بيىل 11 مىڭنان استام ەتنيكالىق قازاق ورالمان مارتەبەسىن الدى

نۇر-سۇلتان. قازاقپارات - بيىلعى جىلدىڭ 1-قاراشاسىنا دەيىن 11,8 مىڭ ادام تاريحي وتانىنا ورالىپ، ورالمان مارتەبەسىن الدى. قازاقپارات بۇل تۋرالى ق ر ەڭبەك جانە حالىقتى الەۋمەتتىك قورعاۋ مينيسترلىگىنە سىلتەمە جاساپ حابارلايدى.

جالپى، 1991 -جىلدان بەرى رەسپۋبليكاعا 1 ميلليون 69,1 مىڭ ەتنيكالىق قازاق ورالعان.

«وسى جىلى قازاقستانعا كەلگەن ورالمانداردىڭ جارتىسىنان كوبى (55,5 پايىز) قىتايدان، 28,8 پايىز - وزبەكستاننان، 9,1 پايىز - تۇرىكمەنستاننان، 3,4 پايىز - موڭعوليادان جانە 2,9 پايىز - باسقا ەلدەردەن كەلدى. ەتنيكالىق قازاقتار نەگىزىنەن الماتى (52,3 پايىز)، ماڭعىستاۋ (13,4 پايىز) جانە تۇركىستان (5,5 پايىز) وبلىستارىنا، سونداي-اق نۇر-سۇلتان (4,1 پايىز) جانە الماتى قالالارىنا (5,7 پايىز) قونىستاندى.

10 ايداعى مالىمەت بويىنشا، ەڭبەككە قابىلەتتى جاستاعى قونىس اۋدارۋشىلار سانى 55,9 پايىز، ەڭبەككە قابىلەتتى جاستان كىشىلەر 32,6 پايىز جانە زەينەتكەرلەر 10,5 پايىز قۇرايدى»، - دەلىنگەن مينيسترلىكتىڭ باسپا ءسوز اقپاراتىندا.

اۆتور: اياۋلىم التىنبەك