استانا ماڭىنا بيىل 120 مىڭعا جۋىق تال-تەرەك ەگىلەدى
بۇل تۋرالى بۇگىن ءوزىنىڭ Instagram پاراقشاسىندا نۇر-سۇلتان اكىمى التاي كولگىنوۆ جازدى، دەپ حابارلايدى قازاقپارات.
«ەلوردانى «نۇر-سۇلتان-جايلى قالا» شەبەر - جوسپارىنىڭ تۇجىرىمداماسى اياسىندا دامىتىپ جاتىرمىز. بيىل جاسىل ايماقتار ايتارلىقتاي ۇلعايادى. ەكولوگيانى جاقسارتۋ مەن قالا تۇرعىندارىنىڭ ۋاقىت وتكىزۋىنە قولايلى ورىن قۇرۋ ءۇشىن نۇر-سۇلتاندى كوگالداندىرامىز. بۇدان باسقا، اۋلالار مەن قوعامدىق ورىنداردا (ساياباقتار، سكۆەرلەر، بۋلۆارلار) اعاش وتىرعىزۋدى جالعاستىرامىز. سونىمەن بىرگە «قازاق ەلى» الاڭى، بەيبىتشىلىك جانە كەلىسىم سارايى، وقۋشىلار سارايى، ۆوكزال، اۋەجاي، س و و، تۇراق كەڭىستىگى جانە ت. ب. اۋماقتاردا اعاش وتىرعىزۋدى جوسپارلاپ وتىرمىز.
مەملەكەت باسشىسىنىڭ تاپسىرماسىنا سايكەس، قالانى كوگالداندىرۋعا ەرەكشە كوڭىل بولەمىز. جالپى بيىل 120 مىڭعا جۋىق جاسىل جەلەك (اعاشتار، بۇتالار) وتىرعىزۋدى جوسپارلاپ وتىرمىز. ەلوردانىڭ جاسىل بەلدەۋىندە 450 مىڭنان استام كوشەت بار. پاندەميا بىزگە دەنساۋلىقتى ساقتاۋ جانە سپورتپەن شۇعىلدانۋ قانشالىقتى ماڭىزدى ەكەنىن كورسەتتى. مەديتسينا قىزمەتكەرلەرى، مۇعالىمدەر، قۇتقارۋشىلار جانە باسقالار كوروناۆيرۋسپەن كۇرەستە الدىڭعى قاتاردا بولدى.
پەداگوگتار، دارىگەرلەر مەن قۇتقارۋشىلاردىڭ قۇرمەتىنە تاقىرىپتىق گۇلزارلار مەن پاركتەر اشىپ، ولاردى اباتتاندىرۋدى جوسپارلاپ وتىرمىز»، - دەپ جازدى شاھار باسشىسى.
سونىمەن قاتار ونىڭ ايتۋىنشا، «استانا بالەت» ماڭىنداعى اۋماقتا جاسىل باق، «استانا وپەرا» اۋماعىندا ەمەن باعى، ال ترياتلون پاركتە سيرەن باعى سالىنباق. قالا تۇرلەنە تۇسەدى.
«ەلوردانىڭ ءار اۋدانىن كوگالداندىرامىز. ەلباسى سۇحباتىندا ەلوردانىڭ باس جوسپارى عيماراتتاردىڭ، جاسىل جەلەكتەر مەن ورماننىڭ سيمبيوزى رەتىندە جاسالعانىن اتاپ ءوتتى. بۇل تاقىرىپتى جالعاستىرامىز، قالا تۇرعىندارىنىڭ قاتىسۋىمەن سەنبىلىكتەر، ەكواكتسيالار وتكىزەمىز. قالانى كوگالداندىرۋعا اركىم ءوز ۇلەسىن قوسا الادى. قۇرمەتتى قالا تۇرعىندارى مەن قوناقتارى! سىزدەر قاي جەردە كوبىرەك جاسىل جەلەكتى كورگىلەرىڭىز كەلەدى، قالانىڭ قانداي اۋداندارى مەن ورىندارىن كوگالداندىرۋ قاجەت؟»، - دەيدى التاي كولگىنوۆ.