قىتايدا داۋىلدان 12 ادام قازا تاۋىپ، 400-دەن استامى زارداپ شەكتى

بەيجىڭ. قازاقپارات - قىتايدىڭ ۋحان جانە سۋجوۋ قالالارىندا جويقىن تورنادودان 12 ادام قازا تاۋىپ، 400-دەن استام تۇرعىن جاراقات الدى، دەپ حابارلايدى قازاقپارات Global Times باسىلىمىنا سىلتەمە جاساپ.

قىتاي گازەتى تاراتقان مالىمەتكە سەنسەك، ورتالىق قىتايدىڭ حۋبەي پروۆينتسياسىندا ورنالاسقان ۋحان قالاسىندا تابيعات اپاتىنان 8 ادام مەرت بولعان، 280 ادام زارداپ شەكتى. سەنبى كۇنى تاڭەرتەڭ كۇشتى جەل مەن قۇيىننان 480 تۇرعىن ءۇي قيراپ، زاقىمدانعان. 8 مىڭ شارشى مەتر اۋماقتا قۇرىلىس الاڭىنداعى ۋاقىتشا عيماراتتار وپىرىلىپ قالدى. سول كۇنى ۋحاننىڭ تيانحە حالىقارالىق اۋەجايىندا 87 رەيس كەشىگىپ ۇشتى، تاعى 123 رەيس مۇلدە كەيىنگە قالدى. شىعىس قىتايداعى جياڭسۋ پروۆينتسياسىنىڭ سۋجوۋ قالاسىندا داۋىلدان 4 ادام كوز جۇمدى. 149 تۇرعىن جاراقات الدى. ۇسكىرىك جەلدىڭ ەكپىنى سەكۋندىنا 23,9 مەترگە جەتكەن.