

مۇنداي جاعداي سىزگە تانىس شىعار: تاڭعى ساعات 10، ءۇشىنشى شىنى-اياق كوفەڭىزدى ءىشىپ وتىرسىز، باسىڭىزداعى ويدىڭ ءبارىنىڭ استاڭ-كەستەڭى شىققان. ابدەن قاجىپ كەتتىڭىز - دەنەڭىز دە، ساناڭىز دا، سەزىمىڭىز دە ابدەن شارشاعان. بۇرىن قۋانىشقا بولەگەن نارسەلەرگە قازىر بەي-جاي قارايسىز. موتۆاتسيا ما؟ جوق. اشۋشاڭدىق پا؟ ءيا. دەنساۋلىق پەن جاقسى كوڭىل- كۇي تۋرالى ويلار شە؟ اتاي كورمەڭىز.

ادەتتە كوپشىلىك بيىك شىڭداردى باعىندىرۋ مەن ءال-دارمەنى قالماي السىرەۋ قاتار جۇرەدى دەپ ەسەپتەيدى. مۇلدەم ولاي ەمەس. ەموتسيونالدى توقىراۋ تابىستىڭ بەلگىسى ەمەس، بۇل اعزاڭىزدىڭ دەمالۋ كەرەك دەپ دابىل سوعۋى.

ەگەر ءسىز بۇرىن ىستەگەن ىستەرىڭىزدى ىستەپ جۇرسەڭىز، بۇرىن الىپ جۇرگەن نارسەلەرىڭىزدى الاسىز.

گەنري فورد

گەنري فوردتىڭ ايگىلى قاناتتى ءسوزى ءدال وسى جاعدايعا ارناپ ايتىلعانداي.

ەكى شىنى- اياق ەكسپرەسسو بولسىن نەمەسە كوزىڭىزدىڭ استىنا جاعىلعان كونسيلەر بولسىن، ءوزىمىزدى ارناعا ءتۇسىرۋدىڭ ادەتتەگى امالدارىنا كوپ ۋاقىت كەتپەيدى. ءبىراق ولاردىڭ قانشالىقتى پايداسى بار؟ ارينە، ءومىردى تۇبەگەيلى وزگەرتۋ ءۇشىن بۇدان دا كوبىرەك ۋاقىت كەرەك. ءبىراق ءتۇپتىڭ تۇبىندە ول تالپىنىسىڭىز بەكەرگە كەتپەسى انىق. بۇل ءسىزدىڭ دەنساۋلىعىڭىزعا جانە جاقسى كوڭىل-كۇيىڭىزگە سالىنعان سالىم. سوندىقتان ولارعا سالماقتى قاراعانىڭىز دۇرىس.

1. ۇيقىڭىزدى قاندىرىڭىز

ءبىزدىڭ دەنەمىز - مەحانيزم. بۇل قامقورلىق پەن دەمالىستى قاجەت ەتەتىن وتە كۇردەلى كەرەمەت جۇيە. جۇمىستان كەتكەن كەزدە، ءسىز كۇن سايىن كومپيۋتەرىڭىزدى ءوشىرىپ كەتەسىز. ءسىزدىڭ دەنەڭىز بەن ساناڭىزعا دا وسىنداي نارسە كەرەك. زەرتتەۋلەر كورسەتكەندەي، جاقسى ۇيقى ميدى كۇنى بويى جينالعان ۋىتتى زاتتاردان ارىلتۋعا كومەكتەسەدى. مىنە، سول ءۇشىن دە جەتى- سەگىز ساعاتتىق تولىققاندى تىنىعۋ ءبىزدىڭ پسيحيكالىق ساۋلىعىمىز بەن دەنساۋلىعىمىز ءۇشىن اسا ماڭىزدى. ءسىزدىڭ ماقساتىڭىز - ۇيقىنىڭ كۇندەلىكتى ۇزاقتىعىن بىرتىندەپ وسى دەڭگەيگە جەتكىزۋ. كۇن سايىن جارتى ساعات ارتىق تىنىعۋ سونشالىقتى قيىن ەمەس قوي. سولاي ما؟

2. نەنى جانە قالاي جەيتىنىڭىز تۋرالى ويلانىڭىز

تاماق تانۋىڭىزعا بايىپتى قاراۋ ءۇشىن تاجىريبە كەرەك. بۇل اسىرەسە جۇگىرىپ ءجۇرىپ تاماقتانىپ، اراسىندا حاتتارعا جاۋاپ جازىپ، تەلەفون قوڭىراۋلارىنا جاۋاپ بەرىپ ۇيرەنىپ قالعان ادامدارعا قاتىستى. بايىپتى تاماقتانۋ تاجىريبەسى ءوزىڭىزدىڭ نە جەپ وتىرعانىڭىزدى جانە ودان اعزاڭىزعا قانداي پايدا بولاتىنىن تۇسىنۋگە كومەكتەسەدى. سول كەزدە ءسىز تاماقتانۋدى جاي عانا قارىن تويدىرۋ دەپ قارامايتىن بولاسىز. زەرتتەۋ ناتيجەلەرى كورسەتكەندەي، تاماقتانۋعا وسىنداي قادام جاساۋ كوڭىل كۇيدى ايتارلىقتاي كوتەرىپ، كۇيزەلىس دەڭگەيىن تومەندەتىپ، پايدالى تاماقتانۋ داعدىسىن قالىپتاستىرىپ، ءتىپتى ارتىق سالماقتان ارىلۋعا كومەكتەسەدى ەكەن.

3. كوفەينگە دەگەن كوزقاراسىڭىزدى وزگەرتىڭىز

كوفەين - ءسىزدىڭ ونسىز دا جۇقارىپ تۇرعان جۇيكەڭىزدى تىتىركەندىرەتىن ىنتالاندىرۋشى. مازاڭىز بولماي، تورىعىپ وتىرساڭىز نەمەسە اشۋىڭىز ارناسىنان شىعايىن دەپ وتىرسا، ءار شىنى- اياق كوفە ءسىزدى ۋاقىتشا عانا سەرگىتەدى. ونىڭ ورنىنا سەرگۋدىڭ جەڭىلدەۋ جولىن قاراستىرىپ، قۋاتتانىڭىز. دەنە قيمىلدارىن نەمەسە مەديتاتسيا جاساڭىز. ەگەر تاڭەرتەڭ كوفە ىشپەي، كوڭىلىڭىز كونشىمەسە، وندا بۇل سۋسىنعا دەگەن پىكىرىڭىزدى باسقاشا وزگەرتىڭىز. ونى بارىنشا سانالى تۇردە جاساڭىز. سۇيىكتى شىنى-اياققا قۇيىلعان كوفەگە قول سوزىپ، ءيىسىن راحاتتانا يىسكەپ، كوفەنىڭ دامىنە تامسانىڭىز. ءبىراز ۋاقىتتان كەيىن بۇل نارسە كوفەنىڭ وزىنەن دە ماڭىزدىراق بولىپ كەتۋى مۇمكىن.

4. توقتاماستان قوزعالا بەرىڭىز

قوزعالىس -  كوڭىل-كۇيدى كوتەرۋدىڭ جانە كۇيزەلىستى تومەندەتۋدىڭ ەڭ كۇشتى ەمى عانا ەمەس، ونىڭ ەسكە ساقتاۋدى جانە جالپى ويلاۋ داعدىلارىن جاقسارتۋدىڭ ءتيىمدى ءادىسى ەكەنى دالەلدەنگەن.

ەڭسەڭىزدى باسىپ تۇرعان كۇيزەلىسپەن دەنە بەلسەندىلىگى ارقىلى كۇرەسۋگە بولادى: يوگاعا، جۇگىرۋگە نەمەسە ۆەلوسيپەد تەبۋگە كەتكەن ءاربىر مينۋت كۇيزەلىسپەن كۇرەستەگى كىشكەنتاي قادامدارىڭىز.

قاراپايىم تاڭعى جاتتىعۋدىڭ ءوزى كۇنى بويى سەرگەك ءجۇرىپ، ماڭىزدى ماسەلەلەرگە كوڭىل بولۋگە كومەكتەسەدى. تابىستى ادامداردىڭ كوبى تاڭعى ۋاقىتتا جاتتىققاندى ءجون كورەتىنىن ايتۋدىڭ ءوزى ارتىق. كۇنىنە ەڭ بولماسا 10 مينۋتتان باستاپ اقىرىنداپ جاتتىعىپ، ونىڭ ۇزاقتىعىن بىرتىندەپ جارتى ساعاتقا دەيىن ارتتىرىڭىز.

5. ەڭ جاقسى دەمالىس - تىنىشتىق

ءيا، ءيا. ءومىردى وزگەرتۋ تۋرالى ءبىر دە ءبىر ماقالا مەديتاتسيادان اينالىپ وتپەيدى. ونىڭ شىنىمەن دە پايداسى بولسا، ايتپاي كەتۋگە بولمايدى عوي. كۇيزەلىسكە قاتىستى سىرقاتتاردان ەمدەلۋ ءۇشىن دارىگەر قابىلداۋىنىڭ %80 ىنا قانشاما ۋاقىت پەن اقشاڭىز كەتەتىنىن ەسەپتەپ كوردىڭىز بە؟ ەڭ كەرەمەتى، وسى شىعىنداردىڭ بارلىعىن دۇرىس مەديتاتسيا ارقىلى قىسقارتا الادى ەكەنبىز. بۇل تاجىريبە كۇيزەلىسپەن كۇرەسۋگە كومەكتەسىپ، يممۋنيتەتتى نىعايتىپ، ۇيقىنى تىنىشتاندىرىپ، ءوزىڭىزدى باقىتتى سەزىنۋگە كومەكتەسەدى. كۇنىنە بەس مينۋت مەديتاتسيا جاساساڭىز، كۇنى كوڭىل- كۇيىڭىز جاقسى بولادى. ونىڭ تاعى ءبىر ارتىقشىلىعى، ۇنەمى مەديتاتسيا جاسايتىن ادامدار ءومىردىڭ قارا جولاقتارى كەلگەن كەزدە ءبارىن اقىلعا سالىپ ويلانىپ، سابىر ساقتاي الادى.

6. تەرىڭىزگە كۇتىم جاساڭىز

 ونىڭ ەش قۇپياسى جوق: تەرىڭىز ءنارلى بولسا -  ءومىرىڭىز ءساندى بولادى. ارينە، بۇل ادەتكە داعدىلانۋ ءۇشىن دە ۋاقىت كەرەك. مۇندا ايگىلى ءۇش اپتا - تۇراقتىلىق، جۇيەلىلىك جانە ءتۇسىنۋ دەگەن ەرەجە دە ماڭىزدى ەمەس. ويتكەنى كۇنتىزبە كۇندەرىن سىزىپ وتىرعاننان دا، مۇنى نە ءۇشىن ىستەيتىنىڭىزدى ءتۇسىنۋ ماڭىزدىراق. قالىڭداپ جاققان كونسيلەر شارشاعانىڭىزدى ءاپ- ساتتە جاسىرعانداي بولادى. ءبىراق شىن مانىندە تەرىڭىز ىشتەي، اقىرىنداپ وزگەرە بەرەدى. سوندىقتان كوسمەتيكا بولسىن، تاماق بولسىن بەت تەرىڭىزدى جاقسارتىپ قانا قويماي، اعزاڭىزعا پايدا اكەلەتىنىن تاڭداڭىز. قاجەتتى راسىمدەردى ەرتەلى- كەش قايتالاپ وتىرىڭىز. ءبىراز ۋاقىتتان كەيىن بەت تەرىڭىزدىڭ جارقىراپ، كوڭىل كۇيىڭىزدىڭ كوتەرىلگەنەن بايقايسىز. تىم قارابايىر سياقتى كورىنەر، ءبىراق ادامزات بۇدان ارتىق ەشنارسەنى ءالى ويلاپ تاپپادى.

7. ءناپسىڭىزدى ەمەس، جانىڭىزدى بايىتىڭىز

مۇنىڭ دا ەش قيىندىعى جوق: وزىڭىزگە قۋانىش سىيلايتىن نارسەلەردى ىستەڭىز. تۇراقتى جۇمىس ىستەۋ پايدالى شىعار. ءبىراق ءتۇپتىڭ تۇبىندە بۇل اعزاڭىزدى بار كۇش-قۋاتىنان ايىرىپ، قاجىتىپ جىبەرەدى. جۇيەلى دەمالىس پەن بوي سەرگىتۋگە قاراعاندا، بۇدان كەلەر پايدا از. ءوزىڭىز كوپتەن بەرى قالاپ جۇرگەن تۋفليىڭىزدى ساتىپ الىڭىز، تۇسكى ءۇزىلىس كەزىندە بالمۇزداق الىپ جەڭىز جانە دەمالىس كۇندەرى كۇنى بويى ەسكى فيلمدەردى تاماشالاڭىز. وسى ارەكەتتەردىڭ بارلىعىنىڭ، جارايدى كوپشىلىگىنىڭ دەلىك، ءبىر عانا وزىڭىزگە قۋانىش سىيلاۋ دەگەن سەبەبى بولۋ كەرەك. ءسىز مۇنى جۇمىس تىزىمىندەگى كەلەسى ءىس بولعاندىقتان ىستەمەيسىز. تەك ءوزىڭىزدى قۋانتۋ ءۇشىن ىستەيسىز. بار بولعانى وسى.

8. تۇيسىگىڭىزگە سەنىم ارتىڭىز

«جۇرەگىم سەزىپ تۇر» دەگەن ءسوز جاي عانا مەتافورا ەمەس. ماڭىزدى شەشىم قابىلدار الدىندا ىشكى سەزىمىڭىزدى تىڭداڭىز: ادەتتە ءبىزدىڭ دەنەمىز ءوزىمىز تۇسىنبەي تۇرىپ، بىزگە نە كەرەك ەكەنىن ايتادى. شارشاساڭىز، ۇزىلىسكە شىعىڭىز. جانىڭىز وزگەرىستى قالاسا، باسقا جاققا بارىپ- كەلىڭىز. ەگەر بىرنارسە دۇرىس بولماسا، ەڭ اۋەلى سەبەبىن وزىڭىزدەن ىزدەڭىز. ەگەر ءسىز تۇيسىكتىڭ ادامى بولماساڭىز، وندا ىشكى داۋسىڭىزعا قۇلاق ءتۇرۋدى ۇيرەنگەنشە ءبىراز ۋاقىت كەرەك. تەك بارلىق جۇمىستاردى ىسىرا تۇرىپ، ازداپ تىنىعىپ الىڭىز دا، ءوزىڭىزدىڭ قانداي سەزىمدە ەكەنىڭىزگە شىنايى جاۋاپ بەرىڭىز. سول كەزدە وزىڭىزگە شىن مانىندە نە كەرەكتىگىن جاقسى بىلەتىنىڭىز انىق بولادى. تەك ءبىر ءسات توقتاپ، ءوزىڭىزدى تىڭداۋىڭىز كەرەك.

9. قاتىپ قالعان قاعيدالاردى بۇزىڭىز

اپتاسىنا ەڭ از دەگەندە ءبىر رەت وزىڭىزگە مۇلدەم بەيتانىس ءبىرنارسەنى بايقاپ كورۋگە تىرىسىڭىز. ال ەگەر قۇلشىنىسىڭىز ارتىپ تۇرسا، كۇنىنە ءبىر رەت. ءبارىن بىردەن وزگەرتە سالۋ مىندەتتى ەمەس - مىسالى، جاي عانا جۇمىسقا باسقا جولمەن بارىڭىز. مۇنداي ۇساق- تۇيەك سياقتى كورىنەتىن نارسەنىڭ ءوزى ەرەكشە تاجىريبە. ول ويلاۋدىڭ جاڭا ادىستەرىنە، قابىلداۋعا ساناڭىزدى اشۋعا كومەكتەسەدى. ال بۇل ءوز كەزەنىدە ءسىزدى از دا بولسا باقىتقا بولەيدى.

10. وزىڭىزگە جايلى ورتا قالىپتاستىرىڭىز

بارلىق دۇرىس قارىم- قاتىناستاردى قۇرۋدىڭ ءبىرىنشى كەزەڭى - ءوز ومىرىڭىزگە كىمدى جانە نەنى ەنگىزەتىنىڭىزگە جاۋاپتى قادام جاساۋ. ءيا، ءومىرىڭىزدى قۇرتىپ جۇرگەن نارسەلەردى كوڭىل قۋانتاتىن ءارى جايلى جاعدايعا اينالدىرۋدىڭ بولاشاعى ءسىزدى ازداپ قورقىتۋى مۇمكىن. بۇل اسىرەسە، دوستىق، وتباسى، تاماق، جۇمىس نەمەسە وزىڭىزگە قاتىستى بولسا. ءبىراق سوعان قاراماستان، بۇل وتە ماڭىزدى.

بارلىق بايلانىستارىڭىزدى ساراپتاپ، ولاردىڭ ءوز ومىرىڭىزگە جانە جاقسى كوڭىل-كۇيىڭىزگە قانداي ۇلەس قوسىپ جۇرگەنىنە كوڭىل اۋدارىڭىز.

ورتاسىن تاڭداۋعا جاۋاپكەرشىلىكپەن قارايتىن ادامدار، شەشىم قابىلداۋدا وزىنە سەنىمدى بولادى.

11. جاڭا نارسەلەردى ۇيرەنىڭىز

جاڭا ءبىلىم الۋ ءۇردىسى ءسىزدى قۋانىشقا بولەيدى. بۇل - اقيقات. ول ءسىزدىڭ ءومىر جاسىڭىزدى ۇزارتىپ، ونى قىزىقتى ءارى مازمۇندى ەتەدى. سونداي-اق، ءسىزدى ارتىق قاتە تۇسىنىكتەردەن ارتىلتادى. ازدان باستاعىڭىز كەلە مە؟ وندا، مىسالى، توقىمانى ۇيرەنىڭىز. جەلىدە ونى ۇيرەتەتىن روليكتەر وتە كوپ. مۇنداي ءىستى ءتىپتى، توسەكتەن تۇرماي-اق ۇيرەنۋگە بولادى. ال ەگەر ۇلكەن ماقساتتارعا ۇمتىلساڭىز - ۆەب-ديزاين جاساۋدىڭ ءۇش ايلىق كۋرسىنا بارىڭىز. نەمەن اينالىسساڭىز دا، ميىڭىز سىزگە العىستان باسقا ەشنارسە ايتپايدى.

12. كۇندەلىك جازۋدى قولعا الىڭىز

 بوي سەرگىتۋ، شىعارماشىلىق قابىلەتتى دامىتۋ، وزىڭىزگە دەگەن سەنىمدىلىكتى ارتتىرۋ جانە ماقساتتارعا جەتۋ ءۇشىن شابىتتانۋ - قاراپايىم ىستەر بولعانىمەن، پايداسى وتە زور. ەگەر سىزگە اۋىر تيەتىن بولسا، كۇندەلىكتى بىرنارسە جازىپ وتىرۋ مىندەتىن بىردەن الماڭىز. مۇنىمەن قانشا ۋاقىت اينالىسقانىڭىز ەمەس، ءماتىن قۇراۋ ءۇردىسىنىڭ ءوزى ماڭىزدى. سوندىقتان، بۇل ءىستى اۋەلى اپتاسىنا بىرنەشە رەت قانا قولعا الساڭىز جەتكىلىكتى. تايمەر بەلگىلەڭىز، وزىڭىزگە جەڭىل تاقىرىپ تاڭداڭىز. مىسالى، «مەن بۇل كۇننەن نە كۇتەمىن؟». سودان كەيىن ويىڭىزدا نە بار، سونى جازىڭىز. كوپ ۇزاماي كەلەسى جازبا جازۋدى تاعاتسىزدانا كۇتەرىڭىزگە سەنىمدىمىز.

وسى ادىستەردى قولدانىپ كوردىڭىز بە الدە سىزگە باسقا نارسە كومەكتەسە مە؟ پىكىر، الماسىپ، ءوز كەڭەستەرىڭىزبەن بولىسىڭىزدەر.