اسكەري وقۋ ورىندارىنا تالاپكەر قابىلداۋ 11- شىلدەدە باستالادى
بۇل تۋرالى قورعانىس مينيسترلىگى اسكەري ءبىلىم جانە عىلىم دەپارتامەنتى باستىعىنىڭ ورىنباسارى پولكوۆنيك اسەت اققوزىنوۆ ۆەدومستۆونىڭ كەزەكتى بريفينگىسىندە ايتتى.
«قورعانىس مينيسترلىگىنىڭ جوعارى اسكەري وقۋ ورىندارىنا قابىلداۋ 27- شىلدەدەن 11- تامىزعا دەيىن جالعاسادى. بىلتىر كارانتين شەكتەۋلەرىنە بايلانىستى قازاقستان ازاماتتارىن جوعارى اسكەري وقۋ ورىندارىنا قاشىقتان قابىلداعان ەدىك. بيىل قالىپتى فورماتتا وتكىزۋدى جوسپارلاپ وتىرمىز. ءبىراق ونىڭ ءبارى ايماقتارداعى ەپيدەميولوگيالىق جاعدايعا بايلانىستى»، - دەيدى مينيسترلىك وكىلى.
سونداي-اق، ول اسكەري ماماندىق يگەرگىسى كەلەتىن تالاپكەرلەرگە قويىلاتىن جاس شەكتەۋلەرى تۋرالى دا مالىمەت بەردى.
«جوعارى اسكەري وقۋ ورىندارىنا تۇسەتىن تالاپكەر 17 جاسقا تولعان 22 دەن اسپاعان ادام بولۋى كەرەك. ال اسكەري بورىشىن وتەگەن جانە وتەپ جۇرگەن تالاپكەر بولسا، ونىڭ جاسى 24 تەن اسپاۋى كەرەك. كەلىسىمشارت بويىنشا ىستەپ جۇرگەن اسكەري قىزمەتشى ءبىلىمىن جەتىلدىرگىسى كەلسە، جاسى 25 تەن اسپاۋى مىندەت»، - دەدى اسەت اققوزىنوۆ.