باياناۋىلدا سۇلتانماحمۇت تورايعىروۆتىڭ 125 جىلدىعى تويلانۋدا
باياناۋىل اۋدانى تورايعىر اۋىلىندا وتكەن تويعا 3 مىڭعا جۋىق ادام جينالدى. پاۆلودار وبلىسىنىڭ 13 اۋدانى مەن قالالارى ءارقايسىسى ءبىر كيىز ۇيدەن تىكتى. توي قوناقتارى ءۇشىن التىباقان ورناتىلىپ، مەرەكەلىك ساۋدا-ساتتىق ۇيىمداستىرىلدى. قازاقتىڭ ۇلتتىق ويىندارى - قازاقشا كۇرەس پەن توعىزقۇمالاقتان سايىس وتكىزىلدى.
دەمالىس كۇندەرىن باياناۋىل تاۋلارىندا وتكىزۋگە بەل بايلاعانداردىڭ قاتارىندا پاۆلوداردان وزگە دە وبلىستىڭ تۇرعىندارى بولدى.
«توي تۋرالى دوستارىمىزدان ەستىدىك، - دەيدى قاراعاندىلىق قايىربەك جولامانوۆ. - ءبىز ويلانباستان وسى جاققا بەت الدىق. بارلىعى ۇناپ جاتىر. سۇلتانماحمۇد تورايعىروۆ - اقىن عانا ەمەس، قازاقتىڭ ماڭدايىنا بىتكەن باعى. تاريحي تۇلعانى تۋعان جەرىندە ۇلىقتاپ، مۇرالارىن قاستەرلەپ ساقتاپ وتىرعاندارى قۋانتادى».
توي قوناقتارى باۋىرساق پەن قىمىزدان ءدام تاتتى. قازاقتىڭ ۇمىت بولا باستاعان 50 تاعامىن قالىپقا كەلتىرگەن ەتنوگراف ايگەرىم مۋساعاجينوۆانىڭ ايتۋىنشا، قازاقتىڭ اس ءمازىرى ەت پەن باۋىرساقتان عانا تۇرمايدى.
«ۇلتتىق تاعامنىڭ ءتۇرى كوپ. ءبىزدىڭ قالىپقا كەلتىرگەن ءار رەتسەپتىمىزدىڭ ءوز ماعىناسى بار. مىسالى، ەر ادامدار عانا دايىنداپ، وزدەرى قورەكتەنەتىن تاعام ءتۇرى بار. وزگە تاعامدار وتباسىنداعى بايلانىستى كورسەتەدى. مىسالى، اناسى مەن قىزىنىڭ، ەنەسى مەن كەلىنىنىڭ قارىم-قاتىناسىن بىلدىرەتىن اس-اۋقات بارشىلىق»، - دەيدى «حالىق قازىناسى» عىلىمي-زەرتتەۋ ورتالىعىنىڭ قىزمەتكەرى.
اقىننىڭ مەرەي تويىنا وراي سۇلتانماحمۇد تورايعىروۆقا جىر جولدارىن ارناعان جازبا اقىندار اراسىندا ءمۇشايرا وتكەن بولاتىن. اتالمىش بايقاۋدىڭ جەڭىمپازدارى ونلاين داۋىس بەرۋ ناتيجەسىندە انىقتالىپ، ەتنواۋىلدىڭ باستى ساحناسىندا ەسىمدەرى اتالدى. باس جۇلدەگە شىعىس قازاقستان اقىنى راۋان قابيدولدين قول جەتكىزدى. ءبىرىنشى ورىن شىمكەنتتىك باتىرحان سارسەنحانعا بۇيىردى. ەكىنشى ورىندى استانالىق قارلىعاش قاباي مەن ۇمتىل زارىققان ۇلى ءبولىستى. ءۇشىنشى ورىنعا الماتىلىق ايدانا مايساربەك قىزى، كوكشەتاۋلىق قايرات سەيتقازين جانە پاۆلودارلىق جارقىنبەك امانتاي تابان تىرەدى.