الماتىلىقتار بەيىمبەت مايليننىڭ 125 جىلدىعىنا ارنالعان سپەكتاكلدى تاماشالادى
قويىلىم مۇحتار اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ ساحناسىندا كورسەتىلدى. سپەكتاكلدى تاماشالاۋعا عالىمدار، زيالى قاۋىم وكىلدەرى، جازۋشىنىڭ ۇرپاقتارى، ۇستازدار مەن جاستار كەلدى.
ءىلياس وماروۆ اتىنداعى قوستاناي وبلىستىق قازاق دراما تەاترىنىڭ ارتىستەرى كورەرمەندەرگە جازۋشىنىڭ بالالىق شاعىن، جاس كەزىن جانە ءومىرىنىڭ سوڭعى جىلدارىن كورسەتە الدى. باس كەيىپكەردىڭ ءرولىن نۇرلان بايشين سومدادى.
«سپەكتاكلدە ونىڭ ءومىربايانى كوپ باياندالادى. ارتىستەر جازۋشى ءومىرىنىڭ سوڭعى جىلدارىن كورەمەندەرگە شىنايى كورسەتىپ، شەبەر جەتكىزە ءبىلدى. ول كەزدە ونىڭ شىعارمالارىن مۇحتار اۋەزوۆ، ءىلياس جانسۇگىروۆ، ساكەن سەيفۋللين جانە باسقا دا كورنەكتى تۇلعالار جوعارى باعالاعان»، - دەيدى قازاقستان جازۋشىلار وداعى ءتوراعاسىنىڭ ورىنباسارى باۋىرجان جاقىپ.
پەسانىڭ رەجيسسەرى ءاليا بايماحان بۇل قويىلىم قازاقتىڭ كورنەكتى جازۋشىسى بەيىمبەت مايليننىڭ شىعارماشىلىق مۇراسى ۇلتتىق بىرەگەيلىكتى ساقتاۋعا، وسكەلەڭ ۇرپاقتىڭ بويىندا رۋحاني-اعارتۋشىلىق قۇندىلىقتاردىڭ دامۋىنا ىقپال ەتەتىندىگىن اتاپ ءوتتى.
«ءبىز كوپتەگەن زەرتتەۋلەر جۇرگىزدىك، كىتاپحانالار مەن مۇراعاتتاردان اقپارات ىزدەدىك، ءارتۇرلى ادامدارمەن سويلەستىك. ءبىز ونىڭ ءومىرىن تەك جازۋشى رەتىندە عانا ەمەس، سونىمەن بىرگە كۇيەۋ، اكە رەتىندە دە كورسەتكىمىز كەلدى. جاستار ءوز تاريحىن ۇمىتپاۋى كەرەك جانە تاۋ تۇلعالار تۋرالى ءبىلۋى ءتيىس. بۇل وتە ماڭىزدى. جازۋشىنىڭ ءومىرى قيىن جانە ءتۇرلى وقيعالارعا تولى بولدى، ول كوپتەگەن جاعدايلاردى باستان وتكەردى. بەيىمبەت مايلين ءوز حالقىنىڭ، ءوز ەلىنىڭ ناعىز پاتريوتى بولعان دەپ سانايمىن»، - دەدى رەجيسسەر.
قويىلىم سوڭىندا، بەيىمبەت مايليننىڭ نەمەرەسى دامەن سەيتجانوۆا اكتەرلەر مەن كورەرمەندەرگە العىسىن ءبىلدىردى.
بۇعان دەيىن، سپەكتاكل پرەمەراسى قوستاناي وبلىسىندا جازۋشىنىڭ تۋعان جەرىندە قويىلعان بولاتىن. الداعى ۋاقىتتا ەلىمىزدىڭ باسقا ايماقتارىندا كورسەتىلەدى.