قازاقستاندا ۆاليۋتالىق دەپوزيتتەر 12,1 پايىزعا تومەندەدى
بۇل تۋرالى بۇگىن ۇكىمەت وتىرىسىندا ق ر ۇلتتىق بانكى ءتوراعاسى ەربولات دوسايەۆ ايتتى، دەپ حابارلايدى قازاقپارات ءتىلشىسى.
ونىڭ دەرەگىنشە، دەپوزيت كولەمى قىركۇيەكتىڭ سوڭىندا 18,1 تريلليون تەڭگە بولىپ، جىل باسىنان بەرى 2,4 پايىزعا تومەندەدى. بانك سەكتورىن قالىپقا كەلتىرۋ شارالارىمەن بايلانىستى ولاردىڭ كولەمى 1-توقساندا تومەندەگەن سوڭ ساۋىردەن باستاپ دەپوزيتتەر 5,2 پايىزعا ءوستى نەمەسە 901 ميلليارد تەڭگە بولدى. شەتەل ۆاليۋتاسىنداعى سالىمداردى تەڭگەمەن سالىمدارعا اۋىستىرۋ جالعاسۋدا. 9 ايدا ۇلتتىق ۆاليۋتامەن سالىمدار 6,7 پايىزعا ءوستى. ال ۆاليۋتالىق دەپوزيتتەر 12,1 پايىزعا تومەندەدى. ناتيجەسىندە، دەپوزيتتەردىڭ دوللارلانۋ دەڭگەيى جىل باسىنداعى 48,4 پايىزدان قىركۇيەكتىڭ قورىتىندىسى بويىنشا 43,6 پايىزعا دەيىن تومەندەدى.
«دەپوزيت نارىعىنداعى ساپالى وزگەرىستەرگە وتكەن جىلى قازاندا ەنگىزىلگەن جەكە تۇلعالاردىڭ تەڭگە سالىمدارى بويىنشا ەڭ جوعارى ستاۆكا بەلگىلەۋدىڭ جاڭا ءتاسىلى ىقپال ەتۋدە. ءبىز ستاۆكانىڭ ءبىرىڭعاي ديرەكتيۆالىق ءمانىن بەلگىلەمەيمىز. قازىرگى ۋاقىتتا 6 ايعا دەيىنگى قىسقا ارالىقتا ستاۆكالار بازالىق ستاۆكا دەڭگەيىنە بايلانىستىرىلدى. دەپوزيتتىك ستاۆكالار بارىنشا ۇزاق ارالىقتا بانكتەردىڭ نارىقتىق ستاۆكالارىنا قاراي قالىپتاسادى»، - دەدى ۇ ب ءتوراعاسى.
ماسەلەن، مەرزىمسىز سالىمدار بويىنشا ستاۆكالار 10 پايىزدان، مەرزىمدى سالىمدار بويىنشا 12 پايىزدان اسپايدى. ال جيناق سالىمدارى بويىنشا 14,6 پايىزعا جەتتى.
«مۇنداي ءتاسىل نارىقتىڭ قالىپتى بولۋىن قامتاماسىز ەتەدى جانە كليەنت ءۇشىن باسەكەنى ارتتىرادى. جيناق دەپوزيتتەرىنىڭ تارتىمدىلىعىن كوتەرەدى»، - دەيدى ە. دوسايەۆ.