فرانسيادا ساعاتىنا 1200 ك م جىلدامدىقپەن جۇرەتىن پويىز سىناقتان وتپەك

استانا. قازاقپارات - كانادانىڭ TransPod كومپانياسى بولاشاقتىڭ Hyperloop تەحنولوگياسىنىڭ سىناق ترەكىن ورناتۋ ءۇشىن فرانسياداعى شاعىن ەلدى مەكەندەردىڭ ءبىرىن تاڭدادى. قوندىرعىنى ورناتۋدىڭ قۇنى 21 ميلليون ەۋرونى قۇراۋى مۇمكىن، ول كەلەر جىلى باستالۋى ءتيىس، دەپ حابارلايدى euronews.com.

قازىرگى رەكورد فرانسيانىڭ TGV پويىزىنا تيەسىلى (574,8 ك م/س ا ع) . بۇل رەكورد ليموجدان 50 شاقىرىم جەردە ورنالاسقان درۋ شاعىن ەلدى مەكەنىندە جاڭارتىلۋى مۇمكىن. 2015 -جىلى قۇرىلعان TransPod فرانسيا بيلىگىنە ءوتىنىش بەرىپ، سىناق الاڭىن سالۋعا رۇقسات الماق.

«ليسەنزيا قاراشادا ماقۇلدانۋى ءتيىس. ال مونتاجداۋ جۇمىستارى 2019 -جىلعى قاڭتاردا باستالادى»، - دەيدى TransPod كومپانياسىنىڭ باس ديرەكتورى سەباستيان گەندرون.

امەريكالىق بەلگىلى كاسىپكەر يلون ماسك قولداپ وتىرعان Hyperloop تەحنولوگياسى جولاۋشى نەمەسە جۇك تاسىمالداۋعا ارنالعان، ساعاتىنا 1200 ك م جىلدامدىقپەن جۇرەتىن الىپ كاپسۋلالاردى جاساۋعا ماماندانعان.