تۇركيادان جەتكىزىلگەن 125 وكپەنى جاساندى جەلدەتۋ اپپاراتى جۇكتى الۋشىلارعا تابىستالدى
وسىعان قاتىستى ءمان- جايدى قارجى مينيسترلىگىنىڭ مەملەكەتتىك كىرىستەر كوميتەتى
«وسى جىلدىڭ 14 - شىلدەسىندە ساعات 02-30-دا نۇر- سۇلتان قالاسىنىڭ اۋەجايىنا تۇركيادان گۋمانيتارلىق جۇك كەلدى. جۇكتى الۋشىلار - «س ك- فارماتسيا» ج ش س، «ايدىڭ نۇرى» قايىرىمدىلىق قورى مەن «وتانداستار» قورى سانالادى. 12 توننادان استام جۇك ءدارى- دارمەك، مەديتسينالىق قورعانىس قۇرالدارىن جانە وكپەنى جاساندى جەلدەتۋ اپپاراتتارىن قامتيدى. ۇشاقتان جۇكتى ءتۇسىرۋ 14 - شىلدە كۇنى ساعات 4:00-دە اياقتالدى. كەيىن اتالعان جۇك اۋەجاي قويماسىنا ورنالاستىرىلدى. ساعات 10:00-دە تاۋار الۋشىلاردىڭ وكىلدەرى كەلگەننەن كەيىن جەڭىلدەتىلگەن تارتىپتە كەدەندىك راسىمدەۋ جۇرگىزىلدى. بارلىق كەدەندىك راسىمدەر 10 مينۋتتىڭ ىشىندە جاسالدى. تاڭعى ساعات 11:00 شاماسىندا جۇك اۋەجايدان بىرنەشە توپتامامەن اكەتىلدى» دەلىنگەن كوميتەت تاراتقان اقپاراتتا.
بۇل رەتتە مەملەكەتتىك كىرىستەر كوميتەتى سەرتيفيكاتتاۋعا جاتاتىن تاۋارلاردى اكەلۋ بارىسىندا كەدەندىك رەسىمدەۋ ءۇشىن رۇقسات قۇجاتتارىن ۇسىنۋ قاجەتتىگىن اتاپ كورسەتەدى.
«سەبەبى ءبىزدىڭ ازاماتتاردىڭ ءومىرى مەن دەنساۋلىعى مەديتسينالىق پرەپاراتتار مەن بۇيىمداردىڭ ساپاسىنا تىكەلەي تاۋەلدى، ال بۇل - ەڭ ماڭىزدى تالاپ. ساپاسىز پرەپاراتتار مەن بۇيىمداردى قولدانۋ پاندەميا كەزىندە قوسىمشا قاۋىپ- قاتەر تۋعىزادى. مەملەكەتتىك كىرىستەر ورگاندارى تاۋارلاردى جەدەل كەدەندىك رەسىمدەۋگە كۇش جۇمىلدىرادى جانە قاجەتتى قۇجات ۇسىنىلعان كەزدە گۋمانيتارلىق كومەك دەرەۋ شىعارىلادى. وسىعان بايلانىستى بارلىق كەدەن بەكەتتەرى تاۋلىك بويى جۇمىس جاسايدى. ولار قاجەتتى قۇجاتتاردى ۇسىنۋ جونىندە كەڭەس بەرەدى. كاسىپكەرلىك سۋبەكتىلەرىن جانە قوعامدىق بىرلەستىكتەردى قانداي دا ءبىر تۇسىنبەۋشىلىكتەردى، تولقۋلاردى بولدىرماۋ ماقساتىندا قاجەتتى كەڭەس الۋ ءۇشىن الدىن الا جۇگىنۋدى سۇرايمىز. سونداي- اق، 1414، 8000807777- بايلانىس تەلەفونى ارقىلى مەملەكەتتىك كىرىستەر كوميتەتىنىڭ كونتاكت- ورتالىعىنا جۇگىنۋگە بولادى» دەدى ۆەدومستۆودان.
اۆتور: مارلان جيەمباي