ەلوردادا سانيتارلىق نورمالاردى ساقتاماعان 120 نىسان جابىلدى

نۇر- سۇلتان. قازاقپارات - نۇر- سۇلتاندا كەلۋشىلەرگە كاليان ۇسىنعان بار جابىلدى. بۇل تۋرالى قازاقپارات اكىمدىكتىڭ instagram پاراقشاسىنا سىلتەمە جاساپ حابارلايدى.

«اكىمدىكتىڭ موبيلدى توبى پوليتسەيلەر جانە ەپيدەميولوگتارمەن بىرگە كۇن سايىن سانيتارلىق نورمالاردى بۇزعان مەكەمەلەردى انىقتاۋ ءۇشىن رەيد جۇرگىزەدى. 2 - ماۋسىمدا مونيتورينگپەن 50-دەن استام نىسان قامتىلدى. ونىڭ ىشىندە كولىك جۋۋ، دۇكەندەر، ءدامحانالار، بارلار جانە ت. ب. بار.

سانيتارلىق نورمالاردى ساقتاماعان 4 نىسان جابىلدى. ماسەلەن، «مياتا» لاۋندج- بارىندا (قابانباي باتىر داڭعىلى) كەلۋشىلەرىنە كاليان ۇسىنىلعانى انىقتالىپ، مەكەمە جابىلدى.

اتالعان نىساندار سانيتارلىق- ەپيدەميولوگيالىق نورمالاردىڭ قاتاڭ ساقتالۋىن قاماتاماسىز ەتپەيىنشە جابىق بولادى. مۇنداي قاتاڭ شارا كوروناۆيرۋستىڭ تارالۋىنا جول بەرمەۋ ءۇشىن قابىلداندى.

بۇعان دەيىن نۇر- سۇلتاندا سانيتارلىق نورمالاردى ساقتاماعان 120 نىسان جابىلدى، ونىڭ ىشىندە قۇرىلىس كومپانيالارى دا بار. 150 نىسان ەسكەرتۋ الىپ، ءبىرقاتارىنا ايىپپۇل سالىندى.

ەلوردادا ماسكا تاعۋ رەجيمى ءالى دە ساقتالۋدا. اۆتوبۋستار، دۇكەندەر جانە باسقا دا ادام كوپ جينالاتىن جابىق جەرلەردە ماسكا كيىپ، اراقاشىقتىق ساقتاپ، انتيسەپتيكتى پايدالانۋ قاجەت. تۇرعىندار سانيتارلىق- ەپيدەميولوگيالىق نورمالاردى ساقتاماسا، قالادا كۇشەيتىلگەن كارانتين رەجيمىن ەنگىزۋگە تۋرا كەلەدى.