22:02, 03 - قازان 2018 | GMT +6
ايگىلى ەپپل دۇكەنى 12 ساعاتتا 2 رەت تونالدى
استانا. قازاقپارات - ا ق ش-تىڭ كاليفورنيا شتاتى، پالو-التو قالاسىندا تەك Apple كومپانياسىنىڭ ونىمدەرىن ساتاتىن دۇكەنگە شابۋىل جاسالعان.
العاشقى شابۋىل 22 -قىركۇيەك كۇنى كەشكى 7 شاماسىندا جاسالعان. جەرگىلىكتى پوليتسيا قىزمەتىنىڭ تاراتقان اقپاراتى بويىنشا، ۇرىلار باس-اياعى 57 مىڭ دوللاردى قۇرايتىن تەحنيكانى جىمقىرعان. بۇل وقيعانىڭ ءىزى سۋىماي 23 -قىركۇيەك كۇنى تاڭعى 5:50-دە دۇكەنگە تاعى ءبىر شابۋىل جاسالدى. اينەك قابىرعانى سىندىرىپ كىرگەن ۇرىلار بۇل جولى 50 مىڭ دوللاردىڭ تەحنيكاسىن اكەتىپتى.
وقيعا ورىن العان بۇل پالو-التو قالاسىندا Apple كومپانياسىنىڭ نەگىزىن قالاۋشى ستيۆ دجوبس كوزى تىرىسىندە بىرنەشە جىل تۇرعان ەدى. ءدال وسى وقيعا ا ق ش-تىڭ باسقا قالالارىندا دا قايتالانىپتى. قولدى بولعان تەحنيكالاردى ۇرىلار تەك قوسىمشا بولشەك رەتىندە عانا پايدالانا الادى. كومپانيا وكىلدەرى ۇرلانعان تەحنيكانىڭ بارلىعىن دەرلىك بۇعاتتادى.