اقپان ايىندا جەتىسايلىق ديقاندار 120 توننا قىرىققابات جينادى

تۇركىستان. قازاقپارات - تۇركىستان وبلىسىنىڭ جەتىساي اۋدانىندا اعىمداعى جىلى 900 گەكتارعا قىرىققابات كوشەتتەرى وتىرعىزىلعان.

جەرگىلىكتى ديقاندار اقپان ايىندا 120 توننا قىرىققاباتتى جيناپ، ساۋداعا شىعاردى، دەپ حابارلايدى قازاقپارات ءتىلشىسى.

جالپى اۋىلشارۋاشىلىعى ماقساتىنداعى جەر كولەمى 78500 گەكتاردى قۇرايدى. وتكەن جىلى اۋداندا 1170 گەكتارعا قىرىققابات ەگىلىپ، ودان 36 مىڭ توننا ءونىم جينالعان. جاڭا ءداۋىر ەلدى مەكەنىندە ورنالاسقان «شابلان» شارۋا قوجالىعى جىل سايىن كوكونىستىڭ وسى ءتۇرىن ەگۋمەن اينالىسادى.

بيىل قوجالىق 3,5 گەكتارعا قىرىققابات ەگىپ، قازىرگى تاڭدا ودان 70 توننا جيناپ العان. ال، نۇربول امەتوۆ ەسىمدى شارۋا 50 توننا ءونىم جيناعان. ديقاندار الىنعان ونىمدەرىن جەرگىلىكتى بازارلارعا جانە رەسپۋبليكانىڭ وزگە وڭىرلەرىنە جونەلتكەن.

ودان بولەك، بىلتىر اۋداندا 65,5 ميلليارد تەڭگە اۋىل شارۋاشىلىعى ونىمدەرى وندىرىلگەن. اتالعان سالاعا وتكەن جىلى 2 ميلليارد 600 ميلليون تەڭگەنىڭ ينۆەستيتسياسى تارتىلىپ، 2019-جىلمەن سالىستىرعاندا اتالعان سالاعا تارتىلعان ينۆەستيتسيا كولەمى ەكى ەسەگە ارتقان.

ايتا كەتەرلىگى، كۇزگى جانە كوكتەمگى دالا جۇمىستارىن جۇرگىزۋگە ۇكىمەت تاراپىنان جەڭىلدەتىلگەن باعادا بولىنگەن 9500 توننا جانار-جاعارماي شارۋالارعا ۇلەستىرىلگەن.