قاسىم- جومارت توقايەۆ: قازاقستان ءونىمى الەمنىڭ 120 ەلىنىڭ نارىعىنا جەتكىزىلۋدە
جيىنعا ۇلتتىق ينۆەستورلار كەڭەسىنىڭ مۇشەلەرى، پرەزيدەنت اكىمشىلىگى مەن مەملەكەتتىك ورگانداردىڭ باسشىلىعى، «اتامەكەن» ۇلتتىق كاسىپكەرلەر پالاتاسى پرەزيديۋمىنىڭ مۇشەلەرى، ۇلتتىق كومپانيالار مەن قازاقستاندىق بيزنەس وكىلدەرى قاتىستى.
مەملەكەت باسشىسى جەكە باستاما مەن ەركىن كاسىپكەرلىك - ەكونوميكانى دامىتۋدىڭ جانە ەلىمىزدىڭ ءال- اۋقاتىن ارتتىرۋدىڭ نەگىزگى فاكتورلارى ەكەنىن اتاپ ءوتتى. بۇل فاكتورلار بۇگىنگى وتىرىستىڭ تاقىرىبىن «كاسىپكەرلىكتى دامىتۋ - ەل ەكونوميكاسىن جاڭعىرتۋدىڭ نەگىزى» دەپ اتالۋىنا تۇرتكى بولعانىن ايتتى.
- بىلتىرعى جىل ءبىزدىڭ بيزنەس ءۇشىن تابىستى بولدى. ناقتى جۇمىس ىستەيتىن شاعىن جانە ورتا بيزنەس سۋبەكتىلەرىنىڭ سانى 11 پايىزعا كوبەيىپ، 1,3 ميلليونعا جەتتى. شاعىن جانە ورتا بيزنەس وندىرەتىن ءونىم كولەمى 14 پايىزعا ارتىپ، 26,5 تريلليون تەڭگەنى قۇرادى. ەكونوميكاداعى بۇل سالانىڭ ۇلەسى وتكەن جىلعى كورسەتكىش بويىنشا 25,6 پايىزدان 28,3 پايىزعا دەيىن ءوستى. بۇل جامان كورسەتكىش ەمەس. قازاقستاندا بۇرىن وندىرىلمەگەن 500-دەن استام ءونىم تۇرلەرى شىعارىلا باستادى. ەكسپورتتىڭ تارالىم اۋماعى كەڭەيۋدە، وتاندىق ونىمدەر الەمنىڭ 120 ەلىنىڭ نارىعىنا جەتكىزىلۋدە. ءبىراق، جەتىستىكتەرمەن بىرگە، ءبىرقاتار شەشىمىن كۇتكەن ماسەلە دە بار. بۇل - ىسكەرلىك احۋال، تاۋارلاردى وتكىزۋ نارىعى، قارجىلاندىرۋدىڭ قول جەتىمدىلىگى سياقتى ماسەلەلەر، - دەدى قاسىم- جومارت توقايەۆ.
قازاقستان پرەزيدەنتى قولايلى ىسكەرلىك ورتانى، بيزنەسكە ءتيىمدى قولداۋ كورسەتۋدى جانە باسەكەلەستىكتى قورعاۋدى قامتاماسىز ەتۋ جونىندە ءبىرقاتار مىندەتتى بەلگىلەپ بەردى. باياندامادا قازاقستان كومپانيالارىنىڭ قارجىلىق تۇراقتىلىعىن ارتتىرۋ جانە وتاندىق كاسىپكەرلەردىڭ بيزنەس- داعدىسى مەن قۇزىرەتىن جەتىلدىرۋ ماسەلەلەرىنە ەرەكشە نازار اۋدارىلدى.
سوڭىندا قاسىم- جومارت توقايەۆ ەلىمىزدىڭ جوعارى باسشىلىعى وتاندىق بيزنەسپەن جۇيەلى ديالوگ جۇرگىزۋ ءۇشىن ۇلتتىق ينۆەستورلار كەڭەسى تۇراقتى جۇمىس ىستەيتىن الاڭ بولۋى ءتيىس ەكەنىن ايتىپ، ۇكىمەتكە كەڭەس جۇمىسىنىڭ جاڭا فورماتىن بەكىتۋ جونىندە جارلىق جوباسىن ازىرلەۋدى تاپسىردى.