قازاقستاندا بىلتىر 129,5 توننا وڭدەلمەگەن التىن وندىرىلگەن

استانا. قازاقپارات - ءدال وسىنداي اتاۋمەن ەلىمىزدىڭ باس شاھارىندا قازاقستاننىڭ التىن ءوندىرۋشى ونەركاسىپشىلەرىنىڭ «سالانى دامىتۋدىڭ نارىقتىق تەتىكتەرىن ەنگىزۋ: بارلاۋ، ءوندىرۋ، ساتۋ» اتتى فورۋمى ءوتتى. اۋقىمدى جيىنعا ق ر يندۋستريا جانە ينفراقۇرىلىمدىق دامۋ ۆيتسە- ءمينيسترى يران شارحان قاتىستى، دەپ حابارلايدى قازاقپارات.

ۆيتسە- ءمينيستردىڭ ايتۋىنشا، بىلتىر وتاندىق كاسىپورىندار 129,5 توننا كولەمىندە وڭدەلمەگەن التىن وندىرگەن. بۇل 2021 -جىلداعى كورسەتكىشتەن % 12,8- عا كوپ.

«ەلىمىزدە التىن ءوندىرۋ كاسىبى وتاندىق تاۋ- كەن سەكتورىنداعى نەگىزگى سالالاردىڭ ءبىرى بولىپ سانالادى. 2022 -جىل قازاقستاننىڭ التىن ءوندىرۋ ونەركاسىبى ءۇشىن تابىستى جىل بولدى. مىسالى، قۇرامىندا التىن بار كەن ورىندارىن يگەرۋ ايتارلىقتاي ۇلعايىپ، اتاپ ايتقاندا 39,4 ميلليون تونناعا دەيىن باعالى مەتالل ءوندىرىلىپ، بۇل بىلتىرعى كولەمنەن % 18,3- عا كوپ بولىپ شىقتى» ، - دەدى ي. شارحان.

سونداي- اق ي. شارحان قازاقستاننىڭ اففيناجدى زاۋىتتارى شەتەلدىك كاسىپورىندارعا توللينگ قىزمەتىن ۇسىنىپ كەلە جاتقانىن جەتكىزدى. اتالعان كاسىپورىندار لوندون مەتالدار بيرجاسىنىڭ Good Delivery مارتەبەسىنە يە. بۇل ءوز كەزەگىندە وتاندىق وندىرۋشىلەردىڭ جوعارى تەحنولوگيالىق ءوندىرىستى جولعا قويعاندارىن دالەلدەپ، سونداي- اق شەتەلدىك ينۆەستورلاردىڭ الدىندا ۇلكەن سەنىمگە يە بولعاندارىن كورسەتىپ وتىر.

قازىر ەلىمىزدەگى رەسۋرستىق بازا وندىرىستىك قۋاتتى ارتتىرۋعا جول اشىپ وتىرعانىن ايتا كەتەيىك. ماسەلەن، 2022 -جىلى اقمولا وبلىسىنداعى رايگورودوك كەن ورنىن يگەرىپ جاتقان RG Gold التىن ءوندىرۋشى كومپانياسى جاڭا تاۋ- كەن مەتاللۋرگيالىق كەشەنىن ىسكە قوستى. كاسىپورىن جىلىنا 5 ميلليون تونناعا دەيىن شيكىزاتتى وندىرۋگە قاۋقارلى.

بۇدان بولەك شامامەن 11 ميلليارد تەڭگە مولشەرىندەگى ينۆەستيتسياعا 600-دەن اسا تۇراقتى جۇمىس ورنىن اشۋدى كوزدەيتىن ءبىرقاتار جوبا ىسكە اسىرىلىپ كەلەدى.