س ق و- نىڭ 11 اۋدانىندا ارامشوپكە قاتىستى كارانتين ايماقتارى بەكىتىلدى
بۇل تۋرالى ءنورماتيۆتى- قۇقىقتىق اكتىلەر سايتىندا جاريالاندى. قۇجاتقا سايكەس ايىرتاۋ، اقجار، اققايىڭ، جامبىل، ماعجان جۇمابايەۆ، كىزىلجار، عابيت مۇسىرەپوۆ، تايىنشا، تيميريازيەۆ، ءۋاليحانوۆ، شال اقىن اۋداندارىندا كارانتين رەجيمى ەنگىزىلە وتىرا كارانتيندى ايماقتار بەكىتىلدى. وعان جاتاعان ۋكەكىرە ءارامشوبىنىڭ كوپتەپ تارالۋى سەبەپ بولعان.
زياندى ءشوپ شامامەن 126 مىڭ گا القاپقا جايىلعان. سونىڭ ىشىندە تەك اقجار اۋدانىندا عانا 53716 گا كارانتين ايماعىنا كىردى. جاتاعان ۋكەكىرە - وڭايلىقپەن جويىلمايتىن ارام ءشوپتىڭ ءبىرى، تامىرى مىقتى كەلەتىن ول توپىراقتى قۇرعاتادى، داقىلدارمەن سالىستىرعاندا 2-5 ەسە كوپ قورەك پەن ىلعال سىڭىرەدى. ۋكەكىرە جايىلىمداردىڭ ونىمدىلىگىن كۇرت تومەندەتەدى، جەمشوپ ساپاسىن ناشارلاتادى. قۇرعاقشىلىق جىلدارى ءونىم شىعىمدىلىعى %60-70 عا تومەندەيدى ەكەن. تامىرى توپىراقتا 3 جىلعا دەيىن، تۇقىمى 5 جىلعا دەيىن ساقتالادى. ارام ءشوپ ءۇي جانۋارلارىنا، سونىڭ ىشىندە جىلقى مالىنا دا وتە زياندى. تاجىريبەلى ديقان جومارت وماروۆتىڭ ايتۋىنشا، بۇرىن جاتاعان ۋكەكىرە بەلگىلى ءبىر القاپتا انىقتالعان جاعدايدا ونى قورشاپ تاستاپ، مەحانيكالىق جولمەن جويۋعا تىرىسادى ەكەن.
«ءوز باسىم بۇل ارام شوپپەن كۇرەسىپ كورگەن جوقپىن، وعان جەتكىزە كورمەسىن. ويتكەنى، ەستۋىمشە وتە زياندى جانە ودان 30 جىلداپ قۇتىلا الماعاندار بار. بۇل ارام ءشوپ بىزگە شەتتەن كەلۋى مۇمكىن، ويتكەنى كەيبىر شارۋاشىلىقتار العان تۇقىمدارىن تەكسەرمەيدى، كىمنەن بولسا سودان الىپ سەبەدى. ال ونىڭ زاردابى وراسان. ەگەر جاتاعان ۋكەكىرە بويىنشا كارانتين ەنگىزىلەتىن بولسا، كەيىن باسقا مەملەكەتتەر ءبىزدىڭ ءونىمدى الماي قويۋى مۇمكىن. بيدايدىڭ ساپاسىنا اسەر ەتەدى، ونىمدىلىگى ازايادى»، - دەيدى جومارت وماروۆ.
«رەسپۋبليكالىق فيتوسانيتارلىق دياگنوستيكا جانە بولجامدار ادىستەمەلىك ورتالىعى» ر م م سقو فيليالىنىڭ مالىمەتىنشە، جاتاعان ۋكەكىرەنىڭ تامىرى 10 مەترگە دەيىن بارادى. شوق بولىپ ءوسىپ، بيىكتىگى 20-70 س م- گە دەيىن جەتەتىن ارام ءشوپ. س ق و- دا جىل سايىن كارانتيندىك وسىمدىككە قاتىستى مونيتورينگ جۇرگىزىلەدى. قازىرگى ۋاقىتتا ول 247995 گا اۋماقتا كەزدەسەدى. ال ناقتى زاقىمدانعان القاپ - 192 گ ا.
«ارام ءشوپ وسكەن 192 گ ا القاپتىڭ 191 گ ا اۋىل شارۋاشىلىعى داقىلدارى وسەدى، قالعانىن جول الىپ جاتىر. وتكەن جىلمەن سالىستىرعاندا ۋكەكىرە وسكەن اۋماق 3,7 گ ا ازايعان. بىلتىر ارام ءشوپ وسكەن القاپتار حيميالىق وڭدەۋدەن ءوتتى. ازىرگە ول ورىنداردا زياندى وسىمدىك شىققان جوق. كارانتيندىك وسىمدىك بولعاندىقتان ول جايىلعان القاپ ءۇش جىل باقىلاۋعا الىنادى. وسى ارالىقتا قايتىپ شىقپاسا، القاپتان شەكتەۋ الىنىپ تاساتالادى»، - دەلىنگەن فيليالدىڭ قازاقپارات تىلشىسىنە بەرگەن جاۋابىندا.