تالدىقورعاندا شەنەۋنىكتەر 1218 پاتەردى زاڭسىز تاراتقان
تالدىقورعاندا شەنەۋنىكتەر 1200 دەن استام پاتەردى زاڭسىز تاراتىپ جىبەرگەن. قازىردىڭ وزىندە سوت ارقىلى 59 پاتەر كەرى قايتارىلدى. بۇل باسپانا كەزەكتە تۇرعان ادامدارعا بەرىلەدى. تاعى 500 گە جۋىق پاتەردىڭ يەلەرى مۇلىكتى زاڭداستىرىپ ۇلگەرگەن.
جەتىسۋ وبلىسى بويىنشا سىبايلاس جەمقورلىققا قارسى قىزمەتتىڭ تەرگەۋ ءبولىمى باستىعىنىڭ ايتۋىنشا، مەملەكەتتىك قىزمەتكەرلەرگە قاتىستى قىلمىستىق ءىس قوزعالعان. ءىس تولىق تەرگەلمەيىنشە، تۇرعىن ءۇي-كوممۋنالدىق شارۋاشىلىق ءبولىمىنىڭ بىرنەشە جاۋاپتى قىزمەتكەرى ءۇيقاماققا الىندى.
قايتارىلعان پاتەرلەر كەزەكتە تۇرعان ازاماتتارعا بەرىلەدى. ءۇيدى وڭدى سوڭدى ۇلەستىرىپ، جەكەشەلەندىرۋ قۇجاتىن جاساعان مەملەكەتتىك قىزمەتكەرلەر جازاسىز قالمايدى.
«قازىرگى تاڭدا قىلمىستىق ءىس تالدىقورعان قالاسىنىڭ اكيماتىنىڭ لاۋازىمدى تۇلعالارىنا قاتىستى جۇرگىزىلۋدە. ونىڭ ىشىندە بىرنەشە ادام تۇرعىن ءۇي ءبولىمىنىڭ قىزمەتكەرلەرى قازىرگى تاڭدا كۇدىكتى رەتىندە تانىلعان. 2013 - 2021 -جىلدار ارالىعىندا بولعان جاعدايلار ولار. سول ارالىقتا بىرنەشە پاتەردى زاڭسىز شەتتەتۋ فاكتىلەرى بويىنشا ايىپ تاعىلدى»، دەيدى جەتىسۋ وبلىستىق سىبايلاس جەمقورلىققا قارسى ءىس-قيمىل دەپارتامەنتى تەرگەۋ باسقارماسىنىڭ باسشىسى ايدوس جەتپىسبايەۆ.
«ءبىز بۇل جۇمىستى نەگىزىندە الدىڭعى جىلى كۇزگە دەيىن ءبىتىرۋىمىز كەرەك بولاتىن. حالىققا دا ءسويتىپ ەسەپ بەرگەنبىز. ءبىراق مۇنىڭ بىلايشا ايتقاندا ماسشتابىن كورمەدىك. قازىرگى تاڭدا ماسشتابى ۇلكەن بولىپ وتىر. وسىعان بايلانىستى جۇمىس اۋقىمى دا كوبەيىپ وتىر. تالدىقورعان قالاسىنىڭ اكىمشىلىگى، ءبىزدىڭ پروكۋراتۋرا بار وبلىستىق، قالالىق پروكۋراتۋرا جانە سىبايلاس جەمقورلىققا قارسى كۇرەس دەپارتامەنتى وكىلدەرى دە بار. وسى ءۇش مەكەمە بولىپ وسى ماسەلەنىڭ انىق- قانىعىنا جەتۋ ماسەلەلەرىن انىقتاپ جاتىرمىز»، دەيدى تالدىقورعان قالاسىنىڭ اكىمى اسەت ماسابايەۆ.