نۇر-سۇلتان بلوكپوستتارىندا ءتارتىپ بۇزعان 128 ادام جازالاندى
ونىڭ 99 ى قاماۋعا الىنىپ، 19 ازاماتقا ايىپپۇل سالىندى، تاعى 10 ءىس سوت قاراۋىنا جولداندى، دەپ حابارلايدى قازاقپارات نۇر-سۇلتان قالاسى اكىمدىگىنىڭ رەسمي سايتىنا سىلتەمە جاساپ.
«30- ناۋرىزدان باستاپ توتەنشە جاعداي رەجيمى كۇشەيتىلدى. نۇر-سۇلتان قالالىق پوليتسيا دەپارتامەنتى ينفەكتسيا تارالۋىنىڭ الدىن الۋ ماقساتىندا بارلىق قاجەتتى شارالار قابىلداۋدا. پاترۋل پوليتسيا جاساقتارى كوبەيتىلدى. ازاماتتاردىڭ جانە اۆتوكولىكتەردىڭ قوزعالىسى قالانىڭ بارلىق اۋدانىندا قاتاڭ باقىلاۋعا الىندى»، دەيدى قالالىق پوليتسيا دەپارتامەنتىنىڭ باسپا ءسوز وكىلدەرى.
سونداي-اق قالادا تاۋلىك بويى كەزەكشىلىك جۇمىس ىستەيدى. موبيلدى توپتار جۇمىلدىرىلعان. بلوك پوستتاعى جاعداي درون ارقىلى باقىلانادى.
قالا اۋماعى كوشەلەر بويىنشا بىرنەشە بولىككە بولىنگەن. وندا ءتارتىپ ساقشىلارى جاعدايدى قاداعالاپ وتىرادى.
قالادا جالپى سانى 26 بلوكپوست قويىلعان.
ايتا كەتسەك، 28- ناۋرىزدان باستاپ ەلوردا تۇرعىندارىنا ازىق-تۇلىك الۋعا، مەديتسينالىق قىزمەتكە جۇگىنۋگە نەمەسە ءدارى-دارمەك ساتىپ الۋعا جانە ارنايى رۇقسات بويىنشا جۇمىسقا بارۋعا رۇقسات ەتىلەدى.
قالعان ازاماتتاردىڭ ۇيدەن شىعۋىنا شەكتەۋ قويىلدى. كامەلەت جاسقا تولماعاندار ەرەسەكتەردىڭ قاراۋىنسىز قالادا جۇرۋگە بولمايدى. وتباسى مۇشەلەرىن قوسپاعاندا، كوشەدە 3 ادامنان ارتىق توپتالىپ جۇرۋگە تىيىم سالىنعان.